1 Adyan ngga, Ben-Hadat murǝm Suriya ramba amǝ'lwa male kat abanɓwáná. Amurǝma lumi-tàrú-nong-ɓari na kam atè, andǝ apǝr andǝ awaru-pǝr. Eauwe wario kya gumbǝli Samariya, sǝ soa munǝo arǝì. 2 Pǝlǝa Ben-Hadat tasǝ amǝ'na-túrbân aban Ahap murǝm Isǝrayila aɓa nggea-lê, ne wi ama, <<Mǝnia ka nda cau mǝnana Ben-Hadat bang ngga ama: 3 <Bolo-azǝrfa mô, andǝ bolo-njengǝlan mò ka à mema; sǝ amāmó amǝɓoarkinsari andǝ amunio ka, à mema.> >>

4 Murǝm Isǝrayila eari wi ama, <<Kǝla mǝnana a bangŋi ka, ɓwamǝgule mem, we murǝm, mim sǝnǝ agir mǝnana kat mǝ ndanǝia ka, à mona.>>

5 Amǝ'na-túrbân nyar ɗǝm, sǝ à bang ama, <<Ben-Hadat na ama: <Ən túròban nǝ cau nǝma wu pam bolo-azǝrfa mô, andǝ bolo-njengǝlan mò, andǝ amāmó, sǝ amunio. 6 Sǝama liwi nǝ bu-pwari kǝla man ngga, mǝ nǝ tasǝ amǝ'túró-ɓala mem ɓǝà kya pelǝki ɓala mò andǝ aɓala mala aɓwana mô a là, sǝ agir mǝnana kat a earkiyicea ka, à nǝ̀ pwania arǝò, à nǝ̀ umnǝia.> >>

7 Pǝlǝa murǝm Isǝrayila tunǝ aɓwana-mǝgule kat mala nzali Isǝrayila, sǝ banggia wia ama, <<Wu sǝni, man yì ɓwabura ka ndaban altacau, acemǝnana túrban ama mǝ pe wi amāmám, andǝ amunem, andǝ bolo-azǝrfa mem, andǝ bolo-njengǝlan mem, sǝ ǝn ɓinǝi wi ɗàng.>> 8 Aɓwana-mǝgule kat andǝ aɓwana kat ne wi ama, <<Kǝa kwakikiro ko a ear cau male ɗàng.>>

9 Nda Ahap ne amǝ'na-túrbân mala Ben-Hadat ama, <<Wu banggi ɓwamǝgule mem, murǝm ama, <Guro mò nǝ̀ pàk gìr mǝnana kat a alte a dǝmbe ka, sǝama mǝnia yì gir a kǝ alte nǝnzǝ́mò ka, pa mǝ nǝ gandǝnǝ pe ɗàng.> >> Pǝlǝa amǝ'na-túrbân mala Ben-Hadat nyare, à kya ne wi cau mǝnana Ahap bang ngga. 10 Ben-Hadat túrban ɓǝà ne wi ama, <<Ɓǝ̀ aɓakuli wal-luem, yi mǝnana ɓǝn warina amǝ'kpatam pas mǝnana à nǝ̀ kiɗiki Samariya raka. À nǝ̀ kiɗiki nggea-lê yale tú mala nzali Samariya ka pà nǝ̀ lùmsǝ ɓabuia ɗàng.>>

11 Sǝ murǝm mala Isǝrayila ear ama, <<Wu ne wi ama, <Mǝ'lwa mǝɓoarne ka, kǝ nggori anzǝm mǝnana lina lwa ka. Mǝ'lwa mǝɓoarne ka, kǝ nggori a tita lwa ɗàng.> >> 12 Ben-Hadat ok man yì cau ka lang ndaban nukiagir andǝ amurǝma aɓalǝ agumli malea ka. Pǝlǝa ne aburana male ama, <<Wu gilǝ rǝ wun ace kánǝ munǝo.>> Nda koyanale ka twal bancame male ka.

13 Anggo ka, ɓè mǝɓangnǝa yiu aban Ahap murǝm mala Isǝrayila sǝ ne wi ama, <<Yahweh bang ama, a sǝn lakki mala amǝ'lwa man re? Sǝni, yalung ngga mǝ nǝ túrià a ɓabuo, sǝ awu nǝ̀ sǝlǝ ama mǝ nda Yahweh.>> 14 Sǝ Ahap ɗiban ama, <<Nǝ bù yana, sǝ à nǝ̀ túrià a ɓabuam?>>

Mǝɓangnǝa mǝno ne wi ama, <<Yahweh bang ama, nǝ bù alaggana mǝnana à nda aɓata anggwamna mala abu-nzali ka.>>

Ahap nyare ɗiban ama, <<Yana nǝ̀ tita kánǝ munǝo?>>

Pǝlǝa mǝɓangnǝa eari wi ama, <<A nda.>>

15 Pǝlǝa Ahap ramba alaggana mala anggwamna mala abu-nzali, yià gbǝman-ɓari nǝ lumi-tàrú-nong-ɓari (232). Nyar ɗǝm ngga, ramba amǝ'lwa mala Isǝrayila kat, yià á-tongno-nong-ɓari (7,000). 16 À wari nǝ pwarizǝkya. Sǝ Ben-Hadat ka, nda aban nu-mba andǝ wal-wale aɓalǝ agumli, yì andǝ amurǝma lumi-tàrú-nong-ɓari mǝnana à yiu ace bwali wi ka. 17 Alaggana mala anggwamna mala abu-nzali tita puro a dǝmba aban ká munǝo. Pǝlǝa Ben-Hadat tasǝ amǝ'shenzǝban, sǝ à yi ne wi ama, <<Aburana naban pur aɓa Samariya.>> 18 Murǝm Ben-Hadat banggia wia ama, <<Wu bwalia wu yinǝia andǝamǝsǝia, ko ɓǝ̀ à yiu ace munǝo, ko ace alta dorǝpwala ka.>>

19 Nda alaggana mala anggwamna mala abu-nzali purî ɓá nggea-lê, sǝ amǝ'lwa kpatea. 20 Koyanale ka wal-lú ɓimǝbura. Amǝ'Suriya ɓangŋa, sǝ amǝ'Isǝrayila pǝrtea. Sǝama Ben-Hadat murǝm Suriya ɓangŋa auwa a nzǝm pǝr atārǝia andǝ aɓea amǝ'pǝ̀r male. 21 Pǝlǝa murǝm Isǝrayila puro wario kya pwan apǝr andǝ awaru-pǝr, sǝ wal amǝ'Suriya nǝ walban mǝgule.

22 Pǝlǝa mǝɓangnǝe yiu aban murǝm Isǝrayila, sǝ banggi wi ama, <<Kyane, candǝ rǝo sǝ wu gilǝ rǝo amur gir mǝnana ɓoaro wu pe ka, acemǝnana nǝ kún gbangŋan mala pǝlǝa mǝnana kǝ yiu ka, murǝm Suriya na nǝ̀ nyare nǝ̀ yipa wun nǝ munǝo ka.>>

23 Pǝlǝa amǝgulo mala murǝm Suriya ne Ben-Hadat ama, <<Aɓakuli malea ka, aɓakuli mala mgbangban na, nda gìr mǝnana tsǝa sǝ à gandǝ sǝm ngga. Sǝama ɓǝ̀ sǝm munǝ arǝia a dulum ngga, ɓafo sǝm nǝ̀ gandǝia. 24 Ado ka, pàk gìr mǝnia ka: Pusǝ amurǝma a bancame malea, sǝ wu nggaɗia nǝ amǝ'sàrǝ̀ban, 25 sǝ wu ram amǝ'lwa andǝ apǝr, andǝ awaru-pǝr mǝnana lakki malea na kǝla mǝnana a dǝmbe ka. Pǝlǝa sǝm nǝ̀ arǝia a dulum, anggo ka sǝ sǝm nǝ̀ gandǝia.>> Ben-Hadat kwakikiri arǝ cau malea, sǝ pè anggo.

26 Lang ɓè pǝlǝa yi karna ka, Ben-Hadat ramba amǝ'lwa male, sǝ à eauwe à wari a Afek ace munǝ arǝ amǝ'Isǝrayila. 27 Sǝ amǝ'Isǝrayila ka, à ramǝna sǝ à pania wia agir-munǝo mǝnana à nǝ̀ munǝ nǝia arǝ amǝ'Suriya ka. Pǝlǝa à wario à kya tsǝk kàttì malea aɓadǝmba amǝ'Suriya kǝla amuna domwan ɓari mala ambul, sǝ amǝ'Suriya ka, à lumsǝ patal. 28 Sǝ ɓè ɓwa mala Ɓakuli yiu aban murǝm mala Isǝrayila, sǝ banggi wi ama, <<Yahweh na ama, <Acemǝnana amǝ'Suriya nana ama, <<Yahweh ka ɓakuli mala amgbangban na, yì ka ɓakuli mala adulum na raka,>> acemani ka mǝ nǝ pa amǝ'lwa mǝlake man a ɓabuo, sǝ awu nǝ sǝlǝ ama mǝ nda Yahweh.> >>

29 Amǝ'lwa mǝnia kǝm ngga, à tsǝk akattì malea nkāɓe nǝ rǝarǝia. Pǝlǝa a tongno-nong-ɓaria pwari ka, à je munǝo. Amǝ'Isǝrayila wal-lú asoje-kusǝu mala amǝ'Suriya á-gbǝman mwashat (100,000) a pwari mwashat. 30 Sǝ acili amǝ'Suriya ka, à ɓangŋa aban kutikio aɓa nggea-là Afek, sǝ sheran kpa amúr aburana á-lumi-ɓari-bwamdǝ-tongno-nong-ɓari (27,000) mǝnana à ue ka.

Ben-Hadat gbal ka, ɓangŋa kútí aɓa ɓè kurǝm-ɓaɓalǝu mala nggea-lê. 31 Pǝlǝa amǝgulo mala Ben-Hadat yiu abaní sǝ à ne wi ama, <<Sǝni, adyan ngga sǝm ongŋǝna ama amurǝma mala ɓala Isǝrayila ka, amǝ'sǝn-mǝsǝswatǝr na. Ɓǝ̀ sǝm kùrki * anggubyau-bumkiɗikea* a taɓunǝ sǝm, sǝ ɓǝ̀ sǝm ɗúrki anggur arǝ amyal sǝm, sǝ ɓǝ̀ sǝm kya aban murǝm mala Isǝrayila earka nǝ̀ nying sǝm nǝyilǝmu.>> 32 Nda à kùrki anggubyau-bumkiɗikea a taɓunia, sǝ à ɗúrki anggur a myalia, sǝ à wari aban murǝm Isǝrayila, à kya ne wi ama, <<Guro mò Ben-Hadat bang ama, <Ida, nyem nǝyilǝmu.> >> Sǝ murǝm Isǝrayila ɗia ama, <<Nda nǝyilǝmu piu le? Yì ka mǝ'eambǝam na.>>

33 Adyan ngga, aburane na aban alte à nǝ̀ ok cau mǝno. Pǝlǝa à ear akaurǝa, à na ama, <<E, mǝ'eambǝo Ben-Hadat nda nǝyilǝmu.>> Osso Ahap banggia wia ama, <<Wu kyane wu yinǝi.>> Lang Ben-Hadat yina ka, Ahap tsǝì eau atè aɓa waru-pǝr male.

34 Ben-Hadat banggi Ahap ama, <<Mǝ nǝ nyesǝô *anggea-là mǝnana tárrám ea arǝ tárró ka. Sǝ awu nǝ gandǝ tsǝk alimo a Damaska, kǝla mǝnana tárrám pè a Samariya ka.>> Ahap ne Ben-Hadat ama, <<Mǝ nǝ nyio wu o, kǝla mǝnana sǝm ear amur man yì cau ka.>> Nda à kùrcau andǝi, sǝ nyì u ka.

35 Yahweh banggi ɓeɓwa aɓa nggǝsan mala amǝ'ɓangnǝa ama ɓǝ̀ ne ɓi ama, <<Ida, tùlam.>> Sǝama ɓwê ɓinǝ* tùle. 36 Pǝlǝa banggi wi ama, <<Acemǝnana a kpata gi Yahweh raka, lang awu nǝ nying banam ani ka, im nǝ̀ wal-luio.>> Anzǝm mǝnana ɓwabure umǝna ka, kya je andǝ im, sǝ imnì wal-luí. 37 Pǝlǝa mǝɓangnǝe kum ɓè ɓwabura, sǝ ne wi ama, <<Ida, tùlam.>> Sǝ ɓwabure tùllì, tsǝki wi npenye. 38 Nda mǝɓangnǝe *ɓosǝki rǝi marǝki bugir a ɓamǝsǝi, sǝ wario kya do a gírí njargula ace kundǝ kutio mala murǝm. 39 Lang murǝm naban kútí ka, mǝɓangnǝa man tunǝi sǝ banggi wi ama, <<Mim guro mò ka, ǝn purna mǝ nǝ ká aɓa tsùrú mala munǝo ka, kara ɓè mǝ'lwa wulio sǝ yinǝ ɓè ɓwabura abanam sǝ nam ama, <Yál ɓwabura mǝnia ka; ɓǝ̀ ɓwar ka, nda a kún yilǝmo, sǝ ana raka, awu nǝ mbwe mǝsǝ bolo-azǝrfa á-tàrú.> 40 Sǝ lang guro mò naban pakki agir kaní sǝ akanó ka, kara ɓwabure ɓwaro o.>>

Pǝlǝa murǝm ne wi ama, <<Anggo sǝ ɓashi mò nǝ̀ pa; we nǝ nggearǝo ka, a kasǝna ɓashi.>>

41 Pǝlǝa mǝɓangnǝa man panzǝki bugir mǝnana marǝkina ɓamǝsǝi nǝi ka tsuk-tsuk, sǝ murǝm mala Isǝrayila súrǝì ama yì ka mwashat na aɓalǝ amǝ'ɓangnǝa.

42 Mǝɓangnǝe banggi wi ama, <<Yahweh na ama, <A nyingŋǝna ɓwa mǝnana ǝn tàrni ace kiɗike ka umǝna. Acemani ka, nǝ yilǝmo sǝ awu nǝ mbwe a kúnì yilǝmi, sǝ nǝ ayilǝmi aɓwana mô sǝ à nǝ̀ mbwe a kúnì ayilǝmi aɓwana male.> >> 43 Murǝm Isǝrayila nyar a ɓala-murǝm male a Samariya nǝ bumkiɗikea andǝ bumlulla.