1Amurǝma 11

Amālá Murǝm Solomon pǝlǝ ɓabumi nying njar mala Yahweh

1 Murǝm Solomon earce amamǝna pas mǝnana amǝ Isǝrayila na raka. Tsǝa-amur muna-ɓwama mala murǝm Masar mǝnana al ka, yì ɗǝm ngga alki amamǝna mala amǝ’Mowap, andǝ amǝ’Amon, andǝ amǝ’Edom, andǝ amǝ’Sidon, andǝ amǝ’Hitti. 2 Amǝnia ka à nda ka aɓwapǝndǝa mǝnana Yahweh bangŋǝni amǝ Isǝrayila ama, <<Pà wu nǝ̀ al rǝarǝ wun wunǝia ɗàng, acemǝnana à nǝ̀ pǝlǝ ɓabum wun aban kpata ankúl malea.>> Sǝ Solomon ngga ɓinǝe, dambǝa arǝ earce amamǝna man. 3 Ndanǝ amamǝna gbǝman-tongno-nong-ɓari (700) mǝnana amuna-amurǝma na, andǝ amā-twala gbǝman-tàrú (300). Sǝ aɓa mǝsǝcau, amāmí mǝnia yi pǝlǝ ɓabumi, nying kpata Ɓakuli. 4 Yi do ama lang Solomon yi twal ě ka, amāmí pǝlǝna ɓabumi aban peri atà aɓea aɓakuli. Pà ɓabumi kat aban kpata Yahweh Ɓakuli male, kǝla mǝnana tárrí Dauda pàk ka ɗàng. 5 Solomon yi kútí a peri atà nkúl mala amǝ’Sidon, mǝnana à tunǝki ama Ashterot, andǝ peri atà nkúl gìr’ɓeami mala amǝ’Amon, mǝnana à tunǝki ama Molek ka. 6 Anggo sǝ Solomon pàk gìr mǝnana mǝɓane na a mǝsǝ Yahweh ka; kpata Yahweh nǝ ɓabumi kat kǝla mǝnana tárrí Dauda pàk ka, ɗàng. 7 Solomon kya ɓak amgbangban ndàka-ankúl ace Kemosh, yì nkúl gìr’ɓeami mala amǝ’Mowap, andǝ ban-peri ace Molek, yì nkúl gìr’ɓeami mala amǝ’Amon, amur Nkono, nǝ njar-takuli mala Urǝshalima. 8 Yì ɗǝm ngga, ɓakki agyangŋan mala ndàka-ankúl mǝnana abǝri amāmí kat kǝ paɓoro mala pisǝ muku-gìr loasǝ yele mǝ’rǝmɓoarne, sǝ à kǝ pa gìr’nkila kàm aban ankúl malea ka.

9 Bum Yahweh lul kǝ̀rkǝ́r arǝ Solomon, acemǝnana ɓabumi pǝlǝa, nying Yahweh, yì Ɓakuli mala amǝ Isǝrayila, mǝnana lǝmdǝ rǝì a baní kusǝ ɓari ka.*11:9 Ɓalli aɓa: 1Amur 3:5; 9:2. 10 Kat andǝ amani ama Ɓakuli nunkir Solomon arǝ peri atà ankúl ka, Solomon ginǝ kpata cau mǝnana Yahweh banggi wi ka. 11 Acemani ka, Yahweh banggi Solomon ama, <<Acemǝnana gìr mǝnia ka pǝlǝno ɓealo, sǝ a ginǝna kpata kùrcau mem andǝ nzongcau mem, mǝnana ǝn tsǝko ka, mǝ ndarǝ banggo, mbak-kàngkàng mǝ ndo mǝ nǝ san domurǝm arǝò, mǝ nǝ pè mwashat atà amǝ’tò. 12 Sǝama atàcau mala tárró Dauda ka, pà mǝ nǝ san domurǝmì a do-yilǝmu mô ɗàng. Mǝ nǝ sannì a bu munio. 13 Kat andǝ amani ka, pà mǝ nǝ é kat ɗàng; mǝ nǝ nyinggi munio tàu mwashat atàcau mala guro mem Dauda, sǝ atàcau mala Urǝshalima, nggea-là mem mǝnana ǝn tarì ka.>>

14 Pǝlǝa Yahweh loasǝ ɓè ɓiumǝbura arǝ Solomon, Hadat ɓwa Edom. Yì ka nda a tàu-murǝm a nzali Edom.

15 * 11:15 Ɓalli aɓa: 2Sam 8:14; 1Acau 18:12,13.Ɗiɗyal mǝnana Dauda na aɓa munǝo andǝ Edom ngga, Jowap mǝ’sàrǝ̀ban mala amǝ’lwa wari a lúmsǝ́ lú aɓwana mǝnana à wallia ka, sǝ yì Jowap ka wal-lú aburana mǝnana à nda a Edom ngga kat. 16 (Jowap andǝ amǝ’lwa mala Isǝrayila puppup ka à ue kano zongŋo tongno-nong-mwashat, she lang walna-lú aburana mǝnana a Edom ngga kat). 17 Sǝama Hadat, mǝnana a bàkú mǝno ka muntulo na piu ka, ɓangŋa o a Masar atārǝia andǝ aɓea amǝ’Edom mǝnana aguro mala tárrí na ka. 18 À twal gya a Midiyan sǝ à kya bik Paran; à twal aɓea aburana ateà a Paran sǝ à o a Masar, aban Firona murǝm Masar mǝnana pe wi ɓala, pe wi girlina sǝ pe wi nzali ka. 19 Hadat ka kum murɓoarna mǝgule a mǝsǝ Firona, mǝnana tsǝa Firona pe wi ɓwama, mǝ’kyauwa Tapines mā-murǝm, ɓǝ̀ duk māmí ka. 20 Sǝ mǝ’kyauwa Tapines ɓǝlî wi muna-ɓwabura lullǝi ama Genubat. Tapines lǝsǝì a ɓala mala Firona; sǝ Genubat gulo atà amuna mala Firona a ɓala mala Firona.

21 Lang Hadat ok a Masar ama Dauda pàngŋǝ̀nà-lú, sǝ Jowap mǝ’sàrǝ̀ban mala amǝ-lwa wuna ka, Hadat banggi Firona ama, <<Ɗekiam ɓǝ̀n o a nzali mem.>>

22 Sǝ Firona ɗì ama, <<Mana a ɗwanyi kani a banam mǝnana tsǝa sǝ ado a kǝ alta o a nzali mô ka?>>

Pǝlǝa eari wi ama, <<Ən ɗwanyi kǝgir ɗàng, sǝama ida, ɗekiam ɓǝn o.>>

23 Ɓè mǝbura mǝnana Ɓakuli nyare loasǝi arǝ Solomon ngga nda Rezon muna-ɓwabura mala Eliyada, mǝnana ɓangŋa nying mǝtala-ɓala male Hadadeza, murǝm Zoba ka. 24 Yì ka rambǝa aburana atè sǝ duk ɓwamǝgule amur amǝ’mgbicau. Anzǝm mǝnana Dauda walǝna amǝ Zoba ka, Rezon andǝ aburana male ɓangŋa à o a Damaska, à kya duk kam sǝ à tsǝì duk murǝm a Damaska. 25 Rezon ngga ɓimǝbura mala Isǝrayila na aɓa do-yilǝmu mala Solomon kat, sǝ pàkkî Isǝrayila mǝɓike kǝla mǝnana Hadat pàk ka. Rezon ɓinǝmǝsǝ Isǝrayila sǝ duk murǝm a Suriya.

Mgbicau mala Jerobuam

26 Ɓeɓwa mǝnana mgbicau arǝ Murǝm Solomon ngga nda Jerobuam, ɓè mǝtúró mala Solomon. Tárrí nda Nebat, ɓwa Ifǝrem mala Zereda. Lullǝ ngge, mǝnana mā-lú na ka nda Zeruwa. 27 Mǝnia ka nda gìr mǝnana tsǝa sǝ Jerobuam mgbicau arǝ murǝm ngga: Lang Solomon na aban ɓak Millo, sǝ ndarǝ gilǝki ban mǝnana ara arǝ sheran mala nggea-là mala tárrí Dauda ka, 28 yi sǝn lagga man, yì Jerobuam ngga mǝ’ɓiki-túró na ka, pǝlǝa murǝm twali tsǝì ɓǝ̀ duk mǝ’ɗenyinǝ túró-púp mala ɓala mala Yisǝfu.

Ɓangnǝa ama Domurǝm mala Isǝrayila nǝ̀ gau ɓari

29 A ɓè pwari mwashat Jerobuam na aban purrì ɓá Urǝshalima sǝ je andǝ mǝɓangnǝa Ahija, ɓwa Shilo, a njar. Ahija ka, bǝsa daura na túr arǝì ka. À kǝ nda yia ɓari nǝmurǝia a nzǝm la. 30 Pǝlǝa Ahija bwal bǝsa daura mǝnana nda arǝì ka, sàngi arǝ abanì lum-nong-ɓari. 31 Pǝlǝa ne Jerobuam ama, <<Ang asanginè lum mala daure ace ɓamúrò, acemǝnana Yahweh Ɓakuli mala amǝ Isǝrayila bang ama, <Sǝni, Mǝ ndo mǝ nǝ san domurǝm mala amǝ Isǝrayila a bù Solomon, sǝ mǝ nǝ nyesǝ lum atà atau malea mǝ nǝ po. 32 Sǝama atàcau mala guro mem Dauda, sǝ atàcau mala Urǝshalima, yì nggea-là mǝnana ǝn tarrì aɓalǝ atau mala amǝ Isǝrayila ka, mǝ nǝ nyinggi wi tàu mwashat. 33 Mǝ nǝ ak domurǝm arǝ Solomon acemǝnana yì ka ginǝkinam, kutina a peri aban Ashterot, yì nkúl mǝɓwame mala amǝ’Sidon; andǝ Kemosh, yì nkúl mala amǝ’Mowap; sǝ aban Molek, yì nkúl mala amǝ’Amon. Yì ka kpata anjar mem, pak gìr mǝnana nǝ̀ pwasǝbumam ngga ɗàng. Yì ka kpata nê mem andǝ sà’arǝban mem kǝla mǝnana tárrí Dauda pàk ka ɗàng.

34 << <Kat andǝ amani ka, pà mǝ nǝ ak domurǝm kat arǝ Solomon ado ɗàng. Atàcau mala guro mem Dauda mǝnana ǝn tarì, sǝ kpata anzongcau mem andǝ anê mem ngga, mǝ nǝ nying Solomon ɓǝ̀ lidǝmba kǝla murǝm arǝ acili anonggio mala do ɓanza male kat. 35 Mǝ nǝ yia ak domurǝm a bù munì sǝ mǝ nǝ po atau lum. 36 Munì nǝ̀ duk murǝm amur tàu mwashat, ace mǝnana ɓǝ̀ tàu mala guro mem Dauda ɓǝ̀ lidǝmba amur buno-murǝm, ɓǝ̀ kǝ tá kǝla pitǝla a Urǝshalima, yì nggea-là mǝnana ǝn tarì mǝ nǝ tsǝk lullǝam kàm ngga. 37 Sǝ we ka, mǝ nǝ tsǝo wu duk murǝm mala Isǝrayila, sǝ awu nǝ yálmúr agir mǝnana kat a earce a ɓabumo ka. 38 Ɓǝ̀ a kwakikiro arǝ agir mǝnana kat ǝn nô, sǝ a kpata anjar mem, sǝ awu nǝ pàk gìr mǝnana nda jik abanam, awu nǝ kpata anê mem andǝ anzongcau mem, kǝla mǝnana guro mem Dauda pàk ka, mǝ nǝ cam atò. Mǝ nǝ tsǝǒ wu duk murǝm amur Isǝrayila, sǝ mǝ nǝ tsǝk munio andǝ amǝ’keò à nǝ̀ lidǝmba nǝ do amur buno-murǝm, do-bunomurǝm mǝnana pà nǝ̀ mal raka, kǝla mǝnana ǝn pakki Dauda ka. 39 Ace cauɓikea mala Solomon ngga, mǝ nǝ pakkî amǝkà Dauda gìr’kwanban, sǝ mǝnia ka pà nǝ̀ duk gìr’kwanban mǝnana málá male pà kàm raka ɗàng.> >>

40 Solomon ɓariki nǝ̀ wal-lú Jerobuam, sǝ Jerobuam ngga ɓangŋa o a Masar kya kum ban-auwa a ban Shishak, murǝm mala amǝ Masar. Jerobuam ue kano a Masar bà lú mala Solomon.

41 Adyan ngga, acili atúró mala Solomon, andǝ agir mana kat pàkkia, andǝ sǝlǝe male ka, à nda kam a gilǝe aɓa Malǝmce mala Atúró mala Solomon. 42 Yálban mala Solomon a Urǝshalima, amur Isǝrayila kat ka, apǝlǝa lumi-ine (40) na. 43 Sǝ Solomon paklú, sǝ à tsǝì a nggea-là mala tárrí Dauda. Sǝ muna-ɓwabura male Rehobuam duk murǝm a bancame male.