1Amurǝma 16

Ɓangnǝa arǝ Ba’asha

1 Cau mala Yahweh yiu aban *16:1 Ɓalli gbal aɓa: 2Acau 19:2; 20:34.Jehu muna-ɓwabura mala Hanani amur kpa-kiɗìkì mala Ba’asha ama, 2 <<Ən loasǝo aɓa tú, sǝ ǝn tsǝo a duk múrû amur aɓwana mem Isǝrayila, sǝama a *16:2 Ɓalli gbal aɓa: 15:34.twalkusǝ Jerobuam, a tsǝk aɓwana mem Isǝrayila à pàk cauɓikea, à lulbumam nǝ acauɓikea malea. 3 Acemani ka, mǝ ndo mǝ nǝ esǝkio, we Ba’asha wunǝ ɓala mò kat; sǝ mǝ nǝ tsǝk ɓala mò ɓǝ̀ pa kǝla ɓala mala Jerobuam muna-ɓwabura mala Nebat. 4 Koya ɓwa atà amǝɓala mò mǝnana wù aɓa là ka, anvwa nǝ̀ shè, sǝ mǝnana wù a ɓawan ngga, anyal mǝnana a bumkuli ka à nǝ̀ lì.>>

5 Adyan ngga, acili agir mǝnana kat à kumban aɓa yálmúrû mala Ba’asha, andǝ agir mǝnana kat peǎ, andǝ rǝcandǝa male ka, à nda kam a gilǝe aɓa Malǝmce mala Acau-ɓaraɓara mala Amurǝma mala Isǝrayila.

6 Ba’asha usǝlǝo atà akê sǝ à tsǝk-luí a Tǝrza; sǝ Ela muna-ɓwabura male duk murǝm a bancame male.

7 Cau mala Yahweh yiu nǝban mǝɓangnǝa Jehu muna-ɓwabura mala Hanani, amur Ba’asha sǝ amur ɓala male, ace aɓealɓikea mala Ba’asha mǝnana kat pàkkia a mǝsǝ Yahweh ka, sǝ ace lulbum mǝnana lulbum Yahweh nǝ atúró mǝnana buì peǎ, kǝla mǝnana ɓala mala Jerobuam pa, sǝ nǝ mǝno ka yinǝ kiɗikiban male ka.

Ela yálmúr Isǝrayila

8 Aɓa lumi-ɓari-bwamdǝ-tongno-nong-mwashatia (26) pǝlǝa mala yálmúrû mala Asa murǝm mala Yahuda ka, Ela muna-ɓwabura mala Ba’asha duk murǝm amur Isǝrayila, sǝ yálmúr aɓwana a Tǝrza apǝlǝa ɓari. 9 Mǝtúró-ɓadembi Zǝmri, mǝnana nda mǝ’sàrǝ̀ban amur gauwa-tsùrú mala awaru-pǝr male ka, kùrkún amurí. Adyan ngga, Ela na a Tǝrza aban nu-mba andǝ wal-wale a ɓala mala Arza, mǝnana nda mǝ’ɗenyinǝ ɓala mala murǝm a Tǝrza ka. 10 Pǝlǝa Zǝmri yi kútí a ɓala, sǝ wali wal-luí. (Mǝnia ka kumban a lumi-ɓari-bwamdǝ-tongno-nong-ɓaria pǝlǝa mala yálmúrû mala Asa murǝm Yahuda.) Zǝmri ak bancame mala Ela kǝla murǝm.

11 Lang Zǝmri tinata yálmúrû zuku anzǝm mana eauna a buno-murǝm male ka, wal-lú amǝɓala mala Ba’asha kat. Nyinggi wi kǝ ɓwabura ko mwashat atà aɓǝla male ko agyajam male ɗàng. 12 Anggo sǝ Zǝmri kiɗiki ɓala mala Ba’asha puppup, kǝla mǝnana cau mala Yahweh bangŋi nǝ kún mǝɓangnǝa Jehu amur Ba’asha ka, 13 atàcau mala acauɓikea mala Ba’asha kat, andǝ acauɓikea mala muna-ɓwabura male Ela, mana à peǎ, sǝ à tsǝk Isǝrayila peǎ, sǝ à *16:13 Ɓalli gbal aɓa: Nggur 32:21.soabum Yahweh, Ɓakuli mala Isǝrayila, à lulbumi nǝ agirɓana, aɓǝ̀nzál malea ka. 14 Adyan ngga, acili agir mǝnana kat à kumban aɓa yálmúrû mala Ela, andǝ agir mǝnana kat peǎ ka, à nda kam a gilǝe aɓa Malǝmce mala Acau-ɓaraɓara mala Amurǝma mala Isǝrayila.

Do-bunomurǝm mala Zǝmri

15 Zǝmri tita yálmúr Isǝrayila aɓa lumi-ɓari-bwamdǝ-tongno-nong-ɓaria pǝlǝa mala yálmúrû mala Asa murǝm Yahuda, sǝama yálmúrû male a Tǝrza ka, mala nongŋo tongno-nong-ɓari na. A bàkú mǝno ka amǝ’lwa na a kàttì aban gumbǝli Gibeton, ɓè là mala amǝ’Filisti, nǝ lwa. 16 Lang amǝ Isǝrayila mǝnana à ramba a kàttì ok ama Zǝmri kùrnakun amur murǝm sǝ walna-luí ka, amǝ Isǝrayila kat twal Omǝri, mǝ’sàrǝ̀ban mala amǝ’lwa, akǝ mǝno yì pwari ka, aɓa kàttì, ɓǝ̀ duk murǝm Isǝrayila. 17 Pǝlǝa Omǝri andǝ amǝ’lwa mala Isǝrayila kat atè loapi Gibeton sǝ à kya gumbǝli Tǝrza. 18 Lang Zǝmri sǝni ama à angŋa nggea-là ka, kútí aɓa kanggǝrang-ban mala ɓala mala murǝm sǝ soa bǝsa, pisǝ ɓamúrì andǝ ɓala mala murǝm kam. 19 Mǝnia ka kumban atàcau mala acauɓikea male mǝnana peǎ ka. Pàk gìr mǝnana mǝɓike na a mǝsǝ Yahweh ka, sǝ kpata anjar mala Jerobuam aban ɓǝsǝlǝ cauɓikea mǝnana pè sǝ tsǝk Isǝrayila pè ka. 20 Ado ka, acili agir mǝnana à kumban aɓa yálban mala Zǝmri, andǝ kùrkún male amur Ela ka, à nda kam a gilǝe aɓa Malǝmce mala Acau-ɓaraɓara mala Amurǝma mala Isǝrayila.

Omǝri duk murǝm a Isǝrayila

21 A bàkú mǝno ka, amǝ Isǝrayila gau arǝ abanì ɓari: gauwa-tsùrú mala aɓwe o atà Tibǝni muna-ɓwabura mala Ginat ace tsǝe ɓǝ̀ duk murǝm, sǝ cili gauwa-tsùrú ka, o atà Omǝri. 22 Sǝama aɓwana mǝnana à o atà Omǝri ka, à ɓākì aɓwana mana à nda atà Tibǝni ka. Nda Tibǝni wǔ, sǝ Omǝri duk murǝm ngga.

23 Nda a lumi-tàrú-nǝ-mǝsǝi-mwashatia pǝlǝa mala yálmúrû mala Asa murǝm Yahuda sǝ Omǝri duk murǝm amur Isǝrayila. Yálmúr aɓwana apǝlǝa lum-nong-ɓari; tongno-nong-mwashat mala apǝlǝa yálmúrû male mǝnia ka nda a Tǝrza.

24 Pǝlǝa Omǝri kúr mgbangban mala Samariya a bù Shema a kún mǝsǝ bolo-azǝrfa á-tongno-nong-mwashat, sǝ ɓak nggea-là amur mgbangbanì sǝ pe wi lullǝu ama Samariya; twali arǝ lullǝu Shema, mǝnana nda mǝtala mgbangbanì ɗiɗyal ka.

25 Omǝri pàk gìr mǝnana mǝɓike na a mǝsǝ Yahweh ka, sǝ cauɓikea male kútì mala aɓwana mǝnana kat à nda dǝmba nǝi ka. 26 Yì ka kpata anjar mala Jerobuam muna-ɓwabura mala Nebat kat aban ɓǝsǝlǝ acauɓikea mǝnana peǎ sǝ tsǝk Isǝrayila peǎ ka. À lulbum Yahweh Ɓakuli mala Isǝrayila nǝ agirɓana, aɓǝ̀nzál malea.

27 Adyan ngga, acili atúró mǝnana Omǝri peǎ, andǝ rǝcandǝa male mǝnana lǝmdǝi ka, à nda kam a gilǝe aɓa Malǝmce mala Acau-ɓaraɓara mala Amurǝma mala Isǝrayila. 28 Omǝri yi usǝlǝ atà akê sǝ à tsǝk-luí a Samariya; sǝ muna-ɓwabura male Ahap duk murǝm a bancame male.

Do-bunomurǝm mala Ahap a Isǝrayila

29 Ahap muna-ɓwabura mala Omǝri yi duk murǝm Isǝrayila a lumi-tàrú-bwamdǝ-tongno-nong-tàruià (38) pǝlǝa mala yálmúrû mala Asa amur Yahuda, sǝ yálmúr Isǝrayila a Samariya apǝlǝa lumi-ɓari-nong-ɓari (22).

30 Ahap muna-ɓwabura mala Omǝri pàkkia agir mǝnana amǝɓike na a mǝsǝ Yahweh ka *16:30 Ɓalli gbal aɓa: 21:25.kútì mala aɓwana mǝnana kat à nda dǝmba nǝi ka. 31 Twalkusǝ Jerobuam muna-ɓwabura mala Nebat a baní ka, gìr na bǝtikulyak, nda kya al Jezebel*16:31 Ɓalli gbal aɓa: Nggur 7:3-4; 1Amur 18:4,13; Sǝn 2:20. ɓoarnsarile Etba’al murǝm mala amǝ Sidon,*16:31Sidon ngga nda mwashat atà anggea-là mǝcandǝe a Fonishiya a kún nggeamùr Mediterani nǝ njar-nza mala Isǝrayila; yalung ngga nda a njar-kunmur mala Lebano. sǝ kútí a *16:31 Ɓalli gbal aɓa: 21:25-26.peri aban Ba’al. 32 Loasǝ gyangŋan ace Ba’al a ɓala mala Ba’al, mǝnana ɓè a Samariya ka. 33 Ahap ɗǝm ngga tsǝk tondong mala *16:33 Ɓalli gbal aɓa: 18:19; 2Amur 13:6; 17:10; 21:3; 2Acau 14:3.Ashera; Ahap pàk agir kam piu ɓǝ̀ soabum Yahweh, lulbum Ɓakuli mala Isǝrayila kútì amurǝma mala amǝ Isǝrayila mana a ɓadǝmbi ka kat.

34 A nza male sǝ Hiyel ɓwa’Betel ɓak Jeriko. Kwakita kusǝɓa nǝ ɓwarban Abiram muna dǝmba male, sǝ oasǝ akún-la nǝ ɓwarban mǝtankwang male Segup, kǝla mǝnana cau mala Yahweh bang nǝ kún *16:34 Ɓalli gbal aɓa: Jes 6:26.Jesǝwa muna-ɓwabura mala Nun ngga.