1 A lum-bwamdǝ-tongno-nong-tàruia (18) pǝlǝa mala yálmúrû mala Jerobuam muna-ɓwabura mala Nebat ka, Abijam duk murǝm amur Yahuda. 2 Yálmúr aɓwana a Urǝshalima apǝlǝa tàrú; lullǝ ngge nda Ma'aka,* ɓoarnsarile Abishalom. 3 Yì ka kpata pàkkiagir cauɓikea mǝnana tárrí akdǝmba peǎ ka, sǝ pà ɓabumi kat nǝ mǝsǝcau aɓadǝm Yahweh Ɓakuli male, kǝla mǝnana ɓabum kè Dauda pàk ka ɗàng.* 4 Sǝ atàcau mala Dauda ka, Yahweh Ɓakuli male pè Abijam muna-ɓwabura ɓǝ̀ lo a kusǝi, kǝla pitǝla [ɓǝ̀ kǝ tá] a Urǝshalima, sǝ ɓǝ̀ tamsǝkusǝ Urǝshalima kàngkàng. 5 Mǝnia ka nda acemǝnana Dauda pàk gìr mǝnana nda pepè a mǝsǝ Yahweh ka, sǝ burice komǝye atà anzongcau male ɗàng, aɓa do-yilǝmu male kat, she aɓa cau mala Yuriya * ɓwa'Hitti. 6 Lwa mǝnana tinate anre Rehobuam* andǝ Jerobuam ngga lidǝmba aɓa do-yilǝmu mala Abijam kat. 7 Acili agir mǝnana à kumban, andǝ agir mǝnana kat à peǎ aɓa yálmúrû mala Abijam ngga, à nda kam a gilǝe aɓa Malǝmce mala Acau-ɓaraɓara mala Amurǝma mala Yahuda.* Sǝ lwa ka nda kam anre Abijam andǝ Jerobuam.

8 Sǝ Abijam yi usǝlǝo atà akê, pǝlǝa à tsǝk-luí aɓa nggea-là mala Dauda. Sǝ muna-ɓwabura male Asa duk murǝm a bancame male.*

9 A lum-nong-ɓaria pǝlǝa mala yálmúrû mala Jerobuam murǝm Isǝrayila ka, Asa duk murǝm amur Yahuda, 10 sǝ yálmúr aɓwana a Urǝshalima apǝlǝa lumi-ine-nong-mwashat (41). Lullǝ ke-mǝɓwame nda Ma'aka, ɓoarnsarile Abishalom. 11 Asa pàk gìr mǝnana nda pepè a mǝsǝ Yahweh ka, kǝla mǝnana kè Dauda pàk ka. 12 Pǝr aburana amǝ'gyatarǝu mala ɓwabura-nǝ-nongnǝ-ɓwabura, à purî ɓá nzalî, sǝ pusǝki aɓǝ̀nzál mǝnana kat atarrí peǎ ka. 13 Yì ɗǝm ngga pusǝ ke-mǝɓwame Ma'aka arǝ duk nggeau-murǝm, acemǝnana ɓak ɓǝ̀nzál gir ɓeami ace Ashera ka. Pǝlǝa Asa kwarki mǝno yì ɓǝ̀nzál ka, sǝ pisǝi a ɓangŋaban Kidǝron.* 14 Sǝama amgbangban-peri atà ankúl na kat à kiɗikia ka ɗàng.* Kat andǝ amani ka, Asa kpata Yahweh nǝ ɓabumi kat aɓa do-yilǝmu male kat. 15 Yì ka yinǝ agir bolo-azǝrfa, andǝ agir bolo-njengǝlan andǝ atanggǝla mǝnana yì andǝ tárrí tàrnia ace Yahweh ka, a ɓala mala Yahweh.

16 Asa andǝ Ba'asha murǝm Isǝrayila camarǝ lwa-lwa arǝarǝia aɓa do-yilǝmu malea kat.* 17 Ba'asha murǝm Isǝrayila wari nǝ lwa arǝ Yahuda,* sǝ kutia ɓak nggea-là Rama ace mǝnana nǝ̀ tamsǝ koyaɓwa mǝnana earce ama nǝ̀ pùro, ko nǝ̀ kùtí aɓa nzong-nzali mala Asa murǝm Yahuda ka. 18 Pǝlǝa Murǝm Asa pwan agir bolo-azǝrfa andǝ agir bolo-njengǝlan mǝnana kat à ɗekia aɓalǝ andà-tsǝk agir-ɓoarna mala ɓala mala Yahweh, andǝ amǝnana a ɓala-murǝm ngga, sǝ pè amǝ'túró-ɓala male a buia. Pǝlǝa banggia wia ɓǝà kyan nǝia ɓǝà kya pê Ben-Hadat muna-ɓwabura mala Tabrimon, muna-ɓwabura mala Heziyon murǝm Suriya, mǝnana ndanǝdo a Damaska ka,* sǝ ɓǝà banggi wi ama, 19 <<Ɓǝ̀ sǝm kùrcau, mim sǝnǝ we, kǝla mǝnana nda kam ɗiɗyal anre tárrám andǝ tárró ka.* Sǝni, mǝ ndya ǝn nggǝ tasǝô agir bolo-azǝrfa andǝ agir bolo-njengǝlan kǝla ɓoro ka. Ado ka, kyane, kya panzǝ kùrcau mǝnana anre wun wunǝ Ba'asha murǝm Isǝrayila ka,* ace mǝnana ɓǝ̀ ɗekiǎm ngga.>> 20 Pǝlǝa Ben-Hadat kpata cau mala Murǝm Asa sǝ tasǝ amǝ'sàrǝ̀ban mala amǝ'lwa male sǝ à wari nǝ munǝo arǝ anggea-là mala Isǝrayila. À limurǝm amur alá Ijon, andǝ Dan, andǝ Abel-Bet-Ma'aka, andǝ Chineret kat, andǝ bu-nzali Naftali kat. 21 Sǝ lang Ba'asha okce ka, tamsǝ túró ɓak sheran mǝnana a Rama ka, sǝ o kya do a Tǝrza. 22 Pǝlǝa Murǝm Asa hamnǝi aɓa Yahuda kat ama koyan andǝ koyan, à tàr kǝɓwa ɗàng, ɓǝà kya a Rama. Sǝ à pwan atali, andǝ agbǝlang nggun mǝnana Ba'asha na arǝ pàngŋǝ̀nà-túró nǝia aban ɓak Rama ka, à umnǝia. Murǝm Asa pàktúró nǝ atali andǝ agbǝlang nggun mǝno ka sǝ ɓak Geba,* là a bu-nzali Benjami, andǝ là Mizpa.

23 Adyan ngga, acili agir mǝnana kat à kumban aɓa yálmúrû mala Asa, andǝ rǝcandǝa male kat, andǝ agir mǝnana kat peǎ, andǝ anggea-là mǝnana ɓakkia ka, à nda kam a gilǝe aɓa Malǝmce mala Acau-ɓaraɓara mala Amurǝma mala Yahuda. Sǝama lang Asa kya è ka, kum kwánó a kusǝi.* 24 Sǝ Asa yi usǝlǝo atà akê, pǝlǝa à tsǝk-luí a ɓembe-ɓa-tali atà akê aɓa nggea-là mala kè Dauda. Sǝ muna-ɓwabura male Jehoshafat duk murǝm a bancame male.

25 A ɓaria pǝlǝa mala yálmúrû mala Asa amur Yahuda ka, Nadap muna-ɓwabura mala Jerobuam duk murǝm mala Isǝrayila, sǝ yálmúr Isǝrayila apǝlǝa ɓari. 26 Yì ka pàk gìr mǝnana mǝɓike na a mǝsǝ Yahweh ka. Kpata kusǝ tárrí aban ɓǝsǝlǝ cauɓikea mala tárrí mǝnana tsǝk Isǝrayila pè ka.

27 Ba'asha muna-ɓwabura mala Ahija, mǝnana nda a tàu mala Isaka ka, kùrkûn amur Nadap. Lang Nadap andǝ amǝ'lwa male kat wari nǝ munǝo arǝ Gibeton,* ɓè là aɓa nzong-nzali mala amǝ'Filisti, sǝ à kya gumbǝli lě ka, Ba'asha wal-lú Nadap abanì. 28 Ba'asha wal-luí a tàruià pǝlǝa mala yálmúrû mala Asa murǝm Yahuda, sǝ duk murǝm a bancame male. 29 Tù anzǝm mǝnana dumǝna murǝm ngga, wal-lú amǝ'ɓala mala Jerobuam puppup. Ɗeki kǝɓwa nǝyilǝmu a ɓala mala Jerobuam ɗang, she lang twalnatea kang, kǝla mǝnana cau mala Yahweh bangŋi nǝ kun guro male Ahija ɓwa'Shilo* ka. 30 Mǝnia ka yi pa acemǝnana Jerobuam loasǝ bumlulla mala Yahweh, Ɓakuli mala Isǝrayila nǝ acauɓikea mǝnana peǎ, sǝ tsǝk Isǝrayila peǎ ka.

31 Adyan ngga, acili agir mǝnana à kumban aɓa yálban mala Nadap, andǝ agir mǝnana peǎ kat ka, à nda kam a gilǝe aɓa Malǝmce mala Acau-ɓaraɓara mala Amurǝma mala Isǝrayila. 32 Sǝ munǝo lidǝmba anre Asa andǝ Ba'asha murǝm Isǝrayila aɓa do-yilǝmu malea kat.

33 A tàruia pǝlǝa mala yálban mala Asa murǝm Yahuda ka, Ba'asha muna-ɓwabura mala Ahija duk murǝm amur Isǝrayila kat, a Tǝrza, sǝ yálmúr aɓwana apǝlǝa lumi-ɓari-nong-ine (24). 34 Yì ka pàk gìr mǝnana mǝɓike na a mǝsǝ Yahweh ka; kpata kusǝ Jerobuam aban ɓǝsǝlǝ cauɓikea male mǝnana pè sǝ tsǝk Isǝrayila pè ka.