1 Lang Hiram murǝm Taya ok ama à ɗārǝna Solomon ɓǝ̀ duk murǝm a kúnì tárrí ka, tasǝ amǝ'túró-ɓala male abanì [ɓǝà makkìkún] acemǝnana Hiram ngga, gyajam mala Dauda na aɓa do malea kat.* 2 Solomon túrban nǝ cau aban Hiram ama:

3 <<A sǝlǝna ama tárrám Dauda ka gandǝnǝ ɓak ɓala ace lullǝ Yahweh Ɓakuli male ɗàng, atàcau mala alwa-lwa mǝnana aɓi-mǝbura gumbǝli nǝi ka, she lang Yahweh pàni wi limurǝm amúrià ka. 4 Sǝ ado ka, Yahweh Ɓakuli mem panam usǝlǝo a koya buì ka. Ən pànǝ ɓekǝ ɓiu-mǝbura ko gìr-kumban mǝɓike ɗàng. 5 Acemani ka, mǝ ndarǝ na nǝma mǝ nǝ ɓak ɓala ace lullǝ Yahweh Ɓakuli mem, *kǝla mǝnana Yahweh banggi tárrám Dauda, ama, <Munio mǝnana Mǝ nǝ tsǝi amur buno-murǝm a kunio ka, nda mǝnana nǝ̀ ɓak ɓala ace lullǝam ngga.>

6 <<Acemani ka, tsǝa ɓǝà kasǝâm anggun-seda mala Lebano. Aburana mem andǝ amô nǝ̀ paktúró atārǝia, sǝ mǝ nǝ mbweka aburana mô gìr mǝnana kat awu nǝ kasǝ ka; sǝ kǝla mǝnana a sǝlǝ ka, kǝɓwa pà kàm aɓalǝ sǝm mǝnana sǝlǝ kasǝ nggun kǝla amǝ'Sidon ma'wun ngga ɗàng.>>

7 Lang Hiram ok cau mala Solomon ngga, banɓoari wi kǝ̀rkǝ́r sǝ bang ama, <<Ɓwangsǝban ɓǝ̀ pa aban Yahweh a pwari man yalung ngga, acemǝnana panî Dauda muna-ɓwabura mǝ'sǝlǝe ace yálmúr mǝnia yì nzali mǝgule ka.>> 8 Hiram tasǝî Solomon ban nǝ cau ama:

<<Ən ongŋǝna cau mǝnana a tasǝami ka. Ən earna mǝ nǝ po akpamgbang mala nggun-seda andǝ mala nggun-sapǝre mǝnana a earce ka. 9 Aburana mem nǝ̀ pwania a Lebano, sǝ à nǝ̀ kánia a kún nggeamùr. Sǝ mǝ nǝ tsǝa à nǝ̀ kurkia arǝarǝia, sǝ à nǝ̀ kyalnǝia amur nggeamùr aban ká a ban mǝnana a bang ngga. A ban mǝno ka, mǝ nǝ tsǝa à nǝ̀ panzǝkia, sǝ awu nǝ̀ pwania. Gìr mǝnana ǝn earce wu pam ngga nda girlina ace aɓwana mem mana a palta.>>

10 Nda Hiram pè Solomon agbǝlang nggun-seda andǝ amala nggun-sapǝre mǝnana kat earce ka. 11 Solomon pǝlǝa pè Hiram abuku mala mǝssa-alkama á-lumi-ɓari (20,000) andǝ mùrú olif lita á-gbǝman-ine (400,000) ace linǝ aɓwana male; anggo sǝ kǝ pe wi koya pǝlǝa. 12 Yahweh pè Solomon sǝlǝe kǝla mǝnana kánbi wi ka. Sǝ Hiram andǝ Solomon kùrcau arǝarǝia mala do aɓa rǝpwala.

13 Murǝm Solomon tsǝk aɓwana á-lumi-tàrú (30,000) aɓa túró-púp arǝ abân aɓa Isǝrayila kat. 14 Tasǝia a Lebano ace pàk túrô, aɓwana á-lum (10,000) koya zongŋo. Koya ɓwa ka pàk zongŋo mwashat a Lebano, sǝ nǝ̀ nyare a là nǝ̀ pàk azongŋo ɓari. Adoniram nda ɓwamǝgule amúrià ace sǝntà túrè. 15 Solomon ngga ndanǝ amǝ'pwan-tali á-lumi-tongno-nong-ɓari (70,000), andǝ amǝ'kasǝ-tali, andǝ amǝ'kpalikirǝ-tali á-lumi-tongno-nong-tàrú (80,000) amur ankono, 16 sǝ ndanǝ amǝ'sǝntà-túrô á-tàrú nǝ gbǝman-tàrú (3,300) ace gingnǝ amǝ'túrô. 17 Aɓa kpata nê mala murǝm Solomon ngga, amǝ'túrô pusǝki atali mǝgulke andǝ amǝɓoarne a ban mǝnana à ɓunnia ka, sǝ à gilǝkirǝia ace nongsǝ kusǝɓa mala ɓala mala Yahweh. 18 Anggo sǝ amǝ'ɓa mǝnana Solomon andǝ Hiram yinǝia, andǝ aburana mala *Gebal ka à pàk túró mala kasǝ anggun, andǝ gilǝkirǝ atali ace ɓak ɓala mala Yahweh.