Apocalipse 15

Amǝturonjar tongno nong-ɓari yinǝ masǝlǝata agir tanni-twal-là

1 Anzǝm mǝno ka, ǝn sǝn ɓe gir’lǝmdǝa mǝgule andǝ mǝ’pa ndali, puro a kùli. Amǝturonjar na yia tongno-nong-ɓari, mǝnana à ndanǝ masǝlǝata agir yinǝ tanni-twal-là, mǝnana à nǝ̀ yia lǝmdǝ masǝlǝata bumlulla mǝgule mala Ɓakuli nǝia ka.*15:1 Ɓalli gbal aɓa: Pǝris 26:21. 2 Nyare ǝn sǝn ɓe kǝgìr kǝla nggeamùr gǝlas mǝnana à zurǝi andǝ bǝsa ka. Sǝ ɗǝm ngga ǝn sǝn aɓwana mǝnana à limurǝm amur nyamɓikea andǝ ɓǝ̀nzál male andǝ lámbà mala lùllǝì ka, aban came a kún mǝno yì nggeamùr gǝlas ka. Ko yan ateà ka, bwal mǝzangŋan mǝnana Ɓakuli pè wi ka, a buì. 3 À nda rǝ tu nggyal mala Musa, yì guro mala Ɓakuli, andǝ nggyal mala Mǝgam; à kǝ na ama:

<<We, Mǝtalabangŋo Ɓakuli,

mǝnana a Karmur Gulo

kat ka,

a pakki atúró mǝgulke

andǝ agir pa’ndali.

Atúró mô kat ka,

a kǝ́ pea aɓa

mǝsǝcau andǝ kpate

a njarnì,

We Murǝm mala anzali!*15:3 Ɓalli gbal aɓa: Pur 15:1; Ang 145:17.

4 Yana ɓwe na pà nǝ̀

ɓanggo raka?

Yana ɓwe na nǝ̀ ginǝ

pe lùllǝò gulo,

We Mǝtalabangŋo?

We nǝmurǝo ɓǝ̀rɓǝ̀r,

a nda Mǝfele.

Aɓwana arǝ anzali kat,

à nǝ̀ yia peri

a ɓadǝmbo,

acemǝnana atúró

ɓealɓoarna mô ka,

à pusǝna rǝia.>>*15:4 Ɓalli gbal aɓa: Ir 10:7; Ang 86:9-10.

5 Anzǝm mǝnia ka, ǝn sǝni à mǝn Ndàmǝgule mala Ɓakuli, yì Taragula mǝfele mana akanó a kùli ka,*15:5 Ɓalli gbal aɓa: Pur 40:34. 6 sǝ amǝturonjar nì tongno-nong-ɓari mǝnana à ndanǝ agir yinǝ tanni-twal-là ka, à nda ban purî ɓālǝi. À oasǝki anggea-daura pwasǝa mana à teǎ nǝ nggubyau linǝn mǝɓoarnsari ka a rǝia, sǝ à marǝki abugir mǝnana à peǎ nǝ bolo-njengǝlan ka, a kikilia. 7 Mwashat atà agir-yilǝmu nì ine ka, yiu yi pè koyan atà amǝturonjar mǝno tongno-nong-ɓari ka, tasau mǝnana a tùllì nǝ zǝnariya ka. Amǝnia yia atasau ka, à lumsǝkia nǝ bumlulla mala Ɓakuli mana ndanǝ yilǝmu, málá male pà kàm raka. 8 Kara Ndàmǝgule twalo lùmsǝ nǝ yele, mǝnana pur nǝ ɓá ɓoarɓwa andǝ rǝcandǝa mala Ɓakuli ka.*15:8 mǝnana pur nǝ ɓá ɓoarɓwa andǝ rǝcandǝa mala Ɓakuli ka. Ko <<mǝnana lǝmdǝa ama Ɓakuli aɓa ɓoarɓwa andǝ rǝcandǝa male ka nda abanì.>> *15:8 Ɓalli gbal aɓa: 2Acau 5:13-14; 1Amur 8:10-11; Isha 6:4; Ezǝk 44:4. Kǝ ɓwa pà nǝ̀ gandǝ kutio aɓa Ndàmǝgule ɗàng she ɓǝà amǝno yì agir tongno-nong-ɓari màlà yìnǝ́ tanni-twal-là, mǝnana a bu amǝturonjar tongno-nong-ɓari, à malǝna ka.