Ɓwabunda tu-nggyal limurǝm a kùli
1 Anzǝm mǝnia ka, ǝn ok giu kǝla loàsǝ̀ban mala ɓwabundǝa mǝ’làkke kǝ̀rkǝ́r a kùli, à kǝ na ama,
<<Haliluya!
Amsǝban andǝ ɓoarɓwa
andǝ rǝcandǝa ka,
amala Ɓakuli ma’sǝm na.
2 Aɓashi male ka,
kǝ pea aɓa mǝsǝcau
andǝ kpate a nzongnì.
Pàngŋǝ́nì mā-gyatarǝu
mǝgule ɓashi;
yì mā-gyatarǝu ka
nda kiɗiki ɓanza
nǝ ɓealu mǝɓane male
mala gyatarǝu aban
nonggi nǝ aburana ka.
Ɓakuli pángŋǝ́nì wi mǝɓane
a kunì walo mǝnana wal-lú
aguro male ka.>>19:2 Ɓalli gbal aɓa: Nggur 32:43.
3 À nyare à loasǝ già ɗǝm kpǝm ama:
<<Haliluya!
Yele mǝnana kǝ lo aɓa
pi mala mā-gyatarǝu
mǝgule ka,
nǝ̀ nggǝ o a kùli málá male
pà kàm ɗàng!>>19:3 Ɓalli gbal aɓa: Isha 34:10.
4 Aɓwana mǝgule lumi-ɓari-nong-ine andǝ agir-yilǝmu ka, à sarǝa a nzali aban peri a ɓadǝm Ɓakuli mǝnana do amur buno-murǝm ngga. À loasǝ già à bang ama:
<<Ɓǝ̀ do anggo, Haliluya!>>
5 Pǝlǝa ɓè giu pur nǝban buno-murǝm, na ama:
<<Wu ɓwangsǝ Ɓakuli ma’sǝm,
wun aguro male kat,
wun mana wu kǝ ɓanggi wi ka,
twal aban ɓwa mǝkyauwe
aban ká aban ɓwamǝgule!>>19:5 Ɓalli gbal aɓa: Ang 115:13.
Li girlina isǝ ɓwama mala Mǝgam
6 Sǝ ǝn ok ɓè giu ɗǝm, kǝla gì ɓwabundǝa mǝ’kǝ̀rkǝ́r nì aban mak gāwàn, kǝla gì songnǝo mala nggeamùr, sǝ kǝla nggea ime mala mbulo, à kǝ na ama:
<<Haliluya!
Mǝtalabangŋo Ɓakuli
ma’sǝm mana Karban
kat ka,
nda Murǝm ado,
sǝ gìr kat ka,
nda aɓata yálban male.
7 Ɓǝ̀ sǝm pak banɓoarnado
andǝ pakkiɗire,
sǝ ɓǝ̀ sǝm pè wi gulo.
Pwari isǝban mala
Mǝgam yina,
sǝ Māfela male ka,
gilǝkina rǝì.19:7 Ɓalli gbal aɓa: Ang 118:24.
8 À pani wi nggubyau
linǝn mǝɓoarne,
mǝpwasǝe pwapwat,
ɓǝ̀ oasǝ arǝì.>>
Nggubyau linǝn mǝɓoarne ka, nda cam a kúnì atúró mǝɓoarne mala aɓwana mala Ɓakuli ka.
9 Pǝlǝa mǝturonjar banggàm ama, <<Gilǝ cau mǝnia ka: <Tsǝkbu mala Ɓakuli nda amur aɓwana mǝnana à tunǝia aban ká a ban li girlina isǝban mala Mǝgam ngga!> >> Sǝ na ɗǝm ama, <<Amǝnia ka, à nda ka cau mǝ’mǝsǝcaunì mala Ɓakuli.>>
10 Lang ǝn ok cau mǝno ka, kara ǝn kpa a nzali a ɓadǝm mǝturonjar nǝma mǝ nǝ peri a baní. Sǝ yì ka, banggàm ama, <<Awo, kǝa peri a banam ɗàng! Mim ngga mǝ nda ɓiò guro andǝ ɓi guro atà amǝ’eambo amǝkwaɗi, mǝnana à kǝ banggi aɓwana cau amur Yesu ka. Peri a ban Ɓakuli nǝmurǝì ɓǝ̀rɓǝ̀r, acemǝnana bangŋo mala ɓangnǝa nda cau mala Yesu.>>
Yesu puro nǝ̀ ká lwa arǝ aɓwana mala Shetan
11 Pǝlǝa ǝn sǝn kùli mǝna, sǝ ǝn sǝn pǝ̀r mǝpwasǝe aban came kam. Ɓwa mǝnana do a nzǝmi kwakiyi ka, lùllǝì nda Mǝ’mǝsǝcaunì andǝ Mǝɓafoe. Aɓa ɓashiki aɓashi male andǝ munǝki amunǝo male ka, kǝ kpata agir kat a nzongnì.19:11 Ɓalli gbal aɓa: Ezǝk 1:1. 12 Amǝsǝì na kǝla bǝsa mǝnana kǝ earki ka, sǝ a ɓamúrí ka, asukuru-murǝm na kam pas. Ndanǝ lullǝu mǝnana à gilǝì arǝì, sǝ yì nǝmurǝì na súrǝ̀ lullǝuî ka. Kǝ ɓwa pà kàm ɗǝm súrǝì ɗàng.19:12 Ɓalli gbal aɓa: Dan 10:6. 13 Oasǝ nggea-daura mǝnana à parri aɓa nkila ka, sǝ lullǝu mǝnana à tunǝki nǝi ka, nda <<Cau mala Ɓakuli.>> 14 Amǝ’lwa mala kùli, mǝnana à túr adaura pwasǝa mala nggubyau linǝn a rǝia ka, à puro a nzǝm apǝr mǝpwasǝke, sǝ à kǝ yiu atè. 15 A ɓakuni ka, nggeabyau mǝceauwe kǝ puro mǝnana nǝ̀ gandǝna aɓwana nǝi arǝ anzali, mǝnana à mgbikiru ka. <<Nǝ̀ yálmuria nǝ gara-bolo.>>19:15 Ɓalli gbal aɓa: Ang 2:9. Nǝ̀ betǝki aɓi-mǝbura kǝla mǝnana ɓwa nǝ̀ betǝki aɓǝlanggun anap ace kàm mùr-anap ka. Nǝ̀ pàk mǝnia ka ace lǝmdǝ bumlulla mǝcandǝe mala Ɓakuli mana Karban kat ka amur amǝ’ɓealɓikea. 16 Arǝ daura male a ban byali ka, lullǝu nakam à gilǝì ama:
MURƏM MALA AMURƏMA ANDƏ GBANI AMUR AMƏTALA ANZALI.19:16 Ɓalli gbal aɓa: Nggur 10:17; Dan 2:47.
17 Pǝlǝa ǝn sǝn ɓè mǝturonjar mala Ɓakuli aban came amur pwari a kùli. Loasǝ gì bàng-bàng nacau nǝ anyal mǝnana à kǝ yal a bumkuli ka ama: <<Wu yiu! Wu yì ramba ace lìli mǝgule mǝnana Ɓakuli gilǝkice ka.19:17 Ɓalli gbal aɓa: Ezǝk 39:4,17-20. 18 Wu yiu wu yì li nyam amurǝma, andǝ aɓwana amǝcandǝe, andǝ akanggǝrang amǝ’lwa. Wu yiu wu yì li nyam apǝ́r andǝ amǝ’pǝ̀r, nyam aɓwapǝndǝa kat, aguro andǝ aɓwana à dukdo ɓamuria ka, ɓwa mǝkyauwe andǝ ɓwa mǝgule.>>
19 Pǝlǝa ǝn sǝn nyamɓikea, andǝ amurǝma mala ɓanza, andǝ amǝ’lwa malea, à yì ramba a banɓwáná, à nǝ̀ kánǝ lwa arǝ ɓwa mǝno do anzǝm pǝr kwakiyi ka, sǝ arǝ amǝ’lwa male. 20 Sǝ yì nyamɓikea ka, à bwali a tārǝia andǝ mǝɓangnǝa mǝ’nyirì mǝnana pakkiyi agir-ndali ace ka. Nǝ amǝno yì agir-ndali pea ka sǝ ɓosǝki ta aɓwana mǝnana à ak nyoulǝa mala nyamɓikea, sǝ à peri a ban ɓǝ̀nzál male ka. Nyamɓikea andǝ mǝɓangnǝa male mǝ’nyirì, yia kǝm, à túriá nǝ yilǝmia aɓa garang mala bǝsa mǝnana kǝ li nǝ atali ear-bǝsa ka. 21 Amǝ’lwa malea ka, à twaltea kat nǝ nggeabyau mǝceauwe mǝnana kǝ pur a kún ɓwa mǝnana anzǝm pǝr kwakiyi ka. Sǝ adǝkǝlaki yi sulǝo amur aluia, à li gìr mǝnana kárǝìa ka.