1 A ɓabù mǝlì mala Yì ɓwa mǝnana do amur buno-murǝm ngga, ǝn sǝn ɓè malǝmce mana à kǝ̀ karì ka,Malǝmce mǝnana à kǝ karì ka. mǝnana à gilǝ cau kàm ɓālǝi andǝ nzǝmi, sǝ à lanzǝ kúni nǝ agbatali myang arǝ abanì tongno-nong-ɓari ka.* 2 Sǝ ǝn sǝn ɓè nggea kanggǝrang mǝturonjar mala Ɓakuli came loasǝ gì bàng-bàng, aban hama ama,

<<Yana ɓwe kārǝa nǝ fasǝki amyang mǝnia à lanzǝkina kún mǝnia yì malǝmce nǝi ka, sǝ nǝ̀ panzǝi?>>

3 Sǝ ko kǝɓwa pà kàm a kùli, ko a nzali, ko a tà-nzali, mǝnana kārǝa nǝ̀ mǝn mǝnia yì malǝmce, ko nǝ̀ sǝn gìr mǝnana à gilǝì aɓalǝi ka ɗàng.

4 Pǝlǝa ǝn kpa ɓua kǝ̀rkǝ́r, acemǝnana à kum kǝɓwa mǝnana kārǝa nǝ̀ mǝn mǝnia yì malǝmce, ko nǝ̀ sǝn ɓālǝi ka ɗàng. 5 Pǝlǝa mwashat atà aɓwana-mǝgule mǝno lumi-ɓari-nong-ine ka nam ama, <<Pwalo, ce a ɓua ɗàng! Sǝni, ɓwa mǝnana à tunǝki ama Im, a tàu mala Yahuda, sǝ ɗǝm ngga Mǝkà murǝm Dauda na ka, linamurǝm mǝnana tsǝì kārǝ́na nǝ̀ fasǝki amyang-kun yì malǝmce, mǝnana à lanzǝi nǝia ka, sǝ nǝ̀ mǝnni.>>*

6 Pǝlǝa ǝn sǝn Mǝgam mǝnana pa kǝla à pwan-myali ka, nda aban came nǝ ɓaɓalǝu a ban buno-murǝm, sǝ agir-yilǝmu mǝno ine andǝ aɓwana-mǝgule ka, à kàrì aɓalǝu. Ndanǝ anjawe tongno-nong-ɓari andǝ amǝsǝu tongno-nong-ɓari, amǝnana à nda ka bangŋo tongno-nong-ɓari mala Ɓakuli mǝnana à tasǝia arǝ aban kat aɓa ɓanza ka.*

7 Mǝgam nì pǝlǝa yiu yi ak malǝmce nî a bù-mǝlì mala Yì ɓwa mǝnana do amur buno-murǝm ngga. 8 Lang angŋǝna malǝmcenî ka, agir-yilǝmu mǝno ine andǝ aɓwana-mǝgule lumi-ɓari-nong-ine ka, à sarǝa a nzali a ɓadǝm Mǝgam. Koyana ateà ka ndanǝ zangŋan, sǝ à bwal amuna-nkenye bolo-njengǝlan a buia mǝnana à lùmsǝia nǝ muku-gìr ace loasǝ yele mǝ'rǝmɓoarne ka; yì muku-gìr ace loasǝ yele mǝ'rǝmɓoarne ka nda ka ahiwi mala aɓwana mala Ɓakuli.* 9 Pǝlǝa agir-yilǝmu andǝ aɓwana-mǝgule mǝno tù bǝsa nggyal ama:

<<A kārǝ́na wu ak

malǝmce nî,

sǝ wu fasǝki amyang-kuni.

Acemǝnana we ka

à pwan-myalo,

sǝ nǝ nkilio sǝ a akmúr

aɓwapǝndǝa ace Ɓakuli,

aɓa koya kún,

andǝ koya lasǝu,

andǝ aɓwana arǝ

anzali ɗàngɗáng.*

10 A nyésǝnia à

pǝlǝna aɓwana

mǝnana Ɓakuli ma'sǝm

nda murǝm amúrià,

sǝ apǝris ace

pakki wi túró,

sǝ à nǝ̀ duk agbani*

a ɓanza.>>*

11 Lang mǝ ndaban sǝnban ngga, ǝn ok gì amǝturonjar mala Ɓakuli pas. Làkkì malea na á-pas andǝ amilǝyan amur amilǝyan! À gumbǝli buno-murǝm andǝ agir-yilǝmu andǝ aɓwana-mǝgule aɓalǝu.* 12 À loasǝ già a kùli à tu-nggyal ama:

<<Mǝgam mǝnana à

pwan-myali ka,

kārǝ́na ɓǝ̀ ak gara-murǝm,

andǝ kume,

andǝ sǝlǝe, andǝ rǝcandǝa,

andǝ gusǝlǝban,

andǝ ɓoarɓwa,

andǝ ɓwangsǝban!>>

13 Pǝlǝa ǝn ok agir mǝnana kat Ɓakuli pusǝia ka, amǝnana a kùli, andǝa mǝnana a nzali, andǝa mǝnana a tǝta nzali, andǝa mǝnana a tamur ka, andǝ koya gìr mǝnana kat aɓalǝia ka aban ɓwangsǝki Ɓakuli. À tu-nggyal ama:

<<Ɓwangsǝban andǝ gulo,

andǝ ɓoarɓwa,

andǝ rǝcandǝa ka,

ɓǝà pè Yì ɓwa mǝnana

do amur buno-murǝm ngga

sǝ ɓǝà pè Mǝgam,

málá male pà kàm ɗàng!>>

14 Agir-yilǝmu mǝno ine ka, à ear ama, <<Amin, ɓǝ̀ do anggo!>> Sǝ aɓwana-mǝgule ka, à kpa a nzali aban peri.