1 Anzǝm mǝno ka, ǝn sǝn ɓè mǝturonjar pur a kùli sǝ sulǝo aban yiu a ɓanza. Yì ka, ndanǝ rǝcandǝa kǝ̀rkǝ́r, sǝ tǎ mala ɓoarɓwa male tǎ aki ɓanza. 2 Loasǝ gì bàng-bàng nacau ama:

<<Babila kpana!

Mǝno yì nggea-là

mǝgule ka, kpana!

Pǝlǝna ban-do

mala akukwar.

Pǝlǝna mpù mala

koya bangŋo mǝɓane,

andǝ ndá mala

koya nyal mǝɓane,

andǝ ban sǝmbǝrǝa mala

koya nyama mǝɓane,

andǝ mǝnana à ɓinǝce ka.*

3 Aɓwana arǝ anzali kat,

à nùnà mùr-anap

mala nshawari,

andǝ kìɗìkì mala

nonggi nǝ rǝarǝu male,

sǝ walǝnia.

Amurǝma mala ɓanza

nonggina nǝi.

Ace ɓiki earce do male

aɓa banɓoarnado

mala kume ka,

tsǝ̀ngŋǝ̀nà amǝ nggāliki

mala ɓanza à pǝlǝna

amǝ gǝna.>>*

4 Pǝlǝa ǝn ok ɓè giu pur nǝ kuli kǝ na ama:

<<Wu purî ɓālǝi,

wun aɓwana mem.

Wu kǝa oasǝ bu wun aɓalǝ

acauɓikea male ɗàng,

ɓǝ̀ ana raka,

wun nǝ̀ nutanni atè

arǝ agirtanni mǝnana

à nǝ̀ sulǝo amurí ka.*

5 Acauɓikea male ka,

à gwalikina amur rǝarǝia,

à bingŋǝna kùli.

Ɓakuli ɗenyina nǝ atúró

ɓealɓikea male

mǝnana pakkia ka.*

6 Ɓǝà mbweki wi a kúnì,

kǝla mǝnana pàkkî

aɓea ɓwana ka.

Ɓǝà tsǝì ɓǝ̀ mbwe kusǝ ɓari

arǝ agir mǝnana pea ka.

Ɓǝà mbwe ɓǝ̀ nu

nggea mǝɓane mana

lúllô male ka kar mǝnana

pea aɓea ɓwana sǝ à nu ka,

kusǝ ɓari.*

7 Sokkite ɓǝ̀ tāpì aɓa

tanni andǝ bumkiɗikea

kǝla mǝnana pè ɓamúrì

gulo andǝ do mǝɓoarne

aɓa rǝpwala ka.

Kǝ jali a ɓabumi ama,

<Mǝ nda mā-murǝm;

mǝ nda mā-lú ɗàng.

Kǝ gìr pà kàm

nǝ̀ ciem mǝ nǝ pak

bumkiɗikea ɗang.*>

8 Ace mani ka,

agirpatanni mǝnana

à nǝ̀ yinǝi wi nǝ bumkiɗikea,

andǝ nzala,

andǝ lú ka,

à nǝ̀ yiu amurí

aɓa pwari mwashat.

Nǝ̀ yia pi aɓa bǝsa kǝring,

acemǝnana Mǝtalabangŋo

Ɓakuli mǝnana pakkiyi wi

ɓashi ka,

mǝ rǝcandǝa na.>>

9 Amurǝma mala ɓanza mǝnana à kutio aɓa kìɗìkì mala nonggi nǝ rǝarǝu andǝ yi, sǝ à do aɓa banɓoarnado andǝ li mǝɓoarne atè ka, à nǝ̀ ɓua, sǝ à nǝ̀ keban amurí, ɓǝà sǝnǝna yele mala bǝsa mǝnana kǝ pisǝì ka.* 10 Nggea tanni male mǝgule nǝ̀ pea wia ɓangciu kǝ̀rkǝ́r. À nǝ̀ cam kuko, sǝ à nǝ̀ keban amurí ama:

<<Caukwanban!

Caukwanban nǝ we Babila,

nggea-là mǝgule,

la murǝm!

Aɓa bu-pwari mwashat

ɓashi mala Ɓakuli

yi sulǝna a muro!>>

11 Amǝ nggāliki aɓa ɓanza nǝ̀ ɓua, sǝ à nǝ̀ pak bumkiɗikea ace, acemǝnana kǝɓwa ueo kam nǝ̀ kúr agirmâ malea ɗǝm ɗàng.* 12 Agir-mâ mǝnana kúria nǝ boalo kǝ̀rkǝ́r sǝ à ram ngga, à nda ka zǝnariya andǝ azǝrfa, andǝ atali gǝna, andǝ sala-ɓá-nkombo. Aɓea ka à nda ka nggubyau-linǝn, amǝ rǝɓǝlke, andǝa mǝnana amurǝma makkiyi arǝia ka, andǝa mǝnana kúria pa bǝti raka. Aɓea ɗǝm ngga à nda ka agir mǝnana à shària nǝ nggun mǝɓoarne sǝ à hasǝkia wia amuru-mǝrǝmɓoarne ka, andǝ agir mǝnana à tùllia nǝ bolo-bángŋá, andǝ bolo-candǝa ka, andǝ agir mǝnana à ɓakkia nǝ tali mabǝl ka.* 13 Aɓea gir ɗǝm mana kúria ka, à nda ka amuku nggwato-nggun mǝɓoarne mala amǝ Asiya, andǝ amuku agir mǝɓoarne mǝnana à kunǝkiyia amur girlina. Myang-loasǝ-yele mǝ'rǝmɓoarne, andǝ myang pak ɓuri wal rǝkwangya, andǝ myang pak muru-mǝrǝmɓoarne na aɓalǝia. Acilia ka à nda ka mùr-ɓǝlanggun anap, andǝ mùrú nggun-olif, andǝ muku pak bǝredi mǝɓǝlke, andǝ mǝsǝ mǝssa-alkama, andǝ andá, andǝ anzur, andǝ apǝ́r, andǝ awaru-pǝr, andǝ aguro, andǝ ayilǝmi ɓwapǝndǝa. 14 Amǝ nggāliki nǝ̀ bang ama,

<<Agir mǝɓoarne mǝnana

bumo earkiyicea,

sǝ rǝo kǝ ɓǝla arǝia ka,

à umna arǝò kat.

Agirkuma mò kat,

andǝ agir gilǝki rǝǔ mô ka,

à ndǝrmina arǝò kat.

A pa wu nǝ nyare awu nǝ

kumia ɗǝm ɗàng.>>

15 Amǝ nggāliki mǝnana à kurkiyi wi kúró nǝ agir mǝnia, sǝ à kum gǝna malea arǝì ka, à nǝ̀ cam kuko, aɓa ɓangciu arǝ tanni mǝgule mǝnana sulǝo amurí ka. À nǝ̀ ɓua sǝ à nǝ̀ nggǝ keban amurí ama,*

16 <<Cau kwanban,

cau kwanban nǝ Babila,

nggea-là mǝgule!

Ɗiɗyal ka, kǝ oasǝ

anggubyau mā-murǝma

mǝnana à teǎ nǝ

nggubyau-linǝn mǝɓoarne ka.

Kǝ oasǝ agir gilǝki rǝǔ

mǝnana à peǎ nǝ bolo-njengǝlan,

andǝ atali-gǝna,

andǝ agir tà'nzama

mǝɓoarne ka.

17 Ndo ka, aɓa bu-pwari

mwashat,

à kiɗikina nggea kume

mǝgule male kat.>>

Koya mǝkwak waru-bǝsa andǝ aɓwana mǝnana kat à kǝ twal gya aɓa waru a nggeamùr, andǝ amǝtúró ɓá waru, andǝ aɓwana mǝnana kat túróbù ace kum gìr do la malea ka, nda a nggeamùr ka, à cam kuko.* 18 Lang à sǝn yele mala pi mala mǝnia yì nggea-là ka, à loasǝ già à na ama,

<<Ɓè kǝ nggea-là kàm

kǝla mǝnia yì nggea-là

mǝgule ka le?>>

19 À pwan tú sǝ à soe amúrià, sǝ à mak'zwalo aban ɓua andǝ keban ama:

<<Cau kwanban!

Cau kwanban nǝ

nggea-là mǝgule,

ban mǝnana amǝtala

awaru-bǝsa mǝnana

à kǝ gya a nggeamùr,

pǝlǝ amǝkume kàm ngga.

Aɓa bu-pwari mwashat,

kara à kiɗikini.*

20 Wun mǝnana wu

do a kùli ka,

wu pak banɓoarnado amurí!

Wun aɓwana mala Ɓakuli,

andǝ amǝ'mishan,

andǝ amǝ'ɓangnǝa mala Ɓakuli,

wu pak banɓoarnado.

Acemǝnana Ɓakuli

pangŋǝni wi ɓashi

ace kǝ wun.>>*

21 Pǝlǝa ɓè mǝturonjar mǝ'rǝcandǝe imsǝ nggea tali mǝnana gulo male nda kǝla nggea taligo mǝgule ka. Yi túrí aɓa nggeamùr sǝ na ama,

<<Kǝla mǝno ka,

sǝ à nǝ̀ túr nggea-là

Babila aɓa nggeamùr tsulǝm!

Sǝ à pà nǝ̀ nyare

à nǝ̀ sǝni ɗǝm ɗàng.*

22 Agí ka zangŋan

andǝ amǝ'nggyal,

andǝ agí ka ntetu,

andǝ anjawe ka,

à pà nǝ̀ nyare

à nǝ̀ oea ɗǝm

a ɓālǝo ɗàng.

À pà nǝ̀ kum amǝ'túróbù

andǝ koya ulang túróbù

a ɓālǝo ɗǝm ɗàng.

À pà nǝ̀ nyare

à nǝ̀ ok gi gogô

nǝ taligo ɗǝm

a ɓālǝo ɗàng.*

23 Tǎ mala pitǝla pà nǝ̀

nyare nǝ̀ tà ɗǝm

a ɓālǝo ɗàng.

À pà nǝ̀ nyare à nǝ̀ ok

giu banɓoarnado mala

amāfela andǝ abura-māfela

ɗǝm a ɓālǝo ɗàng.

Mǝnia ka pàk anggo

acemana amǝ nggāliki mò,

mǝnana à nda à kútìban kat

ɗiɗyal nǝ rǝcandǝa aɓa

kúrkúró andǝ ram gǝna

a ɓanza ka,

a ciá púp, nǝ́ agir

monzǝo* mô,

à swarkia aɓwana

arǝ anzali kat.*

24 Aɓa nggea-là Babila ka,

à kum nkila mala

amǝ'ɓangnǝa mala Ɓakuli,

andǝ mala aɓwana

mala Ɓakuli,

andǝ aɓwana mǝnana kat

à wal-luia a ɓanza ka.>>*