Akas 5

Nggyal mala Debora andǝ Barak

1 A pwari mǝno ka, Debora andǝ Barak, muna-ɓwabura mala Abinowam, à tù nggyal mǝnia ka:

2 Lang amǝgulo mala Isǝrayila akì aɓwana dǝmba aban ká ka,

aɓwe eare à pà ɓamuria.

Wu ɓwangsǝ Yahweh!

3 Wu ǒ, wun amurǝma!

Wu kwakikir wun, wun amǝgulo!

Mǝ nǝ tùkî Yahweh nggyal.

Mǝ nǝ tù nggyal ɓwangsǝban aban Yahweh,

Ɓakuli mala Isǝrayila.

4 Yahweh, lang a nying ɓá Seyir,

lang a purì ɓá bù-nzali Edom ngga,

nzali gǝggǝli, sǝ bumkuli nya mbulo.

E, apǝrɓang rakki mǝsǝ mbulo.

5 Ankono gǝggǝli aɓadǝm Yahweh,

nggearǝ Saina aɓadǝm Yahweh,

Ɓakuli mala Isǝrayila.

6 Aɓalǝ apwari mala Shamgar, muna-ɓwabura mala Anat,

sǝ ndya ɗǝm aɓalǝ apwari mala Jayel ka,

aɓwana ɗeki kutio arǝ anjar-mǝgule,

sǝ amǝgya kàr arǝ anjar-mǝkarke a nzǝm-la.

7 Aɓwana mala amuna-là mala Isǝrayila yi malâ.

À yi malâ she lang mim, Debora, ǝn lo;

she lang ǝn lo kǝla nggeau a Isǝrayila ka.

8 Lang Isǝrayila twal kpata bǝsa aɓakuli ka,

munǝo kutio a kún nggea-là.

À sǝn ntwangŋo ko nkongŋo kàm

a bù aburana á-lumi-ine mala Isǝrayila le?

9 Ɓabumam o arǝ amǝ’sàrǝ̀ban mala Isǝrayila,

mǝnana à pà ɓamúrià nǝ eare malea aɓalǝ aɓwana ka.

Ɓǝà ɓwangsǝ Yahweh.

10 Wu bangce, wun mǝnana wu kǝ eau a nzǝm amǝdambǝriso-pwasǝa ka,

wun mǝnana wu kǝ do amur agir-do nzǝm pǝr amǝɓǝlke,

sǝ wu kǝ gya amur njargula ka.

11 Wu kwakikir wun arǝ gi ka amǝ’nggyal arǝ abân to mùr;

akano ka à kǝ zǝkice alimurǝm mala Yahweh,

alimurǝm mala amǝ’lwa male a Isǝrayila.

Pǝlǝa aɓwana mala Yahweh sulǝ aban ká arǝ akún nggea-là.

12 Loapi-ntulo, Debora, loapi-ntulo!

Loapi-ntulo, loapi-ntulo, loasǝ nggyal!

Lo-came, Barak!

Bwalki aguro-lwa mô,

we muna-ɓwabura mala Abinowam!

13 Pǝlǝa cili aɓwana-mǝgule mǝnana à ue ka,

à sulǝo à yiu;

aɓwana mala Yahweh sulǝo à yiu aceì,

arǝ akanggǝrang amǝ’lwa.

14 Aɓea aɓwana mala Ifǝrem,

mana tǝrtea pur a Amalek ka,

à yiu atò, we Benjami,

wunǝ amǝ’lwa mô.

Amǝ’sàrǝ̀ban mǝnana à pur a Makir ka,

à sulǝo à yiu;

sǝ amǝnana à kǝ ging nǝ gara mala mǝ’sàrǝ̀ban a buia ka,

à pur a Zebulu sǝ à yiu.

15 Amǝgulo mala Isaka ka,

à nda atà Debora,

kǝla mana Isaka pàk ka, anggo sǝ Barak pa;

à giɓi aban ká aɓa ɓangŋaban a npurota kusǝi.

Aɓalǝ anggǝsan mala Ruben ngga, ɓalkiɓabum na kam.

16 Palang sǝ wu akrǝ wun atà adomwan mala anzur ma’wun,

ace ok twanggi akarinka ace adomwan le?

Aɓalǝ anggǝsan mala Ruben ngga, ɓalkiɓabum na kam.

17 Aɓwana mala Gilǝyat ka à ueo a nkaring Jodan a takuli;

sǝ tàu mala Dan ngga, palang sǝ akrǝi atà awaru-bǝsa?

Tàu mala Asha ka, duk kano ɗǝong a kún nggeamùr,

akrǝi a ban-kpasha mala awaru.

18 Tàu mala Zebulu ka, à nda mǝnana à twal lú a kún buia ka;

anggo gbal sǝ tàu mala Naftali pǎ a kun-munǝo.

19 Amurǝma yiu sǝ à munǝo,

pǝlǝa amurǝma mala amǝ’Kan’ana munǝ a Ta’anak, a kún myalmúr Megido,

sǝ ko à twal kǝ gǝna-lwa mala bolo-azǝrfa ɗang.

20 Anlero munǝ nǝ kuli.

Aɓalǝ anjar-gya malea ka,

à munǝ arǝ Sǝsera.

21 Mùrɓangŋa mala Kishon yi pwania,

mǝno yì mùrɓangŋa mala anza ɓara-ɓara,

yì mùrɓangŋa mala Nggeasala Kishon.

Yilǝmem, fa, kya aɓa rǝcandǝa!

22 Pǝlǝa apǝr [mala Sǝsera] yiu nǝ tswaki,

nkaulakusǝia kǝ tǝmgi nzali,

nǝ tswaki mala apǝr-lwa male.

23 Mǝturonjar mala Yahweh bang ama, <<Sú [Là] Meroz.>>

<<Suban, suban amur aɓwana mǝnana à ndanǝdo kam ngga,

acemǝnana à ginǝ puro ace yiua bwali Yahweh,

ace yiua bwali wi munǝo arǝ akanggǝrang amǝ’lwa.>>

24 Atà amamǝna ka, Jayel mālá Heba ɓwa Ken,

ɓǝ̀ kum tsǝkbu mǝnana kutibani ka.

Atà amamǝna amǝ’do aɓalǝ agumli ka,

ɓǝ̀ kum tsǝkbu mǝnana kutibani ka.

25 Sǝsera zǝmbi wi mùr, sǝ pe wi kiura;

yinǝi wi nǝ kiura mǝbwale aɓa kwar mala amǝgulo.

26 Pǝlǝa lǝmdǝ buì, twal nkpako gumli,

sǝ buì-mǝlì bwal ndolo mala amǝ’túrô.

Pǝlǝa gballì Sǝsera, ar mú ɓamuri;

zuɓi, tusǝ nshekiri.

27 Sǝsera yauwi; kpa a nzali, nong piu;

solǝo kpa a nzali a kusǝi;

a ban mǝnana kpa kam ngga,

akàm sǝ nongŋo, wuna.

28 Nggea Sǝsera soa mǝsǝi aban sǝnban a mǝsǝkurǝm;

cam a nzǝm aferang sǝ keban ama,

<<Palang sǝ waru-pǝr male dǝndi arǝ nyare?

Palang sǝ gǝshi akusǝ apǝr mala waru-pǝr male dǝndi?>>

29 Pǝlǝa amā-gulo male amǝkware pe wi eare;

sǝ yale yì nǝ nggearǝì ka earî ɓamúrì ama,

30 <<À malaká kum gǝna-lwa sǝ à mal gake re?

Ɓwama mwashat ko ɓari ace koya mǝ’lwa,

anggubyau mǝɓoarsǝne atà agǝna-lwa ace Sǝsera,

anggubyau mǝɓoarsǝne mǝnana à teanǝta ka,

nggubyau-koarǝu mwashat ko ɓari,

amǝɓoarsǝne mǝnana à teanǝta ka,

aɓalǝ agǝna-lwa, acem mǝ kô a myalam?>>

31 Acemani ka, aɓio-mǝbura ɓǝà ueɓà, Yahweh,

sǝ aɓwana mana à earceo ka, ɓǝà tǎ

kǝla pwari mana kǝ eauwe aɓa rǝcandǝa male ka.

Anggo sǝ à kum usǝlǝo aɓa nzalinì apǝlǝa lumi-ine.