Ɓalban 13

À tasǝ amǝ’shenzǝban a Kan’ana

1 Yahweh bangcau nǝ Musa ama, 2 <<Tasǝ aburana ɓǝà kya shenzǝ nzali Kan’ana, mǝnana ǝn nggǝ pè amǝ Isǝrayila ka. Aɓa koya tàu mala akeâ ka, à nǝ̀ tasǝ ɓwa mwashat mǝnana múrû na aɓalǝia ka.>> 3 Pǝlǝa Musa tasǝia, à lo a pǝɗanban Paran, kǝla mǝnana Yahweh bang ngga, yia kat ka, amúrû mala amǝ Isǝrayila na. 4 Alullǝia nia ka: A tàu mala Ruben ngga, nda Shamuwa muna-ɓwabura mala Zakkur; 5 a tàu mala Shimiyon ngga, nda Shafat muna-ɓwabura mala Hori; 6 a tàu mala Yahuda ka, nda Kalip muna-ɓwabura mala Jefune; 7 a tàu mala Isaka ka, nda Igal muna-ɓwabura mala Yisǝfu; 8 a tàu mala Ifǝrem ngga, nda Hoshiya*13:8 Hoshiya mǝnia ka nda Musa nggaɗi wi lullǝu ama Jesǝwa ka. muna-ɓwabura mala Nun; 9 a tàu mala Benjami ka, nda Palti muna-ɓwabura mala Rafu; 10 a tàu mala Zebulu ka, nda Gadiyel muna-ɓwabura mala Sodi; 11 a tàu mala Manasa (mǝnana a tàu mala Yisǝfu ka), nda Gaddi muna-ɓwabura mala Susi; 12 a tàu mala Dan ngga, nda Amiyel muna-ɓwabura mala Gemalli; 13 a tàu mala Asha ka, nda Setur muna-ɓwabura mala Makel; 14 a tàu mala Naftali ka, nda Nabi muna-ɓwabura mala Vopsi; 15 a tàu mala Gad ka, nda Gewel muna-ɓwabura mala Maci. 16 Amǝnia ka à nda ka alullǝ aburana mǝnana Musa tasǝia ɓǝà shenzǝ nzalî ka. Sǝ Musa pè Hoshiya muna-ɓwabura mala Nun lullǝu ama Jesǝwa. 17 Musa tasǝia ɓǝà shenzǝ nzali Kan’ana sǝ nea wia ama, <<Wu eauwe, wu kàr nǝ Negev, sǝ wu kya eauwe a nzali múr ankono, 18 sǝ wu sǝn ko lang sǝ nzalî pa, sǝ ko aɓwana mǝnana à do aɓalǝi ka à ndanǝ rǝcandǝa ko amǝ’rǝwukea na, ko à nda kpokyak ko à bundǝo, 19 sǝ ko nzali mana à do aɓalǝi ka mǝɓoarne na ko mǝɓane na, sǝ ko anggea-là mǝnana à do aɓalǝia ka, akàttì na ko akanggǝrang ala na, 20 sǝ ko nzali gǝna na ko nzali tǝle na, sǝ ko anggun na aɓalǝi ko à pà kàm ɗàng. Wu dumnǝ mǝsǝkang-kangŋa wu yinǝ aɓea aɓǝla-nggun mala nzalî.>> Ado ka nda kún tita bangŋa mala aɓǝla-anap. 21 Pǝlǝa à eauwe à wario à kya shenzǝ nzalî nǝ bu pǝɗanban Zin aban ká Rehop, tù nǝ Lebo Hamat. 22 À eauwe à o a Negev sǝ à yiu a Hebǝron. Aɓwana mala atau mala Ahiman, Sheshai, andǝ Talmai, amǝkà Anak ka, à nda kano. (Hebǝron ngga à ɓè, apǝlǝa tongno-nong-ɓari sǝ à yi ɓak Zowan a Masar.) 23 Sǝ lang à yiu a Ɓangŋaban Eshkol ka, à kasǝ bu-nggun nǝ dangŋanshi ɓǝla-anap, sǝ aɓwana ɓari twali arǝ gara; ɗǝm ngga à yinǝ aɓǝla mɓǝring andǝ vwari. 24 Mǝno yì ban ngga à tunǝi ama Ɓangŋaban Eshkol, ace dangŋanshi ɓǝla-anap mǝnana amǝ Isǝrayila kasǝ kano ka.

Bǝlkun mala amǝ’shenzǝban

25 A masǝlǝata anongŋo lumi-ine ka, à nyarî shenzǝ nzalî. 26 Sǝ à yiu aban Musa andǝ Haruna andǝ ɓwabundǝa mala amǝ Isǝrayila a pǝɗanban Paran a Kadesh. À yinǝ cau sǝ à yi bǝlì Musa andǝ Haruna kunia andǝ ɓwabundǝa kat, sǝ à lǝmdǝia wia aɓǝla-nggun mala nzalî. 27 Sǝ à ne Musa ama, <<Sǝm warina a nzali mana a túr sǝm kam ngga. Mur-nyi andǝ kiura kǝ ɓang kam, sǝ mǝnia ka nda ɓǝlanggun male. 28 Sǝama aɓwana mǝnana à do a nzalî ka, amǝ’candǝe na, sǝ anggea-là ka, à gulkio sǝ à kària nǝ asheran. Sǝ ɗǝm ngga, sǝm sǝn amǝkà Anak kàm. 29 Amǝ’Amalek ka, à ndanǝdo a Negev. Amǝ’Hiti andǝ amǝ’Jebus, andǝ amǝ’Amor ka, à do a nzali múr ankono. Sǝ amǝ’Kan’ana ka, à do a kún nggeamùr, sǝ a nkanggari Jodan.>>

30 Pǝlǝa Kalip pwasǝlǝ aɓwana a ɓadǝm Musa, sǝ bang ama, <<Ɓǝ̀ sǝm lo ado ɓǝ̀ sǝm kya ak nzalî, acemǝnana sǝm ndanǝ rǝcandǝa pepè mala limurǝm amurí!>> 31 Sǝ aɓwana mǝnana à wari andǝia ka, à na ama, <<Pà sǝm nǝ̀ gandǝ ká a munǝo arǝ amǝno yì aɓwana ka ɗàng, acemǝnana à kútì sǝm nǝ rǝcandǝa!>> 32 Anggo sǝ à yinǝì amǝ Isǝrayila cau mǝɓane amur nzali mana à kya shenzǝi ka, ama, <<Nzali mana sǝm wari aɓalǝi a shenzǝe ka, nzali na mǝnana kǝ shak aɓwana mǝnana à do aɓalǝi ka, sǝ aɓwana mana kat sǝm sǝnia aɓalǝi ka, à dāh’riki mwat-mwat. 33 Akano ka, sǝm sǝn akwatǝman-aɓwana,*13:33 Ɓalli aɓa: Tite 6:4. amǝ’kà Anak, mǝnana pur a tàu mala akwatǝman-aɓwana ka.*13:33 Ɓalli aɓa: Nggur 2:10-11,20-21. Sǝm sǝn ɓamúr rǝ sǝm abania kǝla adoshi, sǝ anggo gbal sǝ à sǝn sǝm.>>