Ɓalban 8

Tsǝki apitǝla

1 Yahweh ne Musa cau, ama, 2 <<Nacau nǝ Haruna sǝ wu banggi wi ama, <Lang awu nǝ tamsǝki apitǝla ka, tsǝia a njar mǝnana à nǝ̀ nggǝ pâ tǎlaban a ɓadǝm gìr-tàmsǝia ka.> >>

3 Anggo sǝ Haruna pǎ; tsǝki apitǝla à pǝlǝ nǝ ɓadǝm gìr-tàmsǝia, kǝla mǝnana Yahweh banggi Musa ka. 4 Ani sǝ à pàk gìr-tàmsǝ apitǝla: à pè nǝ bolo-njengǝlan mǝnana à walki ka, twal a kusǝì aban ká arǝ nyoulǝa rǝi mala tǒ mala afufe. Anggo sǝ pè kǝla mǝnana Yahweh lǝmdǝì Musa ka.

Lak amǝ’Lawi andǝ tària

5 Yahweh banggi Musa ama: 6 <<Pusǝ amǝ’Lawi aɓalǝa amǝ Isǝrayila sǝ wu leǎ. 7 Ace leǎ ka pàk mǝnia: Watsǝkia wia mùr lakban amúrià; sǝ wu tsǝia ɓǝà mwa nyang mǝnana a rǝia ka kat, sǝ ɓǝà lakki agir’nggūrǝia. Anggo sǝ à nǝ̀ lak ɓamuria. 8 Anzǝm mǝno ka ɓǝà yinǝ jamnda, atārǝia andǝ pàgir mala mǝsǝsa male, mǝnana muku mǝɓǝlke na à zurì nǝ mùrú olif ka; sǝ awu nǝ twal ɓè jamnda a domwan ace pàgir mala gǝshi cauɓikea.*8:8 pàgir mala gǝshi cauɓikea ko pàgir mala lakban;anggo gbal a mǝsǝì 12 9 Pǝlǝa awu nǝ yinǝ amǝ’Lawi aɓadǝm Tara Ban-peri, sǝ wu ram ɓinala amǝ Isǝrayila kat. 10 Lang a yinanǝ amǝ’Lawi aɓadǝm Yahweh ka, pǝlǝa aɓwana-mǝgule mala amǝ Isǝrayila nǝ̀ nongsǝ abuia amur amǝ’Lawi. 11 Pǝlǝa Haruna nǝ̀ yinǝ amǝ’Lawi aɓadǝm Yahweh, ɓǝà do kǝla pàgir mana à loasǝi a kuli mǝnana amǝ Isǝrayila pa, ace mǝnana ɓǝà do aɓa gilǝrǝu ace pak túró mala Yahweh ka.

12 <<Pǝlǝa amǝ’Lawi ka ɓǝà nongsǝ abuia a ɓamur ajamnda, mǝnana mwashat ka nda ace pàgir aban Yahweh mala gǝshi cauɓikea, sǝ ɓè ka nda ace pàgir mala pisǝe kǝring, ace shawuɗi amǝ’Lawi. 13 Awu nǝ tsǝk amǝ’Lawi ɓǝà came aɓadǝm Haruna andǝ amuna-burana male, sǝ awu nǝ tària ɓǝà duk pàgir mǝnana à loasǝi a kuli aban Yahweh ka. 14 Anggo sǝ awu nǝ pusǝ amǝ’Lawi aɓalǝa amǝ Isǝrayila, sǝ amǝ’Lawi ka à nǝ̀ duk amem.

15 <<Anzǝm mǝnana a langŋǝna amǝ’Lawi sǝ a tarnia kǝla pàgir mana à nǝ̀ loasǝi a kuli ka, à nǝ̀ ká ace pàktúró a Tara Ban-peri. 16 À nda ka amǝ Isǝrayila mǝnana à panamia kǝring ngga. Ən twalnia ɓǝà duk amem a kúnì aɓwana mǝnana kat à tita puro a bum ngga, yì amuna-dǝmba aburana mala amǝ Isǝrayila kat. 17 Koya muna-dǝmba muna-ɓwabura a Isǝrayila, ɓwapǝndǝa ko girkusǝu ka, mem na. Lang ǝn wal amuna-dǝmba kat a Masar ka, ǝn taria ace ɓamúràm. 18 Sǝ ǝn twalna amǝ’Lawi a kúnì amuna-dǝmba amuna-burana kat a Isǝrayila. 19 Aɓalǝa amǝ Isǝrayila kat ka, ǝn pana amǝ’Lawi kǝla ɓoro aban Haruna andǝ amuna-burana male ace pàktúró a Tara ban-peri a kúnì amǝ Isǝrayila, sǝ ɓǝà shawuɗia, ace mǝnana ɓǝ̀ ɓekǝ gìr’mur’mwana ɓǝkǝa wal amǝ Isǝrayila ɗàng lang à nǝ̀ gbàshìban ban-mǝfele ka.>>

20 Musa, andǝ Haruna, andǝ ɓinala amǝ Isǝrayila kat pàngnǝ amǝ’Lawi kǝla mana Yahweh banggi Musa ka. 21 Amǝ’Lawi lak ɓamuria sǝ à lakki agir’nggūrǝia. Pǝlǝa Haruna tària kǝla pàgir mǝnana à loasǝi a kuli aɓadǝm Yahweh ka, sǝ shawuɗia ace leǎ. 22 Anzǝm mǝno ka amǝ’Lawi wari ace pàktúró malea aɓa Tara Ban-peri aɓata gingnǝban mala Haruna andǝ amuna-burana male. À pàngnǝ amǝ’Lawi kǝla cau mana Yahweh banggi Musa ka.

23 Yahweh banggi Musa ama, 24 <<Cau mǝnia ka nda arǝ amǝ’Lawi: Ɓwabura mǝnana pǝlǝa male na lumi-ɓari-bwamdǝ-tongno andǝ mana kútì ka nǝ̀ yiu ace pàk túró aɓa Tara Ban-peri. 25 Sǝ lang ɓwabura bingŋǝnà pǝlǝa lumi-tongno ka, nǝ̀ nyingbuì arǝ túró mǝnana pàkiyi pwari-pwari ka, sǝ pà nǝ̀ pàk túró ɗǝm ɗàng. 26 Yì ka nǝ̀ gandǝ bwali amǝ’eambi arǝ pakki atúró malea aɓa Tara Ban-peri, sǝama pà nǝ̀ pàk túrè nǝ nggearǝì ɗàng. Anggo sǝ awu nǝ pàkkî amǝ’Lawi aɓa kasǝia wia atúró mǝnana nda acea ka.>>