Ɓalban 31

Mbweban-tanni amur amǝ Midiyan

1 Sǝ Yahweh nacau nǝ Musa, ama, 2 <<Kyan nǝ mbweban-tanni amur amǝ Midiyan ace gìr mǝnana à pàkkî amǝ Isǝrayila ka.*31:2 amǝ Midiyan ace gìr mǝnana à pàkkî amǝ Isǝrayila ka; ɓalli aɓa: Ɓal 25:1-18. Anzǝm mana a pángŋǝ̀nà mǝno ka, sǝ awu nǝ wǔ a nǝ o atà akeô.>>*31:2 Ɓalli gbal aɓa: Ɓal 20:24-26; 27:13; Nggur 32:50.

3 Pǝlǝa Musa bangcau nǝ aɓwana ama, <<Wu twal aburana aɓalǝ wun ɓǝà mārǝ́ rǝia ace kánǝ lwa arǝ amǝ Midiyan, ace pa mbweban-tanni mala Yahweh*31:3 Ɓalli aɓa: Ang 18:47; 79:10; 94:1; Ir 11:20. amur amǝ Midiyan. 4 Aburana á-mwashat ɓǝà puro a koya tàu mala Isǝrayila sǝ wun nǝ tasǝia aban ká lwa.>> 5 Nda à tàrki aburana á-lum-nong-ɓari (12,000) mǝnana à marǝna rǝia ace lwa ka, aburana á-mwashat a koya tàu mala amǝ Isǝrayila. 6 Sǝ Musa tasǝia ɓǝà kya lwa-lwa, amǝ’lwa á-mwashat a koya tàu, atārǝia andǝ Finehas muna-ɓwabura mala Eleaza pǝris, mǝnana twal atanggǝla mala ban-mǝfele, andǝ anjawe tunǝban ace lwa ka, a buì. 7 À lwa-lwa arǝ amǝ Midiyan, kǝla mana Yahweh banggi Musa ka, sǝ à wal-lú koya ɓwabura. 8 Atà acili aɓwana mǝnana à walia ka, à wal amurǝma mala amǝ Midiyan: Evi, andǝ Rekem, andǝ Zur, andǝ Hur, andǝ Reba, yìa ka amurǝma na tongno mala amǝ Midiyan.*31:8 Ɓalli gbal aɓa: Jes 13:21-22. Sǝ Bil’am muna-ɓwabura mala Beyo*31:8 Ɓalli aɓa: Ɓal 22:5--24:25. gbal ka à wal-luí nǝ nggeabyau. 9 Amǝ Isǝrayila bwalki amamǝna andǝ amuna mǝkeke mala amǝ Midiyan. À pwan adomwan mala andá andǝ anzur andǝ ambul malea, andǝ agirkuma malea kat kǝla gǝna-lwa. 10 À pisǝki alá andǝ abân mǝnana kat amǝ Midiyan duk kam ngga, kat andǝ akàttì malea. 11 À pwan gǝna-lwa kat andǝ aguro-lwa kat, mala aɓwapǝndǝa andǝ agirkusǝu, à umnǝia. 12 À yinǝ aɓwana mǝnana à bwalia kǝla aguro-lwa ka, andǝ akume-lwa aban Musa andǝ Eleaza pǝris, andǝ ɓwabundǝa mala amǝ Isǝrayila, a là-gumli a ɓawanban mala nzali Mowap, a nkanggari nggeasala Jodan a nkaring Jeriko.

13 Musa andǝ Eleaza pǝris, andǝ aɓwana-mǝgule mala ɓwabundǝa puro ace ká kullia anzǝm là-gumli. 14 Sǝ Musa ka pak-bumlulla nǝ amǝgulo mala amǝ’lwa, andǝ aburana mǝnana à nda ka amǝ’sàrǝ̀ban amur á-á mala amǝ’lwa andǝ amana amur gbǝman-gbǝman mala amǝ’lwa, mǝnana à nyàrî lwa ka.

15 Ɗia ama, <<Ace mana sǝ wu nying amamǝna mǝnia ka kat nǝyilǝmu? 16 Kǝ à nda mǝnana à kpata kanigir mala Bil’am*31:16 kanigir mala Bil’am Ɓalli gbal aɓa: Ɓal 24:14; 2Bit 2:15; Sǝn 2:14.*31:16 Ɓalli aɓa: Ɓal 25:1-9. sǝ à tsǝk amǝ Isǝrayila à dumnǝ ɗwanyi-mǝsǝcau arǝ Yahweh atàcau mala Piyor ka re? Yià na à tsǝa sǝ kwánó-twàl-là wal ɓwabundǝa mala Yahweh ka.*31:16 Ɓalli aɓa: Ɓal 25; Nggur 20:18; 2Bit 2:15; Sǝn 2:14. 17 Adyan ngga, wu wal-lú amuna aburana. Sǝ wu wal-lú koya ɓwama mǝnana súrǝ́nà ɓwabura ka. 18 Sǝ amuna mamǝna mǝnana à malaká súrǝ̀ ɓwabura raka, wu ɗekia nǝyilǝmu ace ɓamurǝ wun.*31:18 Ɓalli gbal aɓa: Nggur 21:10-14. 19 Koyan atà wun mǝnana wal-lú kǝɓwa ko je lú ka, dumǝna púp nǝ̀ do anzǝm kàttì ba nongŋo tongno-nong-ɓari. A tàruià nongŋo andǝ tongno-nong-ɓaria nongŋo ka, dumǝna púp wun nǝ̀ lak ɓamur rǝ wun andǝ aguro-ɓwa ma’wun. 20 Sǝ koya gìr’nggūrǝu ma’wun gbal ka wun nǝ̀ le, kat andǝ koya gìr mǝnana à pè nǝ nggú, andǝ koya gìr mǝnana à pè nǝ nyang mbul, andǝ koya gìr mǝnana à pè nǝ nggun ngga.>>

21 Pǝlǝa Eleaza pǝris banggi amǝ’lwa mǝnana à wari a lwa ka, ama, <<Mǝnia ka nda nê mala nggurcau mǝnana Yahweh pè Musa ka: 22,23 Koya gìr mǝnana nǝ̀ gandǝ cambi bǝsa, kǝla bolo-njengǝlan, andǝ bolo-azǝrfa, andǝ bolo-bángŋá, andǝ bolo-candǝa, andǝ bolo-gwan’gwang, andǝ bolo-dànà ka, wun nǝ̀ oasǝi a bǝsa, sǝ nǝ̀ ɓoarnsari. Sǝama dumǝna púp wun nǝ̀ lé nǝ mùr lakban gbal. Sǝ gìr mǝnana kat pà nǝ̀ gandǝ cambi bǝsa raka, wun nǝ̀ lé nǝ mùr mǝno. 24 A tongno-nong-ɓaria pwari ka, wun nǝ̀ lakki agir-nggūrǝu ma’wun, sǝ wun nǝ̀ ɓoarnsari. Anzǝm mǝno ka wun nǝ̀ gandǝ kùtí a kàttì.>>

Gau gǝna-lwa

25 Yahweh banggi Musa ama, 26 <<We wunǝ Eleaza pǝris, wunǝ aɓwana-mǝgule amur aɓala-kàu mala ɓwabundǝa, wu gilǝ koman mǝnana kat à pwani arǝ amǝ Midiyan ngga, kat andǝ aɓwapǝndǝa andǝ agirkusǝu, 27 sǝ wu gau gǝna-lwa arǝ abanì ɓari; banì mwashat ace amǝ’lwa mǝnana à wari a munǝo ka, sǝ ɓè banì ka ace cili ɓwabundǝa. 28 Aɓa gìr mǝnana mala amǝ’lwa na ka, wu pusǝ mwashat aɓa koya gbǝman-tongno mala aguro-ɓwa, andǝ mwashat aɓa koya gbǝman-tongno mala andá, andǝ mala amǝdambǝriso, andǝ mala anzur, andǝ mala ambul, sǝ wu tsǝia ɗàng ace pà cemi aban Yahweh. 29 Twal agir cemi mǝnia mǝnana à pusǝì aɓa kāmbe mala amǝ’lwa ka sǝ wu pe Eleaza pǝris, ɓǝ̀ duk gìr pǎ aban Yahweh. 30 Aɓa kāmbe mǝnana nda ace amǝ Isǝrayila ka, twal mwashat aɓa koya lumi-tongno mala aguro-ɓwa, andǝ mala andá, andǝ mala amǝdambǝriso, andǝ mala anzur, andǝ mala ambul, yì anyam-lǝsǝa kat, sǝ wu pê Amǝ’Lawi mǝnana à pàkkiyi túró ɓá Taragula mala Yahweh ka.>> 31 Nda Musa andǝ Eleaza pǝris pàk kǝla mǝnana Yahweh banggi Musa ka. 32 Cili gir mǝnana ueo aɓa gǝna-lwa mǝnana amǝ’lwa pwan ngga nda:

anzur á-gbǝman-tongno-nong-mwashat nǝ á-lumi-tongno-nong-ɓari nǝ á-tongno (675,000),

33 andá á-lumi-tongno-nong-ɓari nǝ á-ɓari (72,000),

34 amǝdambǝriso á-lumi-tongno-nong-mwashat nǝ á-mwashat (61,000),

35 ansarina mǝnana à malaká súrǝ̀ ɓwabura raka á-lumi-tàrú nǝ á-ɓari (32,000).

36 Sǝ kāmbe mǝnana kútí a bu amǝ’lwa ka:

anzur á-gbǝman-tàrú nǝ á-lumi-tàrú-bwamdǝ-tongno-nong-ɓari nǝ gbǝman-tongno (337,500) na,

37 sǝ cemi mala anzur ace Yahweh ka gbǝman-tongno-nong-mwashat nǝ lumi-tongno-nong-ɓari nǝ mǝsǝi tongno (675) na.

38 Andá ka á-lumi-tàrú-bwamdǝ-tongno-nong-mwashat na (36,000),

sǝ aɓalǝia ka à pusǝ cemi, andá á-tongno-nong-ɓari nǝ mǝsǝi ɓari (72) ace Yahweh.

39 Amǝdambǝriso ka á-lumi-tàrú nǝ gbǝman-tongno na (30,500),

sǝ aɓalǝia ka à pusǝ cemi, amǝdambǝriso lumi-tongno-nong-mwashat nǝ mǝsǝi mwashat (61) ace Yahweh.

40 Aguro-ɓwa ka, á-lum-bwamdǝ-tongno-nong-mwashat na (16,000),

sǝ aɓalǝia ka à pusǝ cemi, aguro-ɓwa lumi-tàrú nǝ mǝsǝi ɓari (32) ace Yahweh.

41 Pǝlǝa Musa pè Eleaza pǝris cemi mǝnia ɓǝ̀ duk pàgir aban Yahweh, kǝla mǝnana Yahweh banggi Musa ka.

42 Kāmbe mǝnana nda ace amǝ Isǝrayila, mǝnana Musa tàrì tsǝì ɗàng nǝ mala amǝ’lwa mana à wari a munǝo, 43 yì kāmbe mala ɓwabundǝa ka nda ani:

anzur á-gbǝman-tàrú nǝ á-lumi-tàrú-bwamdǝ-tongno-nong-ɓari nǝ gbǝman-tongno (337,500),

44 andá á-lumi-tàrú-bwamdǝ-tongno-nong-mwashat (36,000),

45 amǝdambǝriso á-lumi-tàrú nǝ gbǝman-tongno (30,500),

46 ansarina á-lum-bwamdǝ-tongno-nong-mwashat (16,000).

47 Aɓa kāmbe mala amǝ Isǝrayila ka Musa tàrki mwashat-mwashat aɓa koya lumi-tongno mala ansarina andǝ mala agirkusǝu, sǝ kǝla mǝnana Yahweh banggi wi ka, pè Amǝ’Lawi mǝnana à kǝ tsǝkir Taragula mala Yahweh ka.

48 Pǝlǝa amǝgulo mala amǝ’lwa andǝ amǝ’sàrǝ̀ban mǝnana amur amǝ’lwa á-á, andǝ amǝ’sàrǝ̀ban amur amǝ’lwa gbǝman-gbǝman ngga à yiu aban Musa. 49 À banggi wi ama, <<Sǝm aguro mò ka sǝm ɓalna amǝ’lwa mǝnana à wari a munǝo aɓata sǝm ngga, sǝ kǝɓwa pà kàm mǝnana ɓwar aɓalǝ sǝm ngga ɗàng. 50 Sǝ ndya sǝm yinǝi Yahweh ɓoro mala agir njengǝlan mǝnana koyan atà sǝm pwan ngga; ambaga, andǝ agirgarabu, andǝ agirmunabu, andǝ agirkiru, sǝ anlang-ɓamyalu. Mǝnia ka nda ace shawuɗi ayilǝmi sǝm aɓadǝm Yahweh.>>

51 Sǝ Musa andǝ Eleaza pǝris ak agir mǝno kat à tùllia nǝ bolo-njengǝlan ngga a buia. 52 Dǝmbǝrya mala bolo-njengǝlan mǝnana amǝ’sàrǝ̀ban amur amǝ’lwa á-á, andǝ amǝ’sàrǝ̀ban amur amǝ’lwa gbǝman-gbǝman yinǝi sǝ à pà ɓoro nǝi aban Yahweh kat-kat ka, shekel á-lum-bwamdǝ-tongno-nong-mwashat nǝ gbǝman-tongno-nong-ɓari nǝ lumi-tongno na (16,750). 53 Koya mǝ’lwa ka pwan gǝna-lwa ace ɓamurì. 54 Sǝ Musa andǝ Eleaza pǝris ka à ak bolo-njengǝlan mǝno a bu amǝ’sàrǝ̀ban amur amǝ’lwa á-á, andǝ amǝ’sàrǝ̀ban amur amǝ’lwa gbǝman-gbǝman, sǝ à yinǝi aɓa Tara Ban-peri, ace mǝnana ɓǝ̀ duk gìr kasǝɓalǝu*31:54 Ɓalli gbal aɓa: Pur 30:16. aɓadǝm Yahweh ka.