1 Bil’am pǝlǝa bang ama, <<Ɓakkam agyangŋan tongno-nong-ɓari kani; yinǝam nǝ ajamnda tongno-nong-ɓari, andǝ agam tongno-nong-ɓari, sǝ wu gilikiamia.>>

2 Balak pa kǝla mana Bil’am bang ngga; sǝ amur koya gyangŋan ngga, Balak andǝ Bil’am pàgir nǝ jamnda mwashat andǝ gam mwashat.

3 Pǝlǝa Bil’am banggi Balak ama, <<Came a ban pàgir mala pisǝe kǝring mò, sǝ mǝ nǝ o. Yakǝla Yahweh nǝ̀ yiu abanam, sǝ gìr mǝnana kat lǝmdǝàm ngga, mǝ nǝ banggo.>> Pǝlǝa Bil’am o amur ɓè kpakan mgbangban.

4 Ɓakuli yiu aban Bil’am, sǝ Bil’am banggi wi ama, <<Ən gilikina agyangŋan tongno-nong-ɓari, sǝ amur koya gyangŋan ngga, ǝn panagir nǝ jamnda andǝ gam.>>

5 Pǝlǝa Yahweh tsǝk cau a kun Bil’am, sǝ na ama, <<Nyare kya aban Balak, ne wi mǝnia yì cau ka.>>

6 Anggo, sǝ Bil’am nyare, wario kya kum Balak aban came a nkanggari pàgir mala pisǝe kǝring male, andǝ amǝgulo mala Mowap. 7 Sǝ Bil’am ar cau-pasǝlǝe male, ama:

<<Balak, murǝm Mowap yinǝ mim, ǝn pur a Aram

aɓalǝa ankono mǝnana nǝ takuli ka.

Banggam ama, <Yiu, súam Yakupu,

yiu, na mǝɓike arǝ Isǝrayila!>

8 Lang sǝ mǝ nǝ gandǝ sú ɓwa mǝnana Ɓakuli suí raka?

Lang sǝ mǝ nǝ gandǝ na mǝɓike arǝ ɓwa mǝnana Yahweh na mǝɓike arǝì raka?

9 A ɓong atali ǝn nggǝ sǝnia,

amur amgbangban ǝn nggǝ pelǝkia.

Ən nggǝ sǝn nggǝsanì aɓwana mana à tàr ɓamúrià,

sǝ à ɓal ɓamúrià aɓalǝ anzali raka.

10 Yana nǝ̀ gandǝ ɓal tú-nzali mala Yakupu,

ko nǝ̀ súrǝ̀ inea bare làkkì mala Isǝrayila?

Ɗekiam ɓǝn wú, ulang lú mala mǝɓealɓoarna.

Ɓǝ̀ masǝlǝata do mem pǎ kǝla male!>>

11 Pǝlǝa Balak banggi Bil’am ama, <<Mana mǝnia a pàkkam anggo ka? Ən twalo ace mǝnana wu sú aɓiam-mǝbura, sǝ ndya, yale tsǝkbu na a tsǝkia wia ka!>>

12 Pǝlǝa Bil’am, pa eare ama, <<Gìr mǝnana Yahweh tsǝkam a kunam ngga nda dumǝna púp, mǝ nǝ tsǝkiram arǝì, mǝ nǝ bangŋi ka re?>>

13 Pǝlǝa Balak banggi Bil’am ama, <<Ida, yiu atàm, sǝm nǝ̀ ká a ɓè ban, ban mǝnana awu nǝ sǝnia kam ngga. Akano ka awu nǝ sǝn barebania, a pà nǝ sǝnia kat ɗàng. Sǝ wu súkamia.>>

14 Nda Balak twal Bil’am, um nǝi a banfana mala Zofim, a ɓong Nkono Pisga. Ɓak agyangŋan tongno-nong-ɓari kam, sǝ pàgir nǝ jamnda andǝ gam amur koya gyangŋan.

15 Pǝlǝa Bil’am banggi Balak ama, <<Cam kani a nkanggari pàgir mala pisǝe kǝring mò, sǝ mim ngga mǝ nǝ ká akano ace gasǝ sǝnǝ Yahweh.>>

16 Pǝlǝa Yahweh yiu aban Bil’am, sǝ tsǝki wi cau a kúni, sǝ banggi wi ama, <<Nyar aban Balak sǝ wu bang mǝnia yì cau ka.>>

17 Pǝlǝa Bil’am nyar aban Balak, sǝ yi kumi ka nda aban came a nkanggari pàgir mala pisǝe kǝring male, sǝ amǝgulo mala Mowap ka à nda baní. Sǝ Balak ɗì Bil’am ama, <<Mana nda gìr mǝnana Yahweh na ka?>>

18 Pǝlǝa Bil’am ar cau-pasǝlǝe male sǝ na ama,

<<Lo, Balak, sǝ wu ó!

Kwakikiro arǝàm, we muna-ɓwabura mala Zippor;

19 Ɓakuli ka, ɓwapǝndǝa na ɗang, mǝnana nǝ̀ na nyir ka,

sǝ yi ka, muna mala ɓwa na ɗang, mǝnana nǝ̀ nggaɗi kúni ka;

Nanacau, sǝ pà nǝ̀ pè re?

Ko ana raka, bangŋǝna cau, sǝ pà nǝ̀ lùmsǝì re?

20 Sǝni, mim ngga à tsǝkam nzongcau ɓǝn tsǝkbu;

Yì ka tsǝngŋǝnabu, sǝ pà mǝ nǝ gandǝ nggaɗi ɗàng.

21 Kǝ gìr múrɓikea pà kàm à pelǝì aɓa Yakupu ɗàng,

À sǝnma kǝ gìr bumkiɗikea aɓa Isǝrayila ɗàng.

Yahweh, Ɓakuli malea na ateà;

Gāwàn murǝm na aɓalǝia.

22 Ɓakuli pusǝia aɓa Masar;

Yì ka nda kǝla anjawe ndwakan abania.

23 Kǝ ɓuri pà kàm nǝ̀ li arǝ Yakupu ɗàng,

kǝ ɗǐ kàm arǝ Isǝrayila ɗàng.

Adyan ngga à nǝ̀ banggi Yakupu, sǝ à nǝ̀ banggi Isǝrayila

gìr mǝnana Ɓakuli pangŋǝ̀nì ka!

24 Sǝni, à nda ka aɓwana mana à kǝ lo kǝla nggeàɓwaná-im

aɓa gilǝrǝu nǝ̀ kánǝ munǝo;

kǝla mana im kǝ loasǝ rǝì ka,

sǝ pà nǝ̀ nongnǝ-nongŋo ɗang sheɓǝ̀ shanŋǝ̀nà nyama,

sǝ nuna nkila mala nyama mǝnana wal ka.>>

25 Pǝlǝa Balak banggi Bil’am ama, <<Ɓǝ̀ a pà wu nǝ suia raka, ko bǝti, kǝa tsǝkia wia bu ɗàng!>>

26 Pǝlǝa Bil’am pe Balak eare ama, <<Nggearǝì ka, ǝn banggo mbak nǝma, kǝgir mǝnana Yahweh banggam ngga, nda mǝ nǝ pàk ka, re?>>

27 Pǝlǝa Balak banggi Bil’am ama, <<Yiu atàm, mǝ nǝ kánǝ we, a ɓè ban mwashat ɗǝm. Ear ka, nǝ̀ pwasǝbum Ɓakuli, ace mǝnana ɓǝ̀ earô wu suia acem, akano ka.>>

28 Pǝlǝa Balak twal Bil’am, sǝ à eau andǝi amur Nkono Piyor, mana sǝngiyi pǝɗanban ngga.

29 Pǝlǝa Bil’am bang ama, <<Ɓakkam agyangŋan, tongno-nong-ɓari, sǝ wu gilikiam jamnda tongno-nong-ɓari, andǝ agam tongno-nong-ɓari.>>

30 Pǝlǝa Balak pa, kǝla mana Bil’am bang ama ɓǝà pè ka. Pǝlǝa pàgir nǝ jamnda andǝ gam, amur koya gyangŋan.