1 ፆኦሲ ዓሶ ሃይሶ 11

ዳውቴ ዒስራዔኤሌና ዪሁዳ ዓሶናኮ ካኣቲ ማዔሢ

1 ዒስራዔኤሌ ዴራ ቢያ ዳውቴ ኮራ ኬብሮኦኔ ሙካዖ፦ «ኑኡኒ ቢያሢ ኔኤኮ ዒጊኖኬ፤ 2 ቤርታ ሳኣዖኦሌ ካኣታዺ ዓኣንቴታዖ ዒስራዔኤሌ ዴሮ ዖሎም ዔኪ ዓኣዻሢ ኔናኬ፤ ዬያ ሌሊቱዋንቴ ናንጊና ናንጋ ጎዳ ማዔ ኔ ፆኦዛሢ ‹ታኣኮ ዴሮ ዔኪ ዓኣዻንዳሢና ዔያቶኮ ካኣቲ ማዓንዳሢያ ኔናኬ› ጌዒ ኔኤም ኬኤዜኔ» ጌዔኔ። 3 ዬያይዲ ዒስራዔኤሌኮ ሱኡጋ ቢያ ዳውቴ ኮራ ኬብሮኦኔ ሙካዛ፥ ካኣቲ ዳውቴያ ናንጊና ናንጋ ጎዳ ቤርታ ዔያቶና ዎላ ኬብሮኦኔይዳ ጫኣቄኔ፤ ናንጊና ናንጋ ጎዳ ሳሙዔኤሌ ዛሎና ኬኤዜ ቃኣሎ ጎይፆና ዳውቴ ዔያታ ካኣቱሞም ዶኦሚ ዒስራዔኤሌይዳ ካኣታሤኔ።

ዳውቴ ዬሩሳላሜ ዖሊ ባሼሢ

4 ካኣቲ ዳውቴና ዒስራዔኤሌ ዓሳ ጉቤ ዴንዲ ዬሩሳላሜ ካታሞ ዖሌኔ፤ ዒማና ካታሜሎኮ ሱንፃ፦ «ዒያቡሴ» ጌይንታኔ፤ ዒዞ ዓጮይዳ ናንጋዞንሢ ዒያቡሳ ዓሶኬ። ✝11፡4 ዒያ. 15፡63፤ ሱኡጎ. ማፃ 1፡21። 5 ዬና ዓሳ ዳውቴም፦ «ኔ ሃይካ ፔቴታዖ ጌላዓኬ» ጋዓዛ፥ ዳውቴ ጋዓንቴ ፂዮኔይዳ ዔያታ ዋርዲ ዴዔ ቤዞ ዓርቄኔ፤ ዬካፓ ዬና ቤዛ «ዳውቴ ካታማ» ጌይንቲንሢ ዓርቄኔ። 6 ዳውቴ ዒማና፦ «ዒያቡሳ ዓሶ ቢሪ ቤርታዺ ዱኬ ዓሢ ዖሎ ዓሶኮ ሱኡጌ ማዓንዳኔ!» ጌዔኔ፤ ዬያሮ ፄሩያ ናኣዚ፥ ዒዮዓቤ ቤርታዺ ዴንዲ ዒያቡሳ ዓሶ ዱኬሢሮ ዒዚ ዖሎ ዓሶኮ ሱኡጋሢ ማዔኔ፤ 7 ዳውቴ ዴንዲ ዋርዲዮ ቤዛ ጌሊ ዴዔሢሮ ዬና ካታማ «ዳውቴ ካታማ» ጌይንቴኔ። 8 ዳውቴያ ሚሎ ጌይንታ ቤዛፓ ዓርቃዖ ካታሜሎኮ ዙሎ ኬልቂ ዲርቄኔ፤ ሄሊሳዖ ዒዮዓቤያኣ ካታሜሎኮ ዓቴ ዛሎ ኮሼኔ፤ 9 ቢያ ባኮ ዎይሣ ጎዳ ማዔ ፆኦዛሢ ዒዛና ዎላ ማዔሢሮ ዳውቴ ሃቺም ዶዲ ዶዲ ዓኣዼኔ።

ዖሎና ዔርቴ ዳውቴኮ ፖኦሊሶ

10 ዳውቴኮ ዖሎና ዔርቴ ፖኦሊሶ ሱንፃ ሃይካፓ ዴማ ፓይዲንታ ጎይፆኬ፤ ዔያታ ሃንጎ ዒስራዔኤሌ ዓሶና ዎላ ማዒ ናንጊና ናንጋ ጎዳ ዳውቴም ኬኤዜ ዎዞ ቃኣሎ ጎይፆና ዳውቴ ካኣታዻንዳጉዲ፤ ሃሣ ካኣቱማኣ ዶዲ ኮሺ ዔርቴያ ማዓንዳጉዲ ማሄኔ።

11 ቤርታሳሢ ሃኪሞኔ ቶኦኪ ማዔ ያሾብዓሜ ማዓዛ፥ ዒዚያ ዖሎና ዔርቴ ሃይሦንሢኮ*11፡11 ሃይሦንሢኮ ፔቴ ሚናኣ ማፃኣፔ፦ 2ሳሙ. 23፡8ይዳ «ዖሎና ዔርቴ ሃይሢታሚ ዓሲ» ጌዔኔ፤ ዔብሬ ዓሶ ሙኡጮና ሃይሦንታ ሃይሢታሚንታ ፃኣፒንታ ዎዶና ፔቴ ማዔሢሮ ዬኖ ቤዛ ዋኣዺ ጋዓቴያ ዔርቱዋያኬ። ሱኡጋሢኬ፤ ዒዚ ዓይጎ ዎኦቴይ ጌዔቴ ዎርሢ ዔኪ ሃይሦ ፄኤታፓ ዑሣ ማዔ ዓሲና ዎላ ፔቴና ዖልታዖ ዬያቶ ቢያ ዎዼኔ፤ 12 ዒዛ ሄሊሳዖ ሃይሦ ዖሎና ዔርቴዞንሢፓ ፔቴሢ ዓሆሄ ቶኦካፓ ዶዶ ናኣዚ ዓላዜሬኬ፤ 13 ዒዚያ ፒሊስፄኤሜ ዓሳ ዖሎሮ ጊኢጊንቴ ዎዶና ፓስዴሚሜይዳ ዳውቴና ዎላኬ፤ ዒዞ ቤዞይዳ ዔልዓ ሚርጌ ጎሽኮና ጎሺ ዓኣንቴ ዒስራዔኤሌ ፖኦሊሳ ፒሊስፄኤሜ ዓሶ ቤርታፓ ጳሽኬኔ። 14 ጋዓንቴ ዓላዜሬና ዒዛና ዓኣ ዓሳ ዬያ ጎዦ ጋራ ፒሊስፄኤሜ ዓሶ ቃዚ ዖሌኔ፤ ናንጊና ናንጋ ጎዳኣ ዔያቶ ዖሎና ባሺሲሴኔ።

15 ፔቴ ኬሊ ሃይሢታሚ ዖሎና ዔርቴ ፖኦሊሶፓ ሃይሦ ፖኦሊሴ ፒሊስፄኤሜኮ ፖኦሊሳ ራፓይሜ ዶኦጫ ዱንኪ ዴዒ ዓኣንቴ ዳውቴ ናንጋ፥ ዓዱላሜ ዴኖ ዔቶ ኮይላ ዓኣ ላሎ ዴንዴኔ፤ 16 ዳውቴ ዒማና ዋርዲዮ ማላ ጌሜሮይዳ ዓኣንቴ ፒሊስፄኤሜ ፖኦሊሶኮ ዛላ ቤኤቴሌሄሜ ካታሞ ጌሊ ዓርቄኔ። 17 ዳውቴ፦ «ቤኤቴሌሄሜ ጌሎ ዲሮ ካሮ ኮይላ ዓኣ ዋኣፆ ዔታፓ ዑሽኮ ዋኣሢ ዓይጌ ታኣም ዒንጋንዳይ?» ጌይ ዓፃዼኔ። 18 ዬማና ዖሎና ዔርቴ ሃይሦ ፖኦሊሶንሢ ፒሊስፄኤሜ ዓሳ ዓኣ ቤዞይዴና ዓኣዺ ዋኣፆ ዱዖ ዔታፓ ዋኣሢ ዱዒ ዳውቴም ዔኪ ሙኬንቴ፥ ዳውቴ ዑሽካኒ ኮዒባኣሢሮ ዋኣፆ ናንጊና ናንጋ ጎዳም ዒንጎ ባኣዚ ማሂ ሳዓ ላኣሊ፦ 19 «ታኣኒ ሃያ ዋኣፆ ፔቴታዖ ዑሽካዓኬ! ታኣኒ ዑሽኬያ ማዔቴ ዬንሢ፥ ፔ ሼምፓሢ ዒፂ ዴንዴ ዖሎና ዔርቴ ዓሶንሢኮ ሱጉፆ ዑሽኪሢጉዴያኬ!» ጌዔኔ። ዬያሮ ዋኣፆ ዑሽካኒ ዒ ናሽኪባኣሴ፤ ዬንሢ ዖሎና ዔርቴ ሃይሦ ፖኦሊሲንሢ ጫርቂ ማዼ ባካ ዬያኬ።

20 ዒዮዓቤኮ ጌርሲ ዓቢሳ ጎዖሢ ዬንሢ፥ ዖሎና ዔርቴ ሃይሦ ፖኦሊሶንሢኮ ዑፆ ሱኡጋሢኬ፤ ዒዚ ዎርፆ ዓርቂ ሃይሦ ፄኤታ ዓሲ ዎዼሢሮ ዬንሢ፥ ዖሎና ዔርቴ ሃይሦ ፖኦሊሶንሢጉዲ ዔርቴያ ዒ ማዔኔ፤ 21 ዖሎና ዔርቴ ሃይሦንሢጉዲ*11፡21 ሃይሦንሢጉዲ ጋዓዞ ዛሎ፦ ፓይ. 11ይዳ ዛጌ። ማዒ ዒ ፓይዲንቲባኣያ ማዔቴያ ዒ ጫርቂ ማዼ ማዾና ዔያቶይዳፓ ባሼ ጳንጬ ቦንቾ ዴንቄሢሮ ዔያቶኮ ሱኡጌ ማዓኒ ዳንዳዔኔ።

22 ቃብፂዔኤሌ ዓጮይዳ ዮዳሄ ናኣዚ ቤናያ ዖልዚና ዔርቴ ፖኦሊሴኬ፤ ዒዚ ላምዖ፥ ሞዓኣቤ ዓጮኮ ዖሎና ዔርቴ ዓሲ ዎዼሢ ሃሾዛ ሜሌ ሚርጌ ጫርሹሞ ማዾ ማዼኔ፤ ፔቴና ሳዖይዳ ዼኤፒ ሻቺ ኬዲ ሳዖ ባይዜ ኬሊስኬኖ ዒዚ ፔቴ ዴኔ ዔቴ ጌሊ ዞቢ ዎዼኔ፤ 23 ዬያጉዲ ሃሣ ኮሺ ዼኤፒ ዎርሢ ዓርቄያ፥ ዔጳ ዶንጎ ዋዻ ማዔ ዓንዲሪ ጊብፄ ዓሲስኬያኣ ዎዼኔ፤ ዒማና ቤናያ ኩጮይዳ ኮኦሎፓ ዓታዛ ሜሌ ዓንጋሞ ዔኩዋዖ ጊብፄ ዓሢ ባንሢ ሙኪ ጊብፄ ዓሢ ጳርቄስካፓ ጊብፄ ዓሢኮ ዞዓ ዓንዳራሾ ሚፆጉዲ ማዔ ዎርፆ ሳሪ ዔኪ ዒዛና ዎዼኔ። 24 ዬንሢ ሃይሢታሞንሢዳፓ*11፡24 ሃይሢታሞንሢዳፓ ጋዓዞ ዛሎ፦ ፓይ. 11ይዳ ዛጌ። ፔቴሢ ማዔ፥ ቤናያ ጫርቂ ማዼ ባካ ዬያኬ፤ 25 ሃይሢታሞንሢ ባኣካፓ ሚርጌና ዒዚ ዖሎና ዔርቴያ ማዔቴያ ዒ ጫርቂ ማዼ ማዻ ሃይሦ ጫርዦ ፖኦሊሶንሢሲጉዲ ማዒባኣሴ፤ ዳውቴ ፔና ካፓ ዓሶኮ ሱኡጌ ማሂ ቤናያ ዶኦሬኔ።

26-47 ዬንሢ ዖሎና ዔርቴ ሃይሢታሞንሢዳፓ ሜሌ ዖሎና ዔርቴ ዓሶኮ ሱንፃ ሃይካፓ ዴማ ፓይዲንታዞንሢኬ፦

ዒዮዓቤ ጌርሲ ዓሳሄሌ፥

ቤኤቴሌሄሜ ካታሞ ዓሢ ዶዶ ናኣዚ ዔልሃናኔ፥

ሃሮዴ ዓጮ ዓሢ ሻሞቴ፥

ፔሌፄ ዓጮ ዓሢ ሄሌፄ፥

ቴቆዓ ካታሞ ዓሢ ዒቄሼ ናኣዚ ዒራ፥

ዓናቶቴ ካታሞ ዓሢ ዓቢዔዜሬ፥

ሁሻ ዓጮ ዓሢ ሲቤካዬ፥

ዓሆሄ ዓጮ ዓሢ ዒላዬ፥

ኔፆፓ ዓጮ ዓሢ ማሂራዬ፥

ሃሣ ኔፃፓ ዓጮ ዓሢ ባዕና ናኣዚ ሄሌዴ፥

ቢኢኒያሜ ዓጮይዳ ዓኣ ጊቢዓ ካታሞ ዓሢ ሪባዬ ናኣዚ ዒታዬ፥

ፒርዓቶኔ ዓጮ ዓሢ ቤናያ፥

ጋዓሼ ዓጮ ኮይላ ዓኣ ዶኦጮይዳ ሾይንቴ ሁራዬ፥

ዓሬባ ዓጮ ዓሢ ዓቢዔኤሌ፥

ባሁሩሜ ዓጮ ዓሢ ዓዝማዌቴ፥

ሻዓልቦኔ ዓጮ ዓሢ ዔልያህባ፥

ጊዞኔ ዓጮ ዓሢ ሃሼሜ፥

ሃራሬ ዓጮ ዓሢ ሻጌ ናኣዚ ዮናታኣኔ፥

ሃሣ ሃራሬ ዓጮ ዓሢ ሳኮሬ ናኣዚ ዓሂዓሜ፥

ዑሬ ናኣዚ ዔልፓሌ፥

ሜኬሬ ዓጮ ዓሢ ሄፔሬ፥

ፔሎኔ ዓጮ ዓሢ ዓሂያ፥

ቄርሜሎሴ ዓጮ ዓሢ ሄፅሮ፥

ዔዝባዬ ናኣዚ ናዕራዬ፥

ናኣታኣኔ ጌርሲ ዮዔሌ፥

ሃግሪ ናኣዚ ሚብሃሬ፥

ዓሞኦኔ ዓጮ ዓሢ ፄሌቄ፥

ቤዔሮቴ ዓጮ ዓሢ ዒዮዓቤኮ ዖሎ ዓንጋሞ ዔኪ ሃንታ ናህራዬ፥

ያቲሬ ዓጮ ዓሶንሢ ዒራና ጋሬቤና፥

ሂታ ዓሢ ዖሪዮኔ፥

ዓህላዬ ናኣዚ ዛባዴ፥

ሺዛ ናኣዚ ዓዲና፤ [ዬይ ዓሢ ዒዛና ዎላ ሃይሢታሚ ፖኦሊሴ ዓኣያ ማዒ ሮኦቤኤሌ ፃጳፓ ዔርቴ ዓሲኬ፤]

ማዕካ ናኣዚ ሃናኔ፥

ሚታኔ ዓጮ ዓሢ ዒዮሳፒፄ፥

ዓሽቴራ ዓጮ ዓሢ ዑዚያ፥

ዓሮዔኤሬ ዓጮ ዓሢ ሆታሜ ናኣቶ ሻማዕና ዪዒዔኤሌና፥

ቲፂ ዓጮ ዓሢ ሺምሪ ናኣቶ ዪዲዕዔኤሌና ዮሃና፥

ማሃዋ ዓጮ ዓሢ ዔሊዔኤሌ፥

ዔልናዓሜ ናኣቶ ዪሪባሄና ዮሻውያና፥

ሞዓኣቤ ዓጮ ዓሢ ዩትማ፥

ፆባ ዓጮ ዓሶንሢ፦ ዔሌዔሌ፥ ዖቤዴንታ ያዕሲዔሌንታኬ።