1 ፆኦሲ ዓሶ ሃይሶ 18

ዳውቴ ዖሎና ባሼ ባሺፆ

1 ዬካፓ ዻካ ጋዓዖ ካኣቲ፥ ዳውቴ ላሚ ሃሣ ፒሊስፄኤሜ ዓሶ ዖሊ ባሼኔ፤ ዔያቶ ዒ ጊኢሪሼኔ፤ ሃሣ ጋኣቴ ካታሞና ኮይሎይዳ ዓኣ ጉርዶ ፔ ዴማ ማሂ ዔኬኔ፤ 2 ዬያጉዲ ሞዓኣቤ ዓሶዋ ዖሊ ባሺ ፔኤም ጊኢሪሼኔ።

3 ጊንሣ ሃሣ ካኣቲ፥ ዳውቴ ሶኦሪያ ዓጮይዳ ዓኣ ሃማቴ ዓጮ ኮይላ ናንጋ ፆባ ካኣቲ ሃዳድዔዜሬ ዖሌኔ፤ ዒዚ ዬያይዴሢ ሃዳድዔዜሬ ኬዶ ዛሎና ዔፕራፂሴ ዎሮ ኮይሎ ዓጮ ዔካኒ ዖሌሢሮኬ፤ 4 ዳውቴ ዒማና ሃዳድዔዜሬፓ ፔቴ ሺያ ሳርጌላ ዖይታ፥ ላንካይ ሺያ ፓሮና ላማታሚ ሺያ ቶኪና ሃንቲ ዖላ ዖልዚ ዓሲ ዲዒ ዔኬኔ፤ ዒዚ፦ ፔቴ ፄኤታ ሳርጌላ ዖይታ ጎቻንዳ ፓሮ ፔኤም ዓይሳዖ ሃንጎ ፓራሢኮ ቃዎንሢ ቲቄኔ።

5 ዴማስቆይዳ ዓኣ ሶኦሪያ ዓሳ ፆባ ካኣቲ፥ ሃዳድዔዜሬ ማኣዳኒ ዖልዚ ዓሲ ዳኬም ዳውቴ ዔያቶዋ ዖሊ ላማታሚ ላምዖ ሺያ ዖልዚ ዓሲ ዎዼኔ፤ 6 ዬካፓ ዒዚ ዔያቶኮ ዓጮይዳ ዖሎ ዓሳ ዱንኪ ዴዓንዳ ቤሲ ጊኢጊሼኔ፤ ዴራኣ ዒዛም ጊኢራ ጪጊ ዓይሢንቲ ዎርቄኔ፤ ናንጊና ናንጋ ጎዳ ቢያ ቤዞይዳ ዳውቴ ዖሎና ባሻንዳጉዲ ማሄኔ፤ 7 ዳውቴ ሃዳድዔዜሬኮ ዶንዞ ማዔ ቢታንታ ዓኣ ዓሳ ዔኪ ዓኣ ዎርቆና ኮሺንቴ ጊቲሞ ቢያ ዲዒ ዔኪ ዬሩሳላሜ ዓኣዼኔ፤ 8 ዬያጉዲ ሃሣ ሃዳድዔዜሬ ዓጫ ዓኣ፥ ፁቢሃቴንታ ኩኔ ካታሞናይዳፓ ሚርጌ ዺቢ ሞኦና ዓንጊ ዔኬኔ፤ ሴሎሞኔ ጊንፃፓ ዬያ ሞኦኖ ዓንጎና ጌኤዦ ማኣሮይዳ ዓኣ ዼኤፖ ዶኦላሢንታ ቱርቱሮ ማሂ ዔቂሶሢንታ ዱማ ዱማ ሞኦኖ ዓንጎና ኮሺንታ ሜሆ ማዢሴኔ። ✝18፡8 1ካኣቶ. ማ 7፡40-47፤ 2ፆኦሲ. ዓሃኬ 4፡11-18።

9 ዳውቴ ፆባ ካኣቲ፥ ሃዳድዔዜሬኮ ዖሎ ዓሶ ዎዺ ኩርሲ ባሼሢ ሃማቴ ዓጮ ካኣቲ ቶዒ ጎዖሢ ዋይዜኔ፤ 10 ዬያኮ ቤርታ ቶዒ ሃዳድዔዜሬና ዎላ ሚርጌ ዎዴ ዖልቴሢሮ ፔኤኮ ናኣዚ ዮራሜ ዳውቴ ኮራ ዳኬኔ፤ ዒዚ ዳኬሢ ካኣቲ፥ ዳውቴ ዎዚ ዓኣቴያ ዖኦጫንዳጉዲና ዒዚ ዖሎና ሃዳድዔዜሬ ባሼሢሮ «ማዳ ኔ ዎዛዼኔ!» ጌዒ ኬኤዞምኬ። ዮራሜ ዒማና ዳውቴም ዎርቄና፥ ቢራ ዓንጊና ሃሣ ሞኦኖ ዓንጎና ኮሺንቴ ዱማ ዱማ ሜሄ ዒንጎ ባኣዚ ማሂ ዔኪ ዬዔኔ፤ 11 ካኣቲ፥ ዳውቴ ዬያ ሜሆ ዔኪ ዒዚ ቤርታ ዔዶኦሜፓ፥ ሞዓኣቤፓ፥ ዓሞኦኔፓ፥ ፒሊስፄኤሜንታ ዓማሌቄ ዴሮንታፓ ዲዒ ዔኬ ዎርቆ ሜሆንታ ቢሮ ዓንጎንታ ሞኦኖ ዓንጎ ሜሆና ዎላ ካኣዣ ካኣሽኪንታንዳ ሜሄ ማዓንዳጉዲ ፆኦሲም ዱማሴኔ።

12 ፄሩያ ናኣዚ፥ ዓቢሻዬ ዔዶኦሜ ዓሶ ሶኦጎ ዶኦጮ ጌይንታ ቤዛ ዖሊ ባሺ ዔያቶ ባኣካፓ ታጶ ሳሊ ሺያ ማዓ ዖልዚ ዓሲ ዎዼኔ፤ ✝18፡12 ዓይኑ. 60። 13 ዒዚ ዒማና ዔዶኦሜ ዓጮ ጉቤይዳ ዖልዚ ዓሲ ዱንኪ ዴዓንዳ ቤሲ ማዢ ጊኢጊሼኔ፤ ዬኖ ዓጫ ናንጋ ዓሳ ካኣቲ ዳውቴም ጊኢሪ ዎርቃያ ማዔኔ፤ ናንጊና ናንጋ ጎዳ ቢያ ቤዞይዳ ዳውቴ ዖሎና ባሻንዳጉዲ ማሄኔ።

14 ዬያይዲ ዳውቴ ዒስራዔኤሌ ዓጮ ቢያይዳ ካኣታዼኔ፤ ዴራኣ ቢያ ዎዴ ሳዛ ዱማሲሢ ባኣያ፥ ፒዜ ዎጌ ዎጊሢ ዴንቄኔ። 15 ዓቢሻዬኮ ጌርሲ ዒዮዓቤ ዖሎ ዓሶ ዓይሣሢኬ፤ ዬያጉዲ ሃሣ ዓሂሉዴ ናኣዚ፥ ዒዮሳፒፄ ፃኣፒንቲ ጌሢንታ ባኮ ሱኡጌ ማዒ ዛጋያኬ፤ 16 ዓሂፁቤ ናኣዚ ሳዶቄና ዓቢያታሬ ናኣዚ ዓቤሜሌኬና ቄኤሶኬ፤ ሱሳ*18፡16 ሱሳ ጎዖሢኮ ባጎ ሱንፃ ሴራያ ጌይንታያኬ። ጎዖሢ ካኣቱሞ ማኣሮይዳ ፃኣፖ ባኮ ፃኣፓያኬ፤ 17 ዮዳሄ ናኣዚ ቤናያ ዳውቴ ካፓ ፖኦሊሶኮ ሱኡጌኬ፤ ካኣቲ፥ ዳውቴኮ ዓቲንቆ ናኣታ ዓዴ ካኣታዺ ዎይሣኣና ዼኤፒ ዼኤፒ ቢታንቶ ዓኣያ ማዒ ማዼኔ።