1 ፆኦሲ ዓሶ ሃይሶ 27

ዳውቴ ዖሎ ዓሶኮ ሱኡጎ ዶኦሬሢ

1 ሃካፓ ዴማ ዓኣዞንሢ ዒስራዔኤሌ ዓሶኮ ማኣሮ ዓሶ ሱኡጎንታ ዱማ ዱማ ቶኦኮ ዎይሣ ዓሶንታ፤ ዬያጉዲ ሃሣ ካኣቲኮ ማዾ ማዻ ቢታንታ ዓኣ ዓሶኮ ሱንፃ ዎሊ ሄሊ ፃኣፒንቴኔ፤ ዬይያ፦ ሌዖ ጋራ ዓኣ ፔቴ ፔቴ ዓጊኖይዳ ላማታሚ ዖይዶ ሺያ ዓሲ ዎሊ ዑፃ ማዒ ማዻንዳጉዲ ፓቂንቴያ ማዓዛ ዬያ ዱማ ዱማ ፓቂንቴ ዓሶኮ ሱኡጌ ዓኣኔ።

2-15 ፔቴ ፔቴ ዓጊኖይዳ ዬያ ዎሊ ዑፃ ማሆና ዓሶኮ ሱኡጌ ማዔ ዓሶኮ ሱንፃ ሃካፓ ዴማ ፓይዲንቴሢ ጎይፆኬ፤

ቤርታሳ ዓጊኖይዳ ቤርታሲ ፓቂንቴ ፖኦሊሶኮ ሱኡጌ ማዔሢ ዛብዲዔኤሌ ናኣዚ ያሾብዓሜኬ፤ ዒዛ ዴማ ማዔም ዒ ዓይሢ ዎይሣ ፖኦሊሳ ላማታሚ ዖይዶ ሺያኬ፤ ዒዚያ ዪሁዳ ዒጊኖ ዛላፓ ማዔ ፓርሴ ቶኦኪኬ።

ላምዓሳ ዓጊኖና ላምዓሲ ፓቂንቴ ፖኦሊሶኮ ሱኡጋሢ ዓሆሄ ዓሢ ዶዳዬኬ፤ ዒዛ ዴማ ማዔም ዒ ዓይሢ ዎይሣ ፖኦሊሳ ላማታሚ ዖይዶ ሺያኬ።

ዒዛኮ ዴማ ማዒ ዓይሣሢ ሚቅሎቴ ጎዖሢኬ።

ሃይሣሳ ዓጊኖና ሃይሣሲ ፓቂንቴ ፖኦሊሶኮ ሱኡጋሢ፦ ቄኤሳሢ፥ ዮዳሄ ናኣዚ ቤናያኬ፤ ዒዛ ዴማ ማዔም ዒ ዓይሢ ዎይሣ ፖኦሊሳ ላማታሚ ዖይዶ ሺያኬ፤ ዬይ ቤናያ ሃይሢታሚ ዖሎና ዔርቴ ፖኦሊሶኮ ዑፃ ዔርቴያ ማዔ ሱኡጌ ማዔያኬ። ዒማና ዒዛኮ ናኣዚ ዒዛኮ ዴማ ማዒ ዓይሣኔ።

ዖይዳሳ ዓጊኖና ዖይዳሶ ፓቂንቴ ፖኦሊሶኮ ሱኡጋሢ፦ ዒዮዓቤ ጌርሲ ዓሳሄሌኬ። ዬካፓ ዒዛ ቤዞይዳ ዒዛኮ ናኣዚ ዜባድያ ዬያ ፖኦሊሶኮ ሱኡጋሢ ማዔኔ፤ ዒዛ ዴማ ማዔም ዒ ዓይሣ ፖኦሊሳ ላማታሚ ዖይዶ ሺያኬ።

ዶንጋሳ ዓጊኖና ዶንጋሶ ፓቂንቴ ፓኦሊሶኮ ሱኡጋሢ፦ ዪፅሃሬ ዓሢ ሼምሁቴኬ፤ ዒዛ ዴማ ማዔም ዒ ዓይሣ ፖኦሊሳ ላማታሚ ዖይዶ ሺያኬ።

ላሃሳ ዓጊኖና ላሃሶ ፓቂንቴ ፖኦሊሶኮ ሱኡጋሢ ቴቆዓ ዓሢ ዒቄሼ ናኣዚ ዒራኬ፤ ዒዛ ዴማ ማዔም ዒ ዓይሣ ፖኦሊሳ ላማታሚ ዖይዶ ሺያኬ።

ላንካሳ ዓጊኖና ላንካሶ ፓቂንቴ ፖኦሊሶኮ ሱኡጋሢ፦ ዔፕሬኤሜ ፃጳፓ ፔሎ ዓሢ፥ ሄሌፄኬ፤ ዒዛ ዴማ ማዔም ዒ ዓይሣ ፖኦሊሳ ላማታሚ ዖይዶ ሺያኬ።

ሳላሳ ዓጊኖና ሳላሶ ፓቂንቴ ፖኦሊሶኮ ሱኡጋሢ፦ ሁሻ ዓሢ፥ ሲቤካዬኬ፤ ዒዚያ ዪሁዳ ፃጶኮ ዛራ ዜርፃፓኬ፤ ዒዛ ዴማ ማዔም ዒ ዓይሣ ፖኦሊሳ ላማታሚ ዖይዶ ሺያኬ።

ታዞጳሳ ዓጊኖና ታዞጳሶ ፓቂንቴ ፖኦሊሶኮ ሱኡጋሢ፦ ዓናቶቴ ዓሢ ዓቤዔዜሬኬ፤ ዒዛ ዴማ ማዔም ዒ ዓይሣ ፖኦሊሳ ላማታሚ ዖይዶ ሺያኬ።

ታጳሳ ዓጊኖና ታጳሶ ፓቂንቴ ፖኦሊሶኮ ሱኡጋሢ፦ ዛራ ፃጳፓ ኔፆፓ ዓሢ ማሂራዬኬ፤ ዒዛ ዴማ ማዔም ዒ ዓይሣ ፖኦሊሳ ላማታሚ ዖይዶ ሺያኬ።

ታጶ ፔታሳ ዓጊኖና ታጶ ፔታሶ ፓቂንቴ ፖኦሊሶኮ ሱኡጋሢ፦ ዔፕሬኤሜ ፃጶ ዓጮኮ ፒርቶኔ ዓጫ ሾይንቴ፥ ቤናያኬ፤ ዒዛ ዴማ ማዔም ዒ ዓይሣ ፖኦሊሳ ላማታሚ ዖይዶ ሺያኬ።

ታጶ ላምዓሳ ዓጊኖና ታጶ ላምዓሶ ፓቂንቴ ፖኦሊሶኮ ሱኡጋሢ፦ ዖትኒዔኤሌ ቶኦኪ ማዔ ኔፆፓ ዓሢ፥ ሄልዳዬኬ፤ ዒዛ ዴማ ማዒ ዒ ዓይሣ ፖኦሊሳ ላማታሚ ዖይዶ ሺያኬ።

ዳውቴ ዒስራዔኤሌ ዓሶ ፃጶ ሱኡጎ ዶኦሬሢ

16-22 ዒስራዔኤሌ ዓሶ ዎይሣ ሱኡጎ ሱንፃ ሃይካፓ ዴማ ዎሊ ጊንፆ ፓይዲንታ ጎይፆጉዲኬ፦

ሮኦቤኤሌ ፃጶ ዎይሣሢ፦ ዚክሪ ናኣዚ ዔሊዔዜሬኬ፤

ሲሞኦኔ ፃጶ፦ ማዕካ ናኣዚ ሼፓፂያ፥

ሌዊ ፃጶ፦ ቄሙዔሌ ናኣዚ ሃሻቢያ፥

ዓኣሮኔ ፃጶ፦ ሳዶቄ፥

ዪሁዳ ፃጶ፦ ካኣቲ፥ ዳውቴ ጌርሲንሢፓ ፔቴሢ ማዔ ዔሊሁ፥

ዪሳኮኦሬ ፃጶ፦ ሚካዔኤሌ ናኣዚ ዖምሪ፥

ዛብሎኦኔ ፃጶ፦ ዓዲዩ ናኣዚ ዩሽማዕያ፥

ኒፕታኣሌኤሜ ፃጶ፦ ዓዝሪዔሌ ናኣዚ ያሪሞቴ፥

ዔፕሬኤሜ ፃጶ፦ ዓዛዝያ ናኣዚ ሆሴዔ፥

ዓባ ጌላ ዛሎና ዓኣ ሚናኣሴ ፃጶ፦ ፔዳያ ናኣዚ ዒዮዔሌ፥

ዓባ ኬስካ ዛሎና ዓኣ ሚናኣሴ ፃጶ፦ ዛካሪያሴ ናኣዚ ዩዶ፥

ቢኢኒያሜ ፃጶ፦ ዓቤኔሬ ናኣዚ ያዕሲዔኤሌ፥

ዳኣኔ ፃጶ፦ ዪሮሃሜ ናኣዚ ዓዛርዔሌ ዎይሣያ ማዔኔ።

23 ናንጊና ናንጋ ጎዳ፦ «ታኣኒ ዒስራዔኤሌ ዴሮ ጫሪንጮ ዦኦጋሢጉዲ ሚርጊሻንዳኔ» ጌዒ ኬኤዜ ሃጊ ማዓንዳ ዎዞ ቃኣሎጉዲ ካኣቲ፥ ዳውቴ ሌዓ ላማታሚ ማዔያና ዬካፓ ዴማ ማዔ ዓሶ ፓይዳ ዎዶና ዎላ ፓይዲባኣሴ፤ ✝27፡23 ማዢ. ማፃ 15፡5፤ 22፡17፤ 26፡4። 24 ፄሩያ ናኣዚ፥ ዒዮዓቤ ዴሮ ፓይዲ ጋፒሱዋዖ ጎይፃ ሃሼኔ፤ ፆኦሲ ዬያ ፓይዲፆሮ ዻጋዺ ዒስራዔኤሌ ዴሮይዳ ሃይቢ ሄሊሴሢሮ ዬይ ፓይዳ ካኣቲ ዳውቴ ሃይሳ ፃኣፒንታ ማዝጋባ ፃኣፒንቲባኣሴ። ✝27፡24 2ሳሙ. 24፡1-15፤ 1ፆኦሲ. ዓሃኬ 21፡1-14።

ካኣቱሞ ማኣራ ዓኣ ሜሆ ዛጊ ዎይሣ ዓሶ

25-31 ካኣቱሞ ማኣሮይዳ ዓኣ ሜሆ ዛጊ ዎይሣያ ማዔ ዓሶኮ ሱንፃ ዎሊ ጊንፆ ሃካፓ ዴማ ዓኣ ጎይፆኬ፦

ካኣቱሞ ማኣሮይዳ ሜሆ ጌሦ ማኣሮኮ ሱኡጋሢ ዓዲዔኤሌ ናኣዚ ዓዝማዌቴኬ፤

ካታሞይዳ፥ ካታሞኮ ዙሎይዳ፥ ዱማ ዱማ ጉርዶይዳ፥ ዋርዲዮ ቤዞይዳ ዓኣ ካኣቲኮ ሜሆ ጌሦ ማኣሮ ሱኡጋሢ፦ ዑዚያ ናኣዚ ዮናታኣኔኬ፤

ጎዦ ጎሽካ ዓሶ ሱኡጋሢ፦ ካሉቤ ናኣዚ ዔዝሪኬ፤

ዎይኖ ጎዦ ሱኡጋሢ፦ ራማይዳ ሾይንቴ፥ ሺምዒኬ፤

ዎይኖ ዑዦ ጌሦ ማኣሮ ሱኡጋሢ፦ ሼፓሜይዳ ሾይንቴ ዛብዲኬ፤

ዾኦሎ ዛሎ ጌሜሮይዳ ዓኣ ሪሚቶንታ ቦኦቦ ሚፆንታ ሱኡጌ ማዒ ዛጋሢ ጌዴሬይዳ ሾይንቴ ባዓልሃናኔኬ፤

ሪሚቶ ዛይቶ ጌሦ ማኣሮ ሱኡጌ ማዒ ዛጋሢ፦ ዒዮዓሴኬ፤

ሳኣሮኦኔ ቦኦሎይዳ ዓኣ ባኣቶ ሱኡጌ ማዒ ዛጋሢ፦ ሳኣሮኦኔይዳ ሾይንቴ ሺፅራዬኬ፤

ዶኦጮይዳ ዓኣ ባኣቶ ሱኡጌ ማዒ ዛጋሢ፦ ዓድላዬ ናኣዚ ሻፓፄኬ፤

ሱኡጌ ማዒ ጋኣላሢ ዛጋሢ፦ ዒስማዔኤሌይዳ ሾይንቴ ዖቢሌኬ፤

ሱኡጌ ማዒ ሃሮ ዛጋሢ፦ ሜሮኖቴይዳ ሾይንቴ ዬህዲያኬ፤

ማራቶና ዋኣሮና ሱኡጌ ማዒ ዛጋሢ፦ ሃግራ ዓሢ ያዚዜኬ።

ዳውቴ ዞራ ዓሶ

32 ካኣቲ ዳውቴኮ ዓቤ፥ ዮናታኣኔ ዞሮና ጪንጫ ሃሣ ዔራ ዓሲኬ፤ ዒዛና ሃኪሞኔ ናኣዚ ዪሂዔኤሌና ካኣቲኮ ናኣቶ ዔርዛዞንሢኬ፤ 33 ዓኪፆፔሌ ካኣቲ ዞራ ዶንዛሢ ማዓዛ ዓርካይዳ ሾይንቴ፥ ሁሻዬ ካኣቲኮ ላጌኬ፤ 34 ዓኪፆፔሌ ሃይቄስካፓ ዓቢያታሬና ቤናያ ናኣዚ፥ ዪሆያዳዔና ካኣቲ ዞራዞንሢ ማዔኔ፤ ዒዮዓቤ ካኣቲኮ ዖሎ ዓሶ ዓይሣ ሱኡጋሢ ማዔኔ።