1 ዬካፓ ናንጊና ናንጋ ጎዳ ታኣም ሂዚ ጌዔኔ፦ «ሙሴና ሳሙዔኤሌናታዖ ታ ቤርቶ ሺኢኪ ታና ቃይሼቴ ሃያ ዴሮ ታ ማኣራዓኬ፤ ዬያሮ ታ ቤርታፓ ዔያቶ ሺኢሺ ዳኬ። ✝15፡1 ኬሲ. ማፃ 32፡11-14፤ ፓይ. ማፃ 14፡13-19፤ 1ሳሙ. 7፡5-9። 2 ‹ሂዳዎ ኑ ዎካ ዓኣዾንዶዖ?› ጌይ ኔና ዔያታ ዖኦጬቴ፥ ሃያኮ ቤርታ ሂዚ ጌይ ኔ ኬኤዜሢ ዔያቶም ጶቂሤ፤

‹ዎዾንጎ ጌይ ዳኮና ባኮና ሃይቆም ጌይንቴ ዓሳ ዬያና ሃይቃንዳኔ!

ዖልዚና ሃይቆም ጎዖና ዓሳኣ ዖልዚና ሃይቃንዳኔ!

ናይዚና ኩዶም ጌይንቴ ዓሳ ናይዚና ኩዳንዳኔ፤

ዲዒንቲ ዓሲ ኩቺዳ ጌሊ ቱኡቶም ጎዖና ዓሳኣ ዲዒንቲ ዔውታንዳኔ።› ✝15፡2 ዮሃ. ፆፔዻ 13፡10።

3 ታኣኒ፥ ናንጊና ናንጋ ጎዳ ዔያቶይዳ ዖይዶ ፑርታ ባኣዚ ሄላንዳጉዲ ማሊ ቱኬኔ፤ ዬያሮ ዔያታ፦

ዖልዚና ሃይቃንዳኔ፤

ሌዞ ዔያቶኮ ካኒ ጎቻንዳኔ፤

ካፓ ዔያቶኮ ዬያ ዓሽኮ ሙዓንዳኔ፤

ዬያፓ ዓቴሢ ካዮ ቦዓ ሙዓንዳኔ።

4 ሂዚቂያሴ ናኣዚ፥ ሚናኣሴ ዪሁዳይዳ ካኣታዼ ዎዶና ዬሩሳላሜይዳ ዒ ማዼ ፑርቶ ባኮ ዛሎሮ ቢያ ዔያቶይዳ ሄሌ ባኮ ዛሎና ዓጮ ቢያሢዳ ዓኣ ዓሶኮ ዑስካ ዬይ ጌላንዳጉዲ ታ ማሃንዳኔ።» ✝15፡4 2ካኣቶ. ማ 21፡1-16፤ 2ፆኦሲ. ዓሃኬ 33፡1-9።

5 «ናንጊና ናንጋ ጎዳ ሂዚ ጋዓኔ፦

ዬሩሳላሜ ዴሬዮቴ! ዖ ዒንሢ ዛሎ ሚጪንቲ ማላንዳይ?

ዒንሢዳ ማዔ ባኮና ዖኦኒ ዖዪ ዬኤካንዳይ?

ዻካሮታዎ ዔቂ ዬያ ማዔ ባኮ ዛሎ ዖኦጫንዳይያኣ ዖና ናንዳይ?

6 ዒንሢ ታና ሃሼያኣዋይ፤

ጊንሢም ዒንሢ ማዔያዋይ፤

ሃይካፓ ሴካ ታ ዒንሢም ዓቶም ጌይ ማኣራዓኬ፤

ታ ኩጮ ዳኪ ታ ዒንሢ ጋኣጫንዳኔ።

7 ሃኣኮ ዲልባ ዢባሬይዳ ዴንዳሢጉዲ

ሳዔሎይዳ ዓኣ ካታሞ ቢያ ታ ዒንሢ ዜርቄኔ፤

ፑርቶ ማዾ ሃሺ ዒንሢ ማዓኒ ዳንዳዒባኣሢሮ

ዒንሢ፥ ታኣኮ ዴሮ ታ ኩርሴኔ፤

ላኣሎኮ ሾይፆ ታኣኒ ባይዜኔ።

8 ዒንሢ ሳዖይዳ ዓኣ ዓኒንሢ ሃይቄ ላኣሎኮ ሚርጉማ

ባዞ ማኣሻሎፓ ባሻያ ማዓንዳኔ፤

ዓባ ሳዛ ማዒ ዹኡቃኣና ዼጌ ማዔ ዓሶ ዎዴባኣያ ታ ዎዻንዳኔ፤

ዒንዶንሢ ዬያ ዛሎና ሚርጌ ሜቶይዳ ኬዳንዳኔ፤

ዔያቶይዳ ሂርጊሻ ባኣዚና ማሊ ሜታዺሢያ ታ ዳካንዳኔ።

9 ላንካይ ናይ ሾዔ ዒንዴላ

ዼኤፒ ዎዛ ቲቂሢና ዑኡሲ ዔካኒ ባሺንቲ ሜታዺሢዳኬ፤

ሮኦሮ ፖዓ ዒዞም ዹሚ ማዒ ዴዔኔ፤

ሞኦሪንቲሢና ቦርሲንቲና ዒዞም ማዔኔ፤

ሃጊ ሃይቂባኣዖ ሼምፔና ዓኣዞንሢያ

ዔያቶኮ ሞርኮና ታ ዎዺሻንዳኔ፤

ዬያ ጌዔሢ ታና፥ ናንጊና ናንጋ ጎዳኬ።»

10 ታ ዒንዴ፥ ታና ባዴዔ! ታና ኔ ዓይጋ ሾዔይ? ሃኖ ዓጮ ዴሮ ቢያሢና ዎላ ማርሚ ዣሊሢ ታኣም ዒንጊንቴ ባኣዚ ማዔኔ፤ ታኣኒ ሚኢሼ ዖኦማኣ ታልዒባኣሴ፥ ሃሣ ዖ ኮይላፓኣ ታኣኒ ታልዒ ዔኪባኣሴ፤ ጋዓንቴ ዓሲ ታና ቢያ ጋዳንቃኔ።

11 ዬካፓ ናንጊና ናንጋ ጎዳ ሂዚ ጌዔኔ፦ «ጎኔና ኮሺ ማሊሢሮ ታ ኔና ዓውሳንዳኔ፤ ሜቶና ካራ ባይዛ ባኣዚና ሄሌ ዎዶና ሞርካ ቶላኒ ኔና ሺኢቃንዳጉዲ ታ ማሃንዳኔ። 12 ዪሁዳ ዴሬዮቴ! ሞኦና ዓንጊና ዎላ ካንሢ ዹዖና ዓንጊ ሜንሣኒ ዒንሢ ዳንዳዑዋኣሢጉዲ ዓጮኮ ኬዴኖ ዛላፓ ሞርካ ዒንሢ ዖላኒ ጊኢጌሢ ዒንሢ ቃዛኒ ዳንዳዑዋሴ።»

13 ናንጊና ናንጋ ጎዳ ታኣም ሂዚ ጌዔኔ፦ «ዓጬሎይዳ ጉቤ ዒንሢ ማዼ ጎሞ ዛሎና ዒንሢኮ ዓኣ ቆሎና ዓኣ ባኮና ሜሌ ዒንሢም ዒንጎ ባኣዚባኣንቴ ሞርኮም ታ ዔኪ ዒንጋንዳኔ። 14 ታኣኮ ዻጋ ሃይቃኒ ዳንዳዑዋ ታሚጉዲኬ። ዬያሮ ሜሌ ፃንጎ ዓጪዳ ዒንሢ ሞርኮኮ ታ ዒንሢ ዓይሌ ማሃንዳኔ።»

15 ታ ዒማና ሂዚ ጌዔኔ፦ «ናንጊና ናንጋ ጎዳሢዮ! ኔኤኒ ቢያ ባኣዚ ዔራኔ፤ ሃዳራ ታና ማሊ ጶቂሤ፤ ታና ማኣዴ፤ ታና ዳውሳ ዓሶ ኮሜ ኮፄ፤ ኔኤኒ ሚርጌና ጊቢ ዳንዳዓያ ማዒፆና ታና ሞርካ ባይዛንዳጉዲ ሃሺፖ፤ ሃይ ጫዣ ታና ሄሌሢ ኔ ዛላናኬ። 16 ናንጊና ናንጋ ጎዳ ማዔ ቢያ ባኮ ማዤ ፆኦዛሢዮ! ታኣኒ ኔ ሱንፆና ዔኤሊንቴኔ፤ ኔ ኬኤዜ ቃኣላ ሙኪ ታና ሄሌ ዎዶና ጉቤ ዒናፓ ታ ዔኤዒ ዔኬኔ፤ ታ ዒኖና ታኣኒ ሚርጌና ዎዛዼኔ። 17 ዎዛዺ ኮኦሚ ሺራ ዓሶና ዎላ ታ ዒጊንቲባኣሴ፤ ዔያቶና ዎላ ታኣኒ ዎዛዺባኣሴ፤ ኔኤኮ ዻጋ ታጊዳታሢሮ ታኣሮ ሌሊ ታ ዴዔኔ። 18 ሃርጋ ታኣኮ ፖዑዋኣሢ፤ ጊንሣ ሃሣ ኪፃኣ ታኣኮ ፓፂ ዻቁዋኣሢ ዓይጎሮዳይ? ዖጎሢና ሚሚጫ ዎርዚጉዲ ሃጊ ማዓ ዎዛ ኔ ታኣኮ ባይዜንቴሞ?»

19 ናንጊና ናንጋ ጎዳ ታኣም ሂዚ ጌይ ማሄኔ፦ «ታ ባንሢ ኔኤኒ ጎሞ ኔኤኮ ቡኡፂ ማዔቴ፥ ታ ኔና ታ ዓሲ ማሂ ዔካንዳኔ፤ ላሚ ሃሣ ኔኤኒ ታኣም ማዻያ ማዓንዳኔ፤ ጉሪ ማዔ ባኣዚ ኬኤዚ ሃንቲፆ ሃሺ ዓኣፒ ባኣዚ ማዔ ኪኢታ ኔ ኬኤዛያ ማዔቴ፥ ጊንሣ ሃሣ ኔኤኒ ታ ማሊሢ ኬኤዛ ዓሲ ማዓንዳኔ፤ ዴራ ኔ ባንሢ ሙካንዳኔ፥ ኔኤኒ ዔያቶ ባንሢ ዓኣዻዓኬ። 20 ዔያቶ ኔ ቃዛኒ ዳንዳዓንዳጉዲ ሞኦና ዓንጊና ዲርቆና ዲሢጉዲ ታ ኔና ዶዲሻንዳኔ፤ ኔና ማኣዳኒና ዓውሳኒ ታ ኔኤና ዎላ ዓኣሢሮ ፑርታ ባኣዚ ኔጊዳ ዔያታ ማዼቴያ ኔና ዔያታ ባሻዓኬ። 21 ፑርቶ ዓሶፓ ታ ኔና ዓውሳንዳኔ፤ ዓሲም ሚጪንቱዋ ጌኖ ዓሶፓ ታ ኔና ቶሊሳንዳኔ፤ ዬያ ጌዔሢ ታና፥ ናንጊና ናንጋ ጎዳኬ።»