ዔርሚያሴ ማፃኣፖ 28

ዔርሚያሴና ሎንሦ ኬኤዛ ሃናኒያ ጎዖስኬያና

1 ዬኖ ሌዖይዳ፥ ጌይፃ፦ ሴዴቂያሴ ዪሁዳይዳ ካኣታዼንቴ ዖይዳሳ ሌዖኮ ዶንጋሳ ዓጊኖና ጌባዖኦኔ ዓሲ ማዔ ዓዙሬ ናኣዚ፥ ሃናኒያ ጌኤዦ ማኣሮይዳ ታ ኮይላ ሂዚ ጌዔኔ፤ ቄኤሶንታ ዴሮ ቢያሢንታ ቤርታ ሂዚ ጌዔኔ፦ ✝28፡1 2ካኣቶ. ማ 24፡18-20፤ 2ፆኦሲ. ዓሃኬ 36፡11-13። 2 «ዒስራዔኤሌ ፆኦዛሢ ማዔ ቢያ ባኮ ማዤ ጎዳ ሂዚ ጋዓኔ፤ ‹ባብሎኔ ካኣቲ ዓጌ ቃምባሮ ታኣኒ ሜንሣንዳኔ፤ 3 ካኣቲ ናብካዳናፆኦሬ ሃይካፓ ዔኪ ባብሎኔ ዴንዴ ጌኤዦ ማኣሮ ሜሆ ቢያ ላምዖ ሌዔ ጋርካ ሃይካ ማሂ ታኣኒ ዔኪ ዬዓንዳኔ፤ 4 ዬያጉዲ ሃሣ ባብሎኔ ዲዒንቲ ዔውቴ ዴሮና ዎላ ዒዮዓቄሜ ናኣዚ፥ ዪሁዳ ካኣቲ፥ ዒኮኒያ ማሂ ታኣኒ ዔኪ ዬዓንዳኔ፤ ሂዮ! ባብሎኔ ካኣቲ ዒንሢዳ ጌሢ ዎይሣ ቃምባሮ ታኣኒ ሜንሣንዳኔ፤› ዬያ ጌዔሢ ታና፥ ናንጊና ናንጋ ጎዳኬ።»

5 ታኣኒ ዒማና ቄኤሶንታ ጌኤዦ ማኣሮይዳ ዔቂ ዓኣ ዴሮ ቢያሢንታ ቤርታ ሃናኒያም ሂዚ ጌዔኔ፦ 6 «ሂዮ! ኔኤኒ ጌዔ ጎይፆ ናንጊና ናንጋ ጎዳ ማዾንጎ! ጌኤዦ ማኣሮ ሜሆ ዔኪ ሙኪ፤ ጊንሣ ሃሣ ዲዒንቲ ዔውቴ ዓሶዋ ማሂ ዔኪ ሙኪ ናንጊና ናንጋ ጎዳ ኔ ጌዔሢጉዲ ኔ ዻንጎ ኩንሦንጎ። 7 ጋዓንቴ ኔናንታ ዴሮንታም ታ ጋዓሢ ዋይዜ፤ 8 ሚናኣ ዎዶና ታናንታ ኔናንታኮ ቤርታ ፆኦሲ ማሊሢ ኬኤዛኔ ጌይ ዔቄ ዓሳ ሚርጌ ዴሬና ዼኤፒ ዼኤፒ ካኣቶናይዳ ዖልዚ፥ ናይዚንታ ዱማ ዱማ ዶርዖንታ ሙካንዳኔ ጌይ ሎንሦ ኬኤዜኔ፤ 9 ጋዓንቴ ኮሹሞ ዛላ ኬኤዜ ዓሢኮ ዬይ ዓሢ ጎኔ ናንጊና ናንጋ ጎዳ ዳኬ፥ ሎንሦ ኬኤዛ ዓሲታቴ ዔርታሢ ዬይ ዒ ጌዔ ሎንሦ ባካ ጎኔ ማዒ ኩሜቴኬ።»

10 ዬካፓ ሎንሦ ኬኤዛሢ፥ ሃናኒያ ታኣኮ ባቃና ዓኣ ቃምባሮ ዔኪ ሜንሤኔ፤ 11 ዒዚ ዒማና ዴሮ ቤርታ፦ «ላምዖ ሌዔ ጋርካ ባብሎኔ ካኣቲ፥ ናብካዳናፆኦሬኮ ዴሮይዳ ዒ ዓጌ ቃምባሮ ባቃናፓ ዔኪ ሃማይዲ ናንጊና ናንጋ ጎዳ ሜንሣንዳሢ ኬኤዜኔ» ጌዔኔ፤ ዬካፓ ታኣኒ ዬኖ ቤዛፓ ዴንዴኔ።

12 ሎንሦ ኬኤዛሢ፥ ሃናኒያ ቃምባሮ ታ ባቃናፓ ዔኪ ሜንሣዛ ናንጊና ናንጋ ጎዳ ታኣም ሂዚ ጌይ ኬኤዜኔ፦ 13 «ዴንዴ! ሃናኒያም ሂዚ ጌይ ኬኤዜ፦ ‹ኔኤኒ ሃሢ ሚፆ ቃምባሮ ሜንሤኔ፤ ጋዓንቴ ታኣኒ ዬያ ቤዞይዳ ዓንጊ ቃምባራ ጊኢጊሻንዳኔ፤ 14 ሃያ ዴሮ ቢያሢ ባቃኖይዳ ዓንጊ ቃምባራ ታኣኒ ዓጋንዳኔ፤ ዔያታ ባብሎኔ ካኣቲ፥ ናብካዳናፆኦሬም ዎርቃንዳኔ፤ ዬይ ዓሳ ዓታዛ ካዮ ቦዓታዖ ቢያ ዒዛም ዓይሢንቲ ዎርቃንዳጉዲ ታ ማሃንዳኔ፤› ታኣኒ፥ ዒስራዔኤሌ ፆኦዛሢ ማዔ ቢያ ባኮ ማዤ ጎዳ ዬያ ጌዔኔ።»

15 ታኣኒ ዬያ ሃናኒያም፦ «ሃናኒያ! ዋይዜ፤ ናንጊና ናንጋ ጎዳ ኔና ዳኪባኣሴ፤ ሃያ ዴሮ ቢያ ሉኡዚ ማዔ ባኣዚ ጉሙርቃንዳጉዲ ኔ ማሄኔ፤ 16 ዬያሮ ናንጊና ናንጋ ጎዳ፦ ‹ኔና ታኣኒ ሳዖይዳፓ ዔኪ ሺኢሻንዳኔ፤ ሃይ ዴራ ታና፥ ዔያቶኮ ፆኦዛሢም ዋይዞ ዒፃንዳጉዲ ኔ ማሄሢሮ ሃይ ሌዓ ጋፑዋንቴ ኔኤኒ ሃይቃንዳኔ› ጋዓኔ» ጌይ ኬኤዜኔ።

17 ዬካፓ ሃናኒያ ዬኖ ሌዖኮ ላንካሳ ዓጊኖና ሃይቄኔ።