ዔርሚያሴ ማፃኣፖ 5

ጉሙርቂንታ ዓሲና ፒዜ ዓሲናኮ ባይሱሞ

1 ዒስራዔኤሌ ዴሬዮቴ!

«ሂንዳ ዬሩሳላሜ ካታሞኮ ጎይፆ ጎይፆ ሃንቲ ዛጉዋቴ!

ፒዜ ዎጌ ዎጋያና ጎኑሞ ኮዓ ዓሲ ፔቴታዖ ዒንሢ ዴንቃንዳ?

ሂንዳ ዓሳ ቡካ ጶኦካ ኮዑዋቴ!

ዒንሢ ዴንቄያ ማዔቴ ታኣኒ ዬሩሳላሜ ማኣራንዳኔ።

2 ‹ናንጊና ናንጋ ጎዳ ሃይቆ!› ጌይ ዒንሢ ጫኣቃኔ፤

ጋዓንቴ ዒንሢ ጫኣቃሢ ሉኡዙሞናኬ።»

3 ናንጊና ናንጋ ጎዳሢዮ! ዓኣፓ ኔኤኮ ጎኔ ባኣዚ ዴንቃያቱዋዓዳ?

ኔ ዔያቶ ሃርጌና ጳርቄኔ፤ ዔያታ ጋዓንቴ ዔኤቢኬ ጌይባኣሴ፤

ኔ ዔያቶ ጋኣጬኔ፤ ዔያታ ፔ ዻቢንታፓ ዔራኒ ኮዒባኣሴ፤

ዋይዚ ዒፂ ዒኖ ዔያታ ዶዲሼኔ፤ ጎማፓ ዔያታ ማዓኒ ዳንዳዒባኣሴ።

4 ዬካፓ ታኣኒ፦

«ዔያቶ ፆኦዛሢኮ ዎጎ ዔያታ ዔሪባኣሢሮ

ናንጊና ናንጋ ጎዳኣ ዓይሣ ጎይፆ ሃንቱዋኣሢሮ

ሃይ ዓሳ ማንቆ፥ ማሊያ ጶቂሡዋያ፥ ቤልፃኬ።

5 ዓካሪ ታኣኒ ቢቲ ማዒ ዎይሣ ዓሶ ኮይላ ዴንዲ

ዔያቶና ዎላ ጌስታንዳኔ፤

ዔያታ ናንጊና ናንጋ ጎዳኮ ጎይፆና ዔያቶ ፆኦዛሢኮ ዎጎዋኣ ዔራያዋይ»

ጌይ ማሌኔ።

ጋዓንቴ ዔያታኣ ሃንጎ ዓሶ ማዒ ዴዔኔ፤

ፆኦሲም ዓይሢንቶዋ ኮይባኣሴ።

6 ዴራ ፆኦሲኮ ዎጎ ዓይሢንቲ ኩንሦ ሚርጌ ዎዴ ዒፂ፥ ዺቢ ጎሜ ማዼኔ፤

ዬያሮ ዔያቶኮ ሞርካ ካይዚፓ ኬስካ ዞቢጉዲ

ሃሣ ዳውሌ ያኣዮጉዲ ዔያቶይዳ ሜቶ ሄሊሳንዳኔ፤

ዬያታ ሞርካ ካታሞ ሙኪ ካቲ

ዬካፓ ኬስካ ዓሶ ቢያ ማኣኪጉዲ ቡኡጪ ቡኡጪ ሾኦላንዳኔ።

7 ናንጊና ናንጋ ጎዳ ሂዚ ጋዓኔ፦

«ታኣኮ ዴራ ታና ሃሺ ሉኡዚ ማዔ ፆኦዞ ካኣሽካኔ፤

ሂዳዖ ታኣኒ ዔያቶኮ ጎሞ ዓቶም ጋዓንዳሢ ዓይጎ ዛላዳይ?

ታኣኒ ታ ዴሮም ኮይሳ ሙኡዚ ቢያ ዒንጊ ሚሼኔ፤

ዔያታ ጋዓንቴ ዞኦስካ ኮኦማያ ማዔኔ፤

ዔያቶኮ ዎርቆ ማኣራ ዞኦዛ ኮኦማ ላኣሎ ማኣሮ ማዔኔ።

8 ማርካ ሙኡዚ ዲቾና ፓሮጉዲ ላኣሊ ሱኡኬና ዔያታ ሜታዼኔ፤

ፔቴ ፔቴሢ ፔኤኮ ላጎ ላኣሎ ዓርቂ ዓማላኒ ኮዓኔ።

9 ዬያሮ ታኣኒ ዔያቶይዳ ሜቶ ዓጋንዳያ ታኣም ኮይሱዋዓዳ?

ዬያጉዴ ዋይዞ ዒፃ ዴሮ ታኣኒ ኮሜ ኮፃኒ ዳንዳዑዋዓዳ?

10 ታ ዴሮኮ ዎይኖ ቲቂ ቲቂ ፑርቲሳንዳ ሞርኬ ታኣኒ ዳካንዳኔ፤

ጋዓንቴ ዎይኖኮ ፃጶ ቱጊ ታ ባይዚሳዓኬ፤

ካኣፓ ታኣሮቱዋኣሢሮ

ቲቂ ዔያታ ኬኤራንዳጉዲ ታ ዓይሣንዳኔ።

11 ዒስራዔኤሌና ዪሁዳና ዴራ ጋፒ ታኣም ዋይዞ ዒፄኔ፤

ዬያ ጌዔሢ ታና፥ ናንጊና ናንጋ ጎዳኬ።»

ናንጊና ናንጋ ጎዳ ዒስራዔኤሌ ዴሮ ሃሼሢ

12 ናንጊና ናንጋ ጎዳ ዴራ ዒዛይዳ ሉኡዙሞና ሂዚ ጌይ ጌስቲሢ ዓርቄኔ፦ «ናንጊና ናንጋ ጎዳ ኑና ፔቴታዖ ዔኤቢ ዎኦታዓኬ፤ ፑርታ ባኣዚያ ኑና ሄላዓኬ፤ ዖልዚንታ ናይዚንታ ሙካዓኬ፤ 13 ናንጊና ናንጋ ጎዳ ዔኤቢ ኬኤዚባኣ፥ ዒዛ ማሊፆ ኬኤዛ ዓሳ ኬኤዛ ባካ ቢያ ዢባሬጉዲታሢሮ ዔያታ ኬኤዜ ባካ ቢያ ዔያቶ ሄላንዳኔ።» 14 ቢያ ባኮ ዎይሣ ጎዳ፦ «ዔርሚያሴ! ዴራ ያዺ ጌዔሢሮ ታኣኮ ቃኣላ ኔ ዻንጎይዳ ታሚ ማዓንዳኔ፤ ዬካፓ ዴራ ሃንፂሌ ማዔም ዬይ ታማ ዔያቶ ሙዓንዳኔ» ሂዚ ጌይ ታኣም ኬኤዜኔ።

15 ዒስራዔኤሌ ዴሬዮቴ! ናንጊና ናንጋ ጎዳ ዒንሢዳ ሜቶ ሄሊሳንዳ ዓሲ ሃኬ ዓጪፓ ዔኪ ዬዓንዳኔ፤ ዬይ ዴራ ዻንጎ ዔያቶሲ ዒንሢ ዔሩዋያ፥ ጌስታ ጌኤዞዋ ዒንሢ ዔሪ ዔኪንዱዋያ፥ ሚናኣ ዓሲ ማዔ ዶዲ ዴሬኬ። 16 ሂኢዦና ዒንሢ ዱካንዳ ዓሳ ሚጪንቱዋዖ ዎዎዻ ዶዲ ዖልዚ ዓሲኬ። 17 ዒንሢኮ ሃኣኮንታ ሙዖንታ ቢያ ፒፂ ሙይ ባይዛንዳኔ፤ ዓቲንቆንታ ዉዱሮ ናኣቶንታ ዒንሢኮ ቢያ ዔያታ ዎዻንዳኔ፤ ማራቶንታ ባኣቶንታ ቢያ ዒንሢኮ ዔያታ ሹኪ ሙዓንዳኔ፤ ዎይኖንታ ቤሌሶ ሚፆንታኮ ዓኣፖ ሙይ ባይዛንዳኔ፤ ዬይ ዖሎ ዓሳ ዒንሢ ጉሙርቃ፥ ኬኤሎ ዲፆና ዲርቂንቴ ካታሞ ቢያ ዒንሢኮ ሻሂ ዶይሳንዳኔ።

18 ናንጊና ናንጋ ጎዳ ሂዚ ጋዓኔ፦ «ዬይ ቢያ ማዓኣና ዬንሢ ኬሎንሢዳ ታኣኮ ዴሮ ጋፒሲ ታ ባይዛዓኬ፤ 19 ዔርሚያሴ! ዴራ፦ ‹ናንጊና ናንጋ ጎዳ ሃያ ቢያ ኑጊዳ ዔኪ ሙኬሢ ዓይጎሮዳይ?› ጌይ ዖኦጫ ዎዶና ታና ዔያታ ሃሺ ፔ ዓጮይዳ ሜሌ ፆኦዞ ካኣሽኬማጉዴያ ዔያታ ፔ ቶኦኪና ዔያቶሮ ማዒባኣ ዓጪ ዴንዲ ፃንጎ ዴሬኮ ዓይሌ ማዒፃ ዓቲንዱዋኣሢ ዔያቶም ኬኤዜ።»

ናንጊና ናንጋ ጎዳ ዴሮም ላቲ ኬኤዜ ባኮ

20 ናንጊና ናንጋ ጎዳ ሂዚ ጋዓኔ፦ «ያይቆኦቤ ዜርፆም ሃያ ዋይዚሱዋቴ፤ ዪሁዳ ማኣሮማኣ ሂዚ ጌይ ዒላቲ ኬኤዙዋቴ፤ 21 ዒንሢ ዓኣፒ ዓኣንቴ ዴንቁዋ ዓሳ፥ ዋይዚ ዓኣንቴ ዋይዙዋ ዓሳ፤ ዒንሢ ዔኤያ፥ ሃሣ ዋይዚ ዒና ዔኩዋ ዴራ! ሃያ ዋይዙዋቴ። ✝5፡21 ዒሲ. 6፡9-10፤ ሂዚ. 12፡2፤ ማር. 8፡18። 22 ታኣኒ ናንጊና ናንጋ ጎዳኬ፤ ሂዳዖ ታና ዒንሢ ዎይታዛ ቦንቹዋይ? ታ ቤርታ ዒንሢ ዎይታዛ ዒጊጪ ጎጋይቁዋይ? ማኣሻሎይዴና ዋኣፃ ሶፒ ዴንዱዋጉዲ ናንጊና ዼኤፖ ባዞኮ ዓጮ ዴኔ ማሂ ኮሼሢ ታናኬ፤ ዬይ ዼኤፖ ባዛ ዎዚ ዓጊፄቴያ፥ ባዞ ጉዳሢንታ ዢባሮንታ ዋኣፆ ዴቼቴያ፥ ጉኡሜቴያ ዬያ ዛጲ ማዒ ዓኣ ማኣሻሎ ዴኖይዴና ሶፒ ዴንዳኒ ዳንዳዑዋሴ። ✝5፡22 ዒዮ. 38፡8-11። 23 ዒንሢ ጋዓንቴ ዋይዚ ዒፃያ ፑርታ ዴሬ ማዔሢሮ ታና ዒንሢ ሃሺ ቤቴኔ። 24 ሌዖ ዒሮንታ ሲሎ ዒሮንታ ዎዶና ዒንሢም ዒንጋሢ፥ ሌዖ ጎሽኮ ዎዶዋ ሌዓ ሌዓ ዔኪ ሙካሢ ታናኬ፤ ዒንሢ ጋዓንቴ ታና ቦንቾ ዒፄኔ። 25 ዒንሢኮ ዻቢንታ ዓንጆ ዒንሢኮ ባይዜኔ፤ ዒንሢኮ ጎሞ ዺቡማ ኮሺ ባኣዚ ዴንቁዋጉዲ ዒንሢ ላኣጌኔ።

26 «ታ ዴሮ ባኣካ ናንጋ ፑርታ ዓሲ ዓኣኔ፤ ዬና ዓሳ ፒሮና ካፒ ዓርቃ ዓሲጉዲኬ፤ ዬያሮ ዔያታ ዓሲ ዓይሣኒ ፒራሢ ሱዞ ጊኢጊሺ ካታኔ። 27 ኬሞ ዓሲ ካፒ ዓርቃዖ ጌሦ ቤሲዳ ቡኩሲ ጌሣሢጉዲ ዔያታ ፔኤኮ ማኣሮ ዓሲዳፓ ቡሪ ዔኮ ባኣዚና ኩንሣኔ፤ ዔያታ ዶዲ፥ ሃሣ ዖርጎቺ ማዔሢ ዬያሮኬ። 28 ዔያታ ጋርካ ቃዚ ሙኡዞና ቡዋጉዲ ማሌኔ፤ ዔያታ ማዻ ፑርቶ ማዾኮ ሃይማኬ ጌይንታ ባኣዚ ባኣያኬ፤ ዜኤሮ ናኣቶ ዛሎ ዔያታ ዔቂ ጌስቱዋሴ፤ ማንቆ ዓሶም ፒዜ ዎጌ ዔያታ ዎጉዋሴ።

29 «ዬያሮ ታኣኒ፥ ናንጊና ናንጋ ጎዳ ዬያ ባኮ ቢያሢሮ ዔያቶይዳ ሜቶ ዓጋንዳያ ታኣም ኮይሱዋዓዳ? ዬያጉዴ ዴሮ ኮሜ ኮፂፃ ታኣም ፒዜቱዋዓዳ? 30 ዑስካ ጌላያና ዲቃሣያ ማዔ ባኣዚ ሃኖ ሳዖይዳ ማዺንቴኔ። 31 ‹ፆኦሲ ማሊሢ ኑ ኬኤዛያኬ› ጋዓ ዓሳ ሉኡዙሞና ኬኤዛኔ፤ ቄኤሳ ዬይ፥ ፆኦሲ ማሊፆ ኬኤዛ ዓሳ ዞራ ዞሮና ዎይሣኔ፤ ዴራ ዬያ ባኮ ቢያ ዒፂ ማኩዋሴ፤ ዓካሪ ዬያ ቢያ ባኮኮ ጋፒንፃ ሙካኣና ዒንሢ ዓንኮ ጌላንዳይ?»