ዔርሚያሴ ማፃኣፖ 22

ዔርሚያሴ ዪሁዳ ዓጮ ካኣቲ ማኣሮ ዓሶም ኬኤዜ ቃኣሎ

1,2 ዳውቴ ዜርሢ ማዔ፥ ዪሁዳ ካኣቲ ናንጋ ማኣሮ ዎቲ ካኣቲንታ ካኣቲ ቢታንቶ ዒንጌ ዓሶንታ ዬሩሳላሜይዳ ናንጋ ዴሮንታም ሂዚ ጌይ ታኣኒ ኬኤዛንዳጉዲ ናንጊና ናንጋ ጎዳ ታና ዓይሤኔ፦ 3 «ታኣኒ፥ ናንጊና ናንጋ ጎዳ ፒዜ ዎጌና ጎኔ ማዔ ባኣዚ ዒንሢ ማዻንዳጉዲ ዓይሣኔ፤ ፔቴይ ባጋሢ ቡሪ ጌኔ ማዾ ማዹዋጉዲ ካፒ ላኣጉዋቴ፤ ሜሌ ዓጪፓ ሙኬ ዓሶ፥ ዓዶንታ ዒንዶንታ ሃይቄ ዜኤሮ ናኣቶንታ ዜኤሮይንዶንሢንታኮ ካራ ባይዚ ሜታሲፖቴ፤ ሃይካ ዬሩሳላሜይዳ ጌኤሺ ዓሲ ዎዺፖቴ። 4 ዓዳ ታኣኒ ዓይሤማ ጎይፆ ዒንሢ ማዼቴ ዳውቴ ዜርፃ ካኣቱሞ ዖይታፓ ኬዳዓኬ፤ ሃያኮ ቤርታ ማዺንታ ጎይፆ ቢታንታ ዒንጊንቴ ዓሶንታ ዴሮንታ ዎላ ማዒ ሳርጌሎ ዖይቶና ፓራሢና ቶጊ ሃያ ካኣቱሞ ማኣሮ ጌሎ ካሮና ካሮና ጌላኒ ዒንሢ ዳንዳዓኔ። 5 ታ ዓይሣ ዓይሢፆ ዒንሢ ካፒ ኩንሡዋኣያ ማዔቴ ሃይ ካኣቶ ማኣራ ሻሂንቲ ዶዓንዳሢ ታና ታ ጌፒ ጫኣቃኔ፤ ዬያ ጌዔሢ ታና፥ ናንጊና ናንጋ ጎዳኬ።»

6 «ዪሁዳ ካኣታ ናንጋ ማኣራ ጌሌዓዴ ዓጮና ሊባኖኦሴ ዹኮናጉዲ ታኣም ሚዛጳያኬ፤ ጋዓንቴ ዒኢካ ዓሲ ናንጉዋ፥ ጉሪ ቤሲ ታኣኒ ዬያ ማሃንዳኔ። 7 ዬያ ማኣሮ ሻሂ ባይዛንዳ ዓሲ ታኣኒ ዳካንዳኔ፤ ዔያታ ፔኤኮ ሄርጎ ዔኪ ዬዓንዳኔ፤ ሊባኖኦሴ ሚፆና ኮሾና ቱርቱሮ ቲቂ ቲቂ ታሚዳ ዓጋንዳኔ።

8 «ዬካፓ ዒኢና ዴንዳ ሜሌ ዓጮ ዓሳ፦ ‹ናንጊና ናንጋ ጎዳ ሃኖ ዼኤፖ ካታሜሎይዳ ሃያጉዴ ባይሲንታ ዔኪ ዬዔሢ ዓይጎሮናንዳይ?› ጌይ ጌይ ዎሊ ኮይላ ዖኦጫንዳኔ። 9 ያዺ ጌይ ዖኦጬስካፓ ታና፥ ናንጊና ናንጋ ጎዳ ማዔ ዒንሢኮ ፆኦዛሢና ዎላ ዒንሢ ጫኣቄ ጫኣቁሞ ሃሺ ሜሌ ፆኦዞ ዒንሢ ካኣሽኬሢሮና ዬያም ዒንሢ ማዼሢሮ ዬይ ማዺንቴሢ ዔያታ ዔራንዳኔ።»

ዔርሚያሴ ሻሉሜ ጌይንታ ዓሢ ዛሎ ኬኤዜ ባኣዚ

10 ዪሁዳ ዴሬዮቴ! ካኣቲ ዒዮሲያሴ ዛሎ ዬኤኪፖቴ፤

ዒዚ ሃይቄሢሮ ዖዪፖቴ፤

ጋዓንቴ ዒዮሲያሴ ናኣዚ፥ ሻሉሜ

ላሚ ማዒ ሙኪንዱዋ ቤሲ ዔውታሢሮ

ዒ ሾይንቴ ዓጮዋ ላሚ ዛጉዋኣሢሮ

ዒኔ ሜቂ ዒዛ ዬኤኩዋቴ።

11 ዓዶ ቤዛ ዪሁዳይዳ ካኣታዼ፥ ካኣቲ ዒዮሲያሴ ናኣዚ፥ ዲዒንቲ ዔውቲ ዴንዴ ሻሉሜ ዛሎ ናንጊና ናንጋ ጎዳ ሂዚ ጋዓኔ፦ «ማይ ላሚ ዒዚ ሙካዓኬ፤ 12 ዒዚ ዒኢካ ዲዒንቲ ዴንዴ ዓጮይዳ ሃይቃንዳሢሮ ላሚ ሃኖ ዓጮ ዒ ዛጊንዱዋሴ።»

ዔርሚያሴ ካኣቲ ዒዮዓቄሜ ዛላ ኬኤዜ ባኣዚ

13 ካኣቱሞ ማኣሮ ፔኤኮ ጌኔ ጎይሢና ማዢሳሢ

ኩቦ ኬኤፆ ፔኤኮ ፒዜ ዎጌባኣ ጎይሢና ማዣ ዓሢ

ፔ ዓጪ ዓሲታንቴ ዒንጋ ባኣዚባኣያ ጉሪ ማዺሻ ዓሢ

ዒ ማዼ ማዾኮ ጪጉዋ ዓሢም ባዴዔ!

14 ዬይ ዓሢ፦ «ታኣኒ ታኣኮ ዳልጊ ኩባ ጋርሲና ዓኣ ማኣሪ ማዣንዳኔ፤ ዬያጉዲ ዳልጊ ዳልጊ ፑልታ ካራ ታኣኒ ጌሣንዳኔ፤ ዬያ ማኣሮ ታኣኒ ዳልጊ ዳልጊ ዴኤሊ ዚቢቂ ሚሢና ሚዛጲሲ ኮሻንዳኔ፤ ዞቄ ዲንኪ ቃላሜና ታኣኒ ዬያ ማኣሮ ቲሽካንዳኔ» ጋዓኔ።

15 ሜሌ ዓሳ ማዻሢዳፓ ዑሣ ዓኣዼ

ኮሺ ቃራ ማዔ ዴኤሎ ዚቢቆ ሚፆና ማኣሮ ማዤሢሮ

ቢያሢፓ ቃራ ካኣቶ ኔኤኒ ማዔያ ኔኤም ማላ?

ኔ ዓዴ ኩሙሢ፥ ጊዳ ሌዔ ዎዛና ናንጌኔ፤

ዒዚ ቢያ ዎዴ ፒዜ፥ ሃሣ ጎኔ ዓሲ ማዒፆና

ዒ ማዼ ባካ ቢያ ዒዛም ጊኢጋያ ማዔኔ።

16 ዒዚ ማንቆ ዓሶና ሜታዼ ዓሶናም ፒዙሞና ዎጋሢሮ

ቢያ ባካ ዒዛም ጊኢጋኔ፤

ናንጊና ናንጋ ጎዳ ዔሪሢ ጌይፃ ዬያታሢ ዔሬ።

17 ኔኤኮ ማዻ ጌኤሺ ዓሲ ዎዺሢና ዓሲ ሄርቂ ዎይሥሢኬ፤

ኔኤኮ ዓኣፖና ዒኖና ዓኣ ቤዛ

ዔርቲባኣ ጎይሢና ጌሺ ዔኤቢ ዺቢ ዴንቂሢዳ ሌሊኬ።

18 ዬያሮ ናንጊና ናንጋ ጎዳ ዪሁዳ ካኣቲ፥ ዒዮሲያሴ ናኣዚ ዒዮዓቄሜ ዛሎ ሂዚ ጋዓኔ፦

«ዒዚ ሃይቃ ዎዶና

‹ዎኦ! ታ ዒሼ ዎኦ!› ጌይ ዖዪ ዬኤካንዳ ዓሲ ባኣሴ፤

ዬያጉዲ ሃሣ ‹ዎኦ! ኑ ጎዳ፤ ኑ ካኣቲዮ ዎኦ!› ጌይያኣ ዬኤካንዳ ዓሲ ጴዻዓኬ። ✝22፡18 2ካኣቶ. ማ 23፡36—24፡6፤ 2ፆኦሲ. ዓሃኬ 36፡5-7።

19 ሌዛ ዒዛኮ ቦንቾባኣያና ጎቺንቲ

ዬሩሳላሜ ካታሞኮ ዲፆ ዙላ ኬሲ

ሃሬ ጎይሢ ዱኡኪንታንዳኔ።»

ዬሩሳላሜይዳ ሄላንዳ ሜቶ ዛሎ ዔርሚያሴ ኬኤዜ ቃኣሎ

20 ዬሩሳላሜ ዴሬዮቴ!

ዒንሢ ዎሊ ናሽካ ሚሳታ ባሺንቲ ሎኦሜኔ፤

ሊባኖኦሴ ዹኮ ኬስኪ ዒላቱዋቴ፤

ባኣሳኔ ዓጮዋ ዴንዲ ዬኤኩዋቴ፤

ሞዓኣቤ ዹኮ ቶኦካ ኬስኪ ዔቂ ቃዩዋቴ።

21 ዒንሢ ዖርጎጪ ናንጋ ዎዶና

ናንጊና ናንጋ ጎዳ ዒንሢም ኬኤዜኔ፤

ዒንሢ ጋዓንቴ ዋይዞ ዒፄኔ፤

ዓይፃፓ ዓርቃዖ ዒንሢ ማዻማ ዬማኬ፤

ዒዛም ዓይሢንቶ ዒንሢ ዒፄኔ።

22 ዒንሢ ማዻ ጎሞ ዛሎና

ዢባሬ ዲልባ ፒፂ ዔኪ ዴንዳሢጉዲ

ዒንሢ ሄንቃ ዓሳ ፒፂንቲ ዔውታንዳኔ፤

ዒንሢ ጉሙርቃ፥ ዒንሢኮ ዖሎ ሚሳታ

ዲዒንቲ ዔርቲባኣ ዓጪ ዴንዳንዳኔ፤

ቦርሲንቲና ዻውሲንቲና ዒንሢም ማዓንዳኔ።

23 ሊባኖኦሴ ዹካፓ ዔኪ ሙኮና ዴኤሎ ዚቢቆና ማዦና ማኣራ ኮሺና ሃሢ ዒንሢ ሃውሺ ናንጋኔ፤

ጋዓንቴ ሾይቺ ዓርቄ ላኣሊጉዲ ባኒፃ ዒንሢ ዓርቃኣና ዒንሢ ዎዎይታንዳይ?

ዒኮኒያይዳ ዓጊንቴ ሜታሢ

24 ዒዮዓቄሜ ናኣዚ፥ ዒኮኒያም ናንጊና ናንጋ ጎዳ ሂዚ ጌዔኔ፦ «ታ ሼምፓ ሃይቆ! ኔኤኒ ታኣኮ ሚዛቆ ኩጮይዳ ዓኣሢንቲ ዓኣ ማላቶ ዢኢራሢጉዲ ማዔቴያ ታ ኔና ኬሲ ኬኤራንዳኔ፤ ✝22፡24 2ካኣቶ. ማ 24፡8-15፤ 2ፆኦሲ. ዓሃኬ 36፡9-10። 25 ኔና ዎዻኒ ኮዓ ዓሶና ኔኤኒያ ኮሺ ዒጊጫ ዴሮ፤ ጌይፃ፦ ባብሎኔ ካኣቲ ናብካዳናፆኦሬንታ ባብሎኔ ዓሶንታም ታ ኔና ዓኣሢ ዒንጋንዳኔ፤ 26 ኔናንታ ኔና ሾዔ ዒንዶንታ ዒንሢ ዳውሲንቲ ዴንዲ ባይቃንዳጉዲ ታኣኒ ማሃንዳኔ፤ ዒንሢ ቢያሢ ዒንሢ ሾይንቲባኣ ዓጪ ዴንዲ ዒኢካ ሃይቃንዳኔ። 27 ሃኖ ዓጬሎ ላሚ ዛጋኒ ኔኤኒ ጶቂሣንዳኔ፤ ጋዓንቴ ላሚ ኔ ማዒ ሙካዓኬ።»

28 ታኣኒ ዒማና ሂዚ ጌዔኔ፦ «ካኣቲ ዒኮኒያ ቶኦቺንቲ ሃይቄ ዖቲ ዖኦኒያ ኮዑዋያጉዲ ማዓንዳኔ ጌይሢዳ? ዒዛንታ ናኣቶንታ ዔያታ ዔሩዋ ዓጪ ዲዒንቲ ዔውታሢ ዓይጎሮዳይ?»

29 ዓጪዮ! ዓጪዮ! ዓጪዮ!

ናንጊና ናንጋ ጎዳ ጋዓ ቃኣሎ ዋይዜ!

30 «ሃይ ዓሢ ናኣታፓ ቢያ ፔኤኮ ጉሪ ዓቲ

ናንጋኣ ዒዛኮ ጊኢጉዋያ ማዓንዳጉዲ ናንጊና ናንጋ ጎዳ ዎጌኔ፤

ዳውቴኮ ካኣቱሞ ዖይቶ ዻካላኒ

ዪሁዳይዳ ካኣታዻንዳ ዜርሢባኣያ፥ ናይ ሾይባኣ ዓሲ ጌይ ዒዛ ፃኣፔ፤

ዬያ ጌዔሢ ታና፥ ናንጊና ናንጋ ጎዳኬ።»