Mikunga 137

Mukunga ya kyadi na yinsi ya Babilone

1 Beto vwandaka ya kuvwanda pene-pene ya banzadi ya Babilone,

beto vwandaka dila,

mpe beto vwandaka bambuka moyo na Siyone.

2 Beto ledikaka bansambi ya beto

na bayinti yina vwandaka kuna.

3 Kuna, bayina nataka beto na ngolo, bawu vwandaka tumisa beto na kuyimbila mikunga,

bayina vwandaka kwamisa beto,

bawu vwandaka tumisa beto na kuyimbila mikunga ya nsayi:

«Beno yimbila beto mikunga ya Siyone!»

4 Wapi mutindu beto lenda yimbila mukunga ya Yave,

kwaku na yinsi ya nzenza?

5 Yelusalemi kana mu zimbana nge,

bika ti diboko ya munu ya lubakala kufwa.

6 Kana mu bika na kubambukila nge moyo,

kana mu sala ti nge bika na kuvwanda

nsayi ya munu ya kulutila,

bika ti ludimi ya munu kukangama na yinwa ya munu.

7 Yave, bambuka moyo na bantu ya yinsi ya Edome,

na kilumbu yina ba bakaka mbanza Yelusalemi,

bawu vwandaka tuba:

«Beno mwangisa,

beno mwangisa tii na lufulu!»

8 Babilone mbanza ya kitoko, ba ke mwangisa nge,

kyese na bayina ke vutula nge

yimbi yina nge salaka beto!

9 Kyese na bantu yina ke simba bantwenya ya nge

mpe ke nika bawu na zulu ya ditadi ya nene!