Salmos 99

Yave kele ntinu ya longo

1 Ni Yave kele ntinu,

bika ti bantu kutekita,

yandi kele ya kuvwanda na zulu ya bakeluba,

bika ti ntoto kuningana.

2 Kuna na Siyone, Yave kele Nzambi ya nene,

ya tsyelika, yandi kele na zulu ya bantu nyonso!

3 Bika ti bantu kukembila Nkumbu ya nge ya nene mpe ya ngitukulu!

Nzambi kele Nzambi ya longo!

4 Bika ti bantu kukembila lulendo ya ntinu yina ke zolaka mambu ya kusungama!

Ni nge ke vwandisaka kusungama.

Ni nge ke bakaka banzengolo mpe ke fundisaka na Isayeli.

5 Beno kembila Yave Nzambi ya beto!

Beno yinama na mantwala ya kisika yina yandi ke tulaka makulu ya yandi!

Yandi kele Nzambi ya longo!

6 Moyize mpe Aloni vwandaka banganga-Nzambi ya Yave.

Samwele vwandaka mosi na kati ya bayina vwandaka bokila Nkumbu ya Yandi,

bawu vwandaka bokila Yave mpe Yave vwandaka pesa bawu mvutu.

7 Nzambi vwandaka zonzila bawu na kati ya dituti ya nene ya kutelama,

bawu vwandaka sadila bansalulu ya misiku,

mpe Musiku yina Nzambi pesaka bawu.

8 Yave Nzambi ya beto, ni nge pesaka bawu mvutu,

nge vwandaka samu na bawu, Nzambi yina ke lemvokilaka,

kasi ni nge futisaka bawu yimbi yina bawu salaka.

9 Beno kembila Yave Nzambi ya beto,

beno finama na mantwala ya mongo ya yandi ya longo!

Samu ti yandi kele longo, Yave, Nzambi ya beto!