Atos 3

Kulamiswa kwa ngagenda

1 Ligono limonga, lukumbi lwa saa tisa ya muhi, Petili na Yohani vavi mukuhamba Kunyumba ya Chapanga lukumbi lwa kumuyupa Chapanga. 2 Hinu mundu mmonga mweavi ngagenda tangia peavelekiwi. Kila ligono vandu vamgegayi na kumvika pamlyangu wa Nyumba ya Chapanga weukemelewa "Mlyangu Wabwina." Muni avayupayi vindu kwa vala veviyingila Munyumba ya Chapanga. 3 Peavawene Petili na Yohani viyingila Munyumba ya Chapanga, avayupili vampela mashonga. 4 Vene vakamlolokesa takataka, ndi Petili akamjovela, "Utilola!" 5 Ngagenda yula akavalola, ahololela ipewa chindu kuhuma kwavi. 6 Nambu Petili akamjovela, "Nivii lepi na mashonga amala zahabu, nambu chenivi nachu yati nikukupela. Kwa uhotola wa Yesu Kilisitu wa ku Nazaleti, yima ugendayi!" 7 Hinu akamkamula chiwoko cha kulyelela, akamyinula. Bahapo magendelu na mafugamilu gaki gakavya na makakala. 8 Akahumba, akayima na kutumbula kugenda. Ndi akayingila nawu pamonga Munyumba ya Chapanga, igenda na kuhumba humba kuni akumlumbalila Chapanga. 9 Vandu voha vevavi penapo vamuwene igenda na kumlumbalila Chapanga, 10 pavammanyili kuvya mwene ndi yula mweatama papipi na Mlyangu Wabwina Wa Nyumba ya Chapanga, na kuyupa vakakangasa neju hati nakugamanya gegamkolili.