35 Hinu, muvya na ukekesi yati yikuvapela njombi yivaha. 36 Mganikiwa kusindimala muni muhengayi geigana Chapanga na pahala pa apo mupokela chila cheavalagazili.

37 Muni ngati chegijova Mayandiku Gamsopi,

"Pakona padebe ndu,

na yula mweibwela yati ibwela, na ikavila lepi.

38 Nambu mundu mbwina palongolo yangu yati isadika na kutama,

nambu akalekayi kunisadika,

nene nakuganikiwa nayu."

39 Hinu, tete lepi vandu vetikuyileka sadika na kuyaga, nambu tete ndi vandu vetisadika na kusanguliwa.