1 "Aga ndi malovi ga lilaganu la Bambu Chapanga geamlagisi Musa akita na Vaisilaeli ku Moabu, leka lila leakitili nawu ku Sinai."

2 Musa akavakemela Vaisilaeli voha akavajovela, "Mwagaweni goha Bambu Chapanga geamuhengili nkosi wa Misili na vatangatila vaki na vachilongosi vevavi pahi yaki na vandu voha va mulima waki. 3 Kwa mihu ginu mwavene mwalolili ulangisu na makangaso na gachinamtiti gavaha geakitili. 4 Nambu mbaka lelu Bambu Chapanga avapelili lepi luhala lwa kumanya wala mihu ga kulola wala makutu ga kuyuwana. 5 Nene navalongwisi nyenye kulugangatu kwa miyaka alubaini, nyula zemwawalili na vilatu vya mumagendelu ginu vyalalili lepi. 6 Mwalili lepi libumunda amala kunywa divayi amala kunywa chechigalisa, muni muhotola kumanya kuvya Bambu Chapanga ndi Chapanga winu. 7 Na pemwahikili pandu apa vabwelili Sihoni nkosi wa ku Heshiboni na Ogu nkosi wa ku Bashani vabwelili kukomana na tete, nambu tavatovili, 8 ndi tikautola mulima wavi, tikagapela makabila ga Lebeni na Gadi na yapinga ya likabila la Manase uvya mulima wavi. 9 Hinu mkangamala kukamula malovi goha ga lilaganu lenili muni mambu ginu gavahambila bwina."

10 "Lelu muyimili palongolo ya Bambu Chapanga winu, nyenye mwavoha mwavachilongosi va makabila na vagogo vinu na vayimamila vinu na vagosi vangi voha va Isilaeli, 11 pamonga na vana vinu na vadala vinu na vayehe vevitama pamonga na nyenye vevakuvabayulila sagala na kuvanegela manji. 12 Muvii apa lelu iyi kukita lilaganu lila Bambu Chapanga winu ikita na nyenye lelu, 13 kuvya yati ilangisa uchakaka lelu kuvya nyenye ndi mwavandu vaki na mwene avya Bambu Chapanga winu, ngati cheavalapalili nyenye na vagogo vinu: Abulahamu na Isaka na Yakobo. 14 Nikita lepi lilaganu ili na chilapu ndava yinu ndu na kuluwula likoto laki, nikita lepi ndava ya vala ndu vevavili pamonga na tete lelu palongolo ya Bambu Chapanga witu, 15 nambu mewa nikita na vala vevangavya apa pamonga na tete lelu."

16 "Nyenye mwavene mumanyili chetatamili kumulima wa Misili na chila chetapitili pagati ya vandu va milima yingi mbaka kuhika apa. 17 Mwaviweni vimong'omong'o vyavi vyeviyomesa ndi michapanga yeyitengenizwi kwa mikongo na maganga na madini ga feza na zahabu. 18 Mujiyangalila pagati yinu akoto kuvya mgosi amala mdala, mlongo amala likabila loloha lelikumleka Bambu Chapanga witu, na kuhamba kufugamila michapanga ya milima yingi. Lijambu lenili yati livya ngati mkiga weumelisi mkongo na kupambika matunda gavavanu na gegana chimatila. 19 Pemmala kuyuwana malovi ga lilaganu lenili lemlapiswi, na mundu akajijovela mumtima waki kuvya nivi bwina kuni ihamba na njila zaki mwene, lenilo yati likuvakoma voha vahakahu na vabwina. 20 Bambu Chapanga yati akumlekekesa lepi mundu mwenuyo, ligoga na wihu waki yati viyaka panani ya mundu mwenuyo, makoto goha gegayandikwi muchitabu ichi yati gakumpata, na Bambu Chapanga yati akuliwusa liina la mundu mwenuyo kuhumila pamulima. 21 Bambu Chapanga yati akumvagula mwene kuhuma mumakabila goha ga Isilaeli muni apatwa na matovilu kulandana na makoto goha gegayandikwi muchitabu ichi cha malagizu."

22 "Muviveleku vinu vyoha vyevibwela, vana vinu na vayehe kuhuma kumilima ya kutali yati vilola Bambu Chapanga cheavapeli mulima uwu matovilu na mang'aiso. 23 Mulima woha yati wivya ngati lugangatu, yati umemi mngwala na mwinyu, utinyiki na kawaka chechisigalili, vandu vapandili lepi mbeyu na kawaka chochoha chechimelili. Ndi ngati cheyavili lukumbi Bambu Chapanga cheakomakisi Sodoma na Gomola na Adima na Seboimu, kwa ligoga laki likali. 24 Vandu va milima yoha yati vikota, ‘Ndava kyani Bambu Chapanga avakitili naha vandu va mulima uwu? Ligoga yeniyi yivaha yilangisa kyani?’ 25 Vandu yati viyangula, ‘Vakitiwi chenichi muni vadenyili Lilaganu la Bambu Chapanga wa vagogo vavi, mweavikili nawu lukumbi peavawusa kuhuma kumulima wa Misili, 26 na vandu venavo vakahamba kuihengela na kuifugamila michapanga yingi, yila vangayimanya pakutumbula amala Bambu Chapanga avapelili lepi. 27 Penapo ndi Bambu Chapanga akavayomela neju vandu va mulima uwu na kuvapela makoto goha gegayandikwi muchitabu ichi. 28 Ndi Bambu Chapanga avayomili neju na akavawusa pamulima wavi na akavataga kumulima wungi ngati cheyivii lelu.’ "

29 "Mambu ga mfiyu ndi ga Bambu Chapanga witu, nambu gala gegagubukuliwi ndi gitu na viveleku vitu magano goha gangali mwishu, muni tihotola kugahengela lihengu malovi ga malagizu aga."