1 "Bambu Chapanga winu, yati akuvahikisa kumulima wemuhamba kuutola yati akuvavinga vandu milima yamahele kuhuma mumlima wenuo. Pamuhika yati akuyivinga milima saba palongolo yinu gavaha na gegavi na makakala kuliku nyenye: Vahiti na Vagiligashi na Vaamoli na Vakanaani na Vapelizi na Vahivi na Vayebusi. 2 Mewa Bambu Chapanga peakuvahotosa nyenye kuvakamula, yati mukuvatova na kuvakomakesa njwee, mkotoka kukita lilaganu loloha amala kuvahengela lipyana. 3 Mkotoka kugegana nawu. Kotoka kumgegesa vasikana vaku vagegewa na vasongolo vavi, amala vasongolo vinu kugega vasikana vavi, 4 Mkakita chenicho vene yati vakuvayagisa vana vinu vakotoka kumlanda Bambu Chapanga na kuvakita vafugamila vachapanga vangi, na Bambu yati akuvayomela na kuvakomakesa kanyata. 5 Nambu muvakitila naha, yati mdenya pandu pa kuwusila teta zavi za maganga na kubomola nguzo zavi. Na mudumula nguzo za Ashela na kuyocha motu vimong'omong'o vyavi vya kuhongola. 6 Mkita chenicho ndava nyenye mwavandu vaki Bambu Chapanga winu. Muvandu voha pamulima avahagwili nyenye muni muvya vandu vaki mwene."

7 "Bambu Chapanga avaganili lepi nyenye na kuvahagula ndava nyenye ndi vamahele neju kuliku vandu vangi, nyenye mwavili vedebedebe kuliku milima yoha. 8 Nambu Bambu Chapanga akuvagana na ilanda chilapu chaavalapili vagogo vinu, ndi mana avasangwili kwa uhotola waki na kuvawusa kuhuma muuvanda kwa Falao nkosi wa Misili. 9 Hinu, mmanya kuvya Bambu Chapanga winu, ndi Chapanga msadikika mweikamula lilaganu laki na kuvalagisa uganu viveleku vyamahele vya vala vevakumgana na kukamula mihilu yaki. 10 Nambu akuvalipisa cheyiganikiwa vala vevakumvenga, mewa yati iyogopa lepi kuvabuna vevakumvenga. 11 Hinu mugahengela lihengu kwa usadikika malagizu na mihilu yenikuvapela lelu."

12 "Ngati mukagakamullila cha uchakaka malagizu aga na kugahengela lihengu, Bambu Chapanga winu yati itimilisa lilaganu laki na nyenye na kuvalangisa uganu ngati chavahadili vagogo vinu. 13 Yati akuvagana na kuvamotisa, na nyenye yati myonjokeseka na kuvya na viveleku vyamahele, yati akuyimotisa migunda yinu muni mpata chakulya, divai na mahuta, yati akuvamotisa kwa kuvapela ng'ombi na mambelele gamahele pamulima wealapili kwa vagogo vinu kuvya yati akuvapela nyenye. 14 Yati mmotisiwa kuliku vandu vangi voha pamulima. Pagati yinu yati kwivya lepi na mgosi amala mdala mwangaveleka mewa kawaka mifuya yinu yangababa. 15 Bambu yati iwusa matamu goha gakuyogofya na yati mwipata lepi utamu wowoha uvaha ngati chamwapatili ku Misili kula, nambu yati akuvapela vamakoko vinu matamu ago. 16 Muvakomakesa vandu mulima wowoha ndi Bambu Chapanga winu mweakuvakita nyenye muvahotola, mkotoka kuvahengela lipyana. Mkotoka kugundamila michapanga ya muni yeniyo yati yivya lingongeka kwinu."

17 "Mkotoka kujova mumitima yinu, ‘Vandu ava ndi vamahele kuliku tete, tihotola wuli kuvavinga pamulima?’ 18 Mkotoka kuvayogopa, mukumbuka chila Bambu Chapanga winu, cheamkitili nkosi wa ku Misili pamonga na vandu vaki voha. 19 Mkumbuka matovilu ga kuyogofya gemwagaweni kwa mihu ginu, milangisu na makangaso na makakala gavaha na uhotola ukulu, vyenivyo ndi Bambu Chapanga winu muni kuvawusa ku Misili, chenicho ndi Bambu cheakuvakitila vandu vala vemukuvayogopa. 20 Neju ya ago Bambu Chapanga winu yati ipeleka matendewu pagati yinu mbaka peakuvayongomesa vala vevatili na kujihiha. 21 Hinu, mkotoka kuvayogopa muni Bambu Chapanga winu, avi pagati yinu, mwene ndi Chapanga mkulu na wakuyogopesa. 22 Bambu Chapanga winu yati akuvavinga vandu va milima yingi mbolimboli lukumbi chemuhamba kulongolo. Yati muhotola lepi kuyongomesa voha mulukumbi lumonga, muni mukakita chenicho hinyama ya mudasi yati hiyonjokesa na kuvayogopesa. 23 Bambu Chapanga winu yati akuvahotosa nyenye muvakamula vamakoko vinu na kuvakita valyungalyunga mbaka vafwai. 24 Bambu yati akuvahotosa muvakamula vankosi vavi. Yati mukuvakoma na viyiwulika. Kawaka mundu mwaihotola kuvadivalila, mbaka pemukuvayongomesa voha. 25 Muyocha pamotu vimong'omong'o vyavi vya kuhongola na michapanga yavi. Mkotoka kunogela madini ya feza zavi amala zahabu zavi, mkotoka kutola na kuvikita vya kwinu, mukakita chenicho yati zivya lingongeka kwinu nyenye yati mwivya yomeso kwa Bambu Chapanga winu. 26 Mkotoka kupeleka chindu chochoha chechimyomesa Bambu Chapanga winu, kunyumba yinu, muni ngati mukakita chenicho yati mpewa likoto ngati chechivii chindu chenicho. Ndi mganikiwa kuchibela na kuchivevesa neju ndava muni ndi chindu chechivi na likoto."