1 Kangi, tawuyili, tahambili lugendu mulugangatu kuhambila ku nyanja ya Shamu, ngati Bambu Chapanga chanijovili, talyungili papipi na chitumbi cha Seili kwa lukumbi lutali.

2 "Kangi Bambu Chapanga akanijovela, 3 Mlyungilyungili kwa magono gamahele pamulima weuna vitumbi, hinu mung'amuka muhamba kukasikazini. 4 Vapela vandu malagizu aga: Muvi papipi kupita pagati ya mulima wa Seili weuna vitumbi, mulima wa valongo vinu viveleku vya Esau. Venavo yati vakuvayogopa, nambu mujiyangalila, 5 mkotoka kutovana nawu muni yati nikuvapela lepi pandu popoha pa mulima wavi. Yati nikuvapela lepi hati pandu padebe pakulivatila. Mulima wenuwo wa vitumbi ya Seili nivapelili vavelekwa va Esau uvya wavi. 6 Mkagana chakulya amala manji kuhuma kwavi mganikiwa kugula."

7 "Hinu, mukumbuka Bambu Chapanga winu, chavamotisi mukila chindu chemwakitili. Avayangalili pemwalyungalyunga kulugangatu livaha ulu. Avi pamonga na nyenye miyaka iyi yoha alubaini na mwapungukiwi lepi na chindu chochoha."

8 "Hinu tayendalili na lugendu lwitu, tapitili valongo vitu, chiveleku cha Esau vevitama ku Seili, tayilekili njila yila yeyihamba ku Alaba na miji ya Elati na Esioni Gebeli. Kangi tikang'anamuka kuyilanda njila ya kupitila lugangatu lwa Moabu. 9 Bambu Chapanga akanijovela, ‘Kotoka kuvang'aha amala kutovana nawu vandu va ku Moabu ndi chiveleku cha Lutu, muni nivapelili muji wa Ali. Na nene nikuvapela nyenye pandu popoha pamuji wavi.’ 10 Penapo kadeni pamuji wa Ali vatamali Vaemi vavi ngati majindu vamahele vatali na makakala na ngati Vaanaki. 11 Vandu venavo vawonikini ngati Vaanaki, vandu ava vamanyikini mewa ngati Valefai, nambu Vamoabu vavakemili Vaemi. 12 Penapo kadeni Vaholi mewa vatamili kumuji wa Seili nambu vavelekwa va Esau vavavingili na kuvakomakesa, kangi vene vakatama pamulima wenuwo pahala pavi. Ngati Vaisilaeli chevakitili pamulima wula wevapewili na Bambu Chapanga uvya wavi."

13 "Bambu Chapanga atijovili muwukayi hinu, mkupuka kapela Zeledi, ndi tikakupuka kapela Zeledi. 14 Tangiya tiwukili Kadeshi Balinea mbaka kukupuka kapela Zeledi miyaka selasini na nane yapitili. Lukumbi lwenulo chiveleku choha cha vandu va ntanga ya kuhamba kungondo chamali kufwa kulandana na Bambu Chapanga chavalapili. 15 Bambu Chapanga avatovili mbaka peavawusili pagati Vaisilaeli."

16 "Hinu, vandu voha vevana ntanga ya kuhamba kungondo pevamali kufwa voha, 17 Bambu Chapanga anijovili, 18 ‘Lelu iyi yati mkupuka mubaka wa mulima wa Moabu weuvi kumuji wa Ali. 19 Yati mukuuhikila mulima wa Vaamoni va chiveleku cha Lutu. Mkotoka kuvang'aha mewa mkotoka kutovana nawu muni yati nikuvapela lepi pandu popoha pamulima wa Vaamoni uvya winu.’ 20 Mulima wenuwo mewa umanyikana kuvya mulima wa Valefai. Penapo kadeni Valefai vatamayi kwenuko, Vaamoni vavakemili venavo Vazamzumi. 21 Vavi vandu vamahele, vana mkakala na vatali ngati Vaanaki. Nambu Bambu Chapanga avakomakisi lukumbi pavahikili Vaamoli ndi avavingili na Vaamoli vakatama pandu pavi. 22 Bambu Chapanga avakitili ngati chila cheavakitili vachiveleku va Esau, Vaedomu vevatamili pamulima wa Seili. Avakomakisi Vaholi lukumbi Vaedomu pavahikili kwenuko, vakatola mulima wenuo na kutama mbaka lelu. 23 Penapo kadeni Vaavi vatamili muhijiji ya mumihana ya nyanja Meditelanea mbaka Gaza, Vakafitoli vabwelili kuhuma ku chisiwa cha Kaptoli na kuvakomakesa na kutama penapo pahala pavi."

24 "Petamali kupita mumulima wa Moabu, Bambu Chapanga akatijovela, ‘Hinu mtumbula lugendu. Mkupuka likemba la Alinoni. Nene nivapelili makakala ga kumuhotola Sihoni, nkosi wa Vaamoli wa Heshiboni na mulima waki. Mumzangila na mtola mulima waki na muutalalila. 25 Kutumbula lelu yati nitumbula kuvakita vandu voha va mulima vavayogopa na kuvya na wogoyu ndava yinu, yati viyuwana mambu ginu yati vindendema na kuvya ngolongondi.’ "

26 "Hinu natumili vandu kuhuma kulugangatu lwa Kedemoti vahamba kwa nkosi Sihoni wa ku Heshiboni na ujumbi wa uteke weujova: 27 ‘Chondi tileka tipite pa mulima waku. Yati tipita munjila na kuhamba lumonga changali kunga'anamuka kuupandi wa kulyelela amala kumangeya. 28 Chakulya na manji yati tigula kwaku. Chondi tikuyupa utiyidakila tipita ndu kwa magendelu pa mulima waku, 29 mbaka tikupuka mfuleni Yoludani na kuyingila mulima wula Bambu Chapanga akutipela, ngati chevatiyidakili vachiveleku va Esau vevitama kumulima wa Seili na Vamoabu vevitama pamuji wa Ali chevatiyidakili tipita pamulima yavi.’ "

30 "Nambu Sihoni, nkosi wa Heshiboni atiyidakili lepi kupita pa mulima waki. Ndava Bambu Chapanga winu, amkitili avya na mtima wangayidakila na ndindani, muni timutova na kutola mulima waki na kutama mwenumo ngati cheyivili hinu."

31 "Kangi Bambu Chapanga akanijovela, ‘Lola, nitumbwili kuvakita nyenye mumhotola nkosi Sihoni na mulima waki, hinu mtumbula kumtova na kutola mulima waki uvya winu.’ 32 Kangi Sihoni ahumili na vandu vaki voha kutovana na tete pamuji wa Yahasa, 33 namwene Bambu Chapanga witu akamkita akotoka kutihotola, tikamkoma mwene na vana vaki na msambi wa manjolinjoli vaki voha. 34 Tayitolili miji yaki yoha nakuhialabisa, tikakoma vagosi na vadala na vana, tamlekili lepi mundu yoyoha mumi. 35 Tatolili kuvya vitu, mifuya pamonga na vindu vyoha vyetavikolili kumiji. 36 Kutumbula Aloeli, muji weuvi mumihana ya likemba Alinoni na muji weuvi mugati ya likemba lenilo mbaka Gileadi, kawaka muji wowoha wewahotwili kutovana na tete. Bambu Chapanga atihotwisi kuyitola miji yoha. 37 Nambu tayihegalili lepi milima ya Vaamoni amala mumihana ya mfuleni Yaboki mewa mumiji ya milima ya vitumbi amala pandu popoha petabesiwi na Bambu Chapanga witu kuvya tikoto kuhamba."