1 "Ngati mukaluyuwanila lwami lwa Bambu Chapanga winu, na kukita chiukekesi malagizu genikuvalagiza lelu, mwene yati akuvakita muvya vandu va mulima uvaha kuliku vandu va milima yingi yoha. 2 Ngati mukaluyidakila lwami lwa Bambu Chapanga winu, ndi yati akuvapela mota zenizi."

3 "Bambu yati akuvamotisa mukila chemuhenga, mumiji na mumigunda yinu."

4 "Bambu yati akuvamotisa mpata vana vamahele, mabenu gamahele, na kuvya na ng'ombi na mambelele gamahele."

5 "Bambu yati akuvamotisa kwa kuvapela mabenu gamahele na chakulya chechihuma mumabenu genago."

6 "Bambu yati akuvamotiswa pemwikita kila lihengu lemwihenga."

7 "Bambu yati akuvakita muvahotola vamakoko vinu peviyima na kutovana na nyenye, pevibwela kwa njila yimonga yati vipechengana kutila kwa njila saba."

8 "Bambu Chapanga, yati akuvapela mota kwa kumemesa vyakulya muvibana vinu na mukila chindu chemwikita kwa mawoko ginu. Yati akuvamotisa mumlima weakuvapela."

9 "Bambu Chapanga winu, yati akuvakita muvya vandu vaki Chapanga mwene ngati chajovili, ngati mukayidakila mihilu yaki mwene na kulanda njila zaki. 10 Vandu va milima yoha pevimanya kuvya Bambu Chapanga winu avahagwili nyenye muvya mwavandu vaki yati vakuvayogopa. 11 Bambu yati akuvamotisa kwa kuvayonjokesa neju vana na mifuya na mabenu mumiguda, mumulima weavalagazili vagogo vinu kuvya yati akuvapela. 12 Kuhuma yati akuvagubukulila chibana chaki chabwina kuhuma kunani, Bambu yati itonyesa fula, pamulima kwa lukumbi lweluganikiwa, na kuvamotisa mahengu ginu. Yati mukuvakopesa vandu va milima yamahele nambu nyenye yati mwikopa lepi. 13 Bambu Chapanga winu, yati akuvakita muvya vachilongosi pagati ya vandu va milima yingi na yati mwilongoswa lepi na vangi. Yati muvya mwavavaha vana vindu vyamahele ndi lepi vangangu, ngati mugakamula malagizu gaki genivapela lelu na kugakita chausadikika. 14 Nambu katu ukotoka kulinga kubela kuyidakila malagizu na mihilu yeniyi ukotoka kufugamila na kuyihengela michapanga yingi."

15 "Nambu ngati muyidakila lepi lwami lwa Bambu Chapanga winu, amala ngati mukita lepi chaukekesi malagizu gaki goha na mihilu yenikuvalagiza lelu, ndi makoto genaga goha yati gakuvapata."

16 "Yati mupewa likoto mukila chemuhenga, mumiji yinu na mumigunda ginu."

17 "Yati vipewa likoto madengu ginu ndava ya kubela kumemesa vyakulya na hyombo vya kutengenezela mabumunda."

18 "Vana vinu yati vipewa likoto ndava kubela kuvya na vana vamahele na mabenu ga ndima yinu, na mifuya yinu yati yipewa likoto yikoto kuyolokana."

19 Bambu Chapanga yati mupewa likoto mahengu ginu goha gemwihenga.

20 "Ngati mwikita gahakau na kumbela Bambu Chapanga, yati akuletela matamu, chitutu na kudumuka mtima mumahengu ginu goha mbaka mkomakiswi na kanyata, ndava ya gahakahu na matendu ginu na ndava ya kumleka Bambu Chapanga. 21 Bambu Chapanga yati akuvaletela matamu ndalindali mbaka mwavoha avakomakesa njwee pamulima wemuhamba kuutola uvya winu. 22 Bambu Chapanga yati akuvaletela matamu ga kukohomola na utamu na maputi na lupyupu neju na kumalikiwa na kutimbugana na likungu mambu genago yati gakuvahanganila mbaka mufwayi. 23 Kunani kwa Chapanga yati kwivya lepi na fula pa ndima yati piyuma ngati lyuma. 24 Bambu Chapanga, yati akuvakitila lububu na msavati kuvya fula yinu, lububu yati lukuvatova mbaka mufwa."

25 "Bambu Chapanga, yati akuvakita mubuniwayi na vamakoko vinu. Pemuhamba kukomana yati mukuvahambila kwa njila yimonga, nambu yati mutila na kupechengana kwa njila saba, na nyenye muvya yomeso kwa vandu voha va pamulima. 26 Pemwifwa hinga zinu yati zivya chakulya cha videge na hinyama kawaka mundu mweibwela kuvivinga. 27 Bambu Chapanga, yati akuvatova kwa maputi ngati gala gevapatili Vamisili na kwa vilonda na upele na kutuguta kwangahotoleka kulama. 28 Bambu Chapanga yati akuvatova kwa kupenga, yati muvya ngalola na kuvya na mang'amung'amu. 29 Muhi yati mugenda kwa kupamisapamisa ngati vangalola na yati mumotiswa lepi mugoha gemuhenga. Yati munyagiwa vindu vinu pamahele na kwivya lepi na mundu wa kuvatangatila."

30 "Yati ugega mdala nambu mgosi yungi yati igona nayu. Mukajengayi nyumba yati yitamiwa na mundu yungi. Yati upanda mizabibu nambu yati ulya lepi nambu yati ilya mundu yungi. 31 Ng'ombi zinu yati zihinjwa palongolo ya mihu ginu nambu yati mulya lepi nyama zaki. Punda zinu yati zitoliwa kwa makakala kuni mwilola nambu yati muwuyisiwa lepi. Mambelele ginu yati vipewa vamakoko vinu, na yati kuvya lepi na mundu wa kuvatangatila. 32 Vana vinu va chigosi na vachidala yati vipelekwa kwa vandu va milima yingi na nyenye yati mulindila magono goha vawuyayi nambu yati muvya lepi na makakala ga kuvawuyisa. 33 Vandu va mulima wangaumanya yati vitola mabenu goha ga ndima yinu na matunda gemugahengili lihengu, na nyenye yati munyagiwa na kung'aiswa magono goha, 34 mbaka yati mwipenga ndava ya mambu gemukugapata. 35 Bambu Chapanga, yati akugabuna mafugamilu ginu na magendelu ginu kwa maputi gegivina neju gangahotoleka kulamiswa, yati gidandasika kuhumila kulwayu lwa magendelu ginu mbaka kumutu."

36 "Bambu Chapanga, yati akuvapeleka nyenye pamonga na nkosi mwemujihagulili mbaka kumulima wemwangatama nyenye amala vadadi winu vautamili lepi, na kwenuko yati mukuyihengela michapanga yingi yeyitenganizwi kwa mikongo na maganga. 37 Vandu voha vevavi mumilima yeakuvapeleka Bambu Chapanga yati vakuvavenga na kuvavevesa na kuvakangasa."

38 "Yati mwipanda mbeyu zamahela mumigunda yinu nambu yati mwibena padebe ndu muni mambalanguli yati gilya. 39 Yati mwipanda mizabibu na kuyikulugila na kuyiyangalila bwina, nambu yati mwibena lepi mizabibu yeniyo mewa divai yaki yati mwinywa lepi, muni yati ziliwa na vingokoko. 40 Yati mwivya na zeituni pamulima winu woha, nambu yati mwipata lepi na mahuta gaki muni yati zipoloka changakangala. 41 Yati muveleka vana va chigosi na va chidala nambu yati vivya lepi vinu muni yati vitoliwa kungondo kwa vandu va milima yingi. 42 Mikongo yinu yoha ya matunda na mabenu ginu goha yati giliwa na mambalanguli."

43 "Vayehe vevavii pagati yinu yati vivya na vindu vyamahele neju kuliku nyenye nambu nyenye yati mwivya yutiyuti. 44 Vene yati vakuvakopesa nyenye nambu nyenye mwivya lepi na chindu cha kuvakopesa, vena yati vakuvalongosa na nyenye yati mwivya pahi yavi."

45 "Makoto aga goha yati gakuvalandalila na kuvakolela nyenye mbaka mukomakeswa muni mwaluyidakili lepi lwami lwa Bambu Chapanga winu, na mwakamwili lepi malagizu gaki na mihilu yeavapelili. 46 Mambu genago yati givya ulangisu wa mang'aiso ga Bambu Chapanga kwinu na kwa viveleku vinu magono goha gangali mwishu. 47 Ndava muni Bambu Chapanga winu, peavamotisi kwa mota ndalindali, nyenye mwamuhengili lepi kwa kuhekelela na kwa mtima waku woha. 48 Bambu Chapanga, yati akuvaleta vamakoko kwinu na nyenye yati mukuvahengela. Na nyenye yati muvya na njala na njota na changawala na kwa ungangu wa vindu vyoha, mwene yati akuvakunga lingolingoli la lyuma musingi zinu na makoko venavo yati vakuvahengesa mahengu geginonopa mbaka vavakomekesa. 49 Bambu Chapanga yati akuvaletela vandu va mulima wa kutali, kuhuma kumwishu wa mulima, ngati linditi chelihelela kanyata kuzingila, vandu vemwangamanya chevilongela. 50 Vandu va mulima wenuo, veviyogopesa pamihu, vakuvawonela lepi lipyana vagogo amala vasongolo. 51 Nyenye yati mwifwa na njala. Yati vakuvalekela lepi vyakulya amala divayi amala mahuta amala ng'ombi amala mambelele mbaka vavakomakesa. 52 Vandu venavo yati vakuvatindila pandi zoha za miji yinu pamulima wemupewili na Bambu Chapanga, na luwumba zinu zemukuzihuvalila yati zigwiswa mbaka pahi."

53 "Lukumbi pemutindilwa na kung'aiswa na vamakoko vinu, yati mwivya na njala mbaka mwilya nyama ya vana vinu vemupewili na Bambu Chapanga winu. 54 Hati mundu mngolongondi neju mwealeliwi bwina yati akumnyima chakulya mlongo waki, mdala waki mwamganili na vana vaki mweisigalila, 55 na mwene yati akumupela lepi hati mundu mumonga nyama ya vana vaki veakuvalya. Yati chisigalila lepi chindu chochoha ndava yinu lukumbi vamakoko pavakuvatindila na kuvang'aha pamiji yinu yoha. 56 Hati mdala mweavi na vindu vyamahele na mwealeliwi bwina, yula angalinga kugenda kuhamba kwokwoha yati ikita chichocho. Mwene yati ivya munotaji kwa mngana waki mweamuganili na kwa msikana waki, 57 lukumbi lwenulo lwa kuzangilwa, yati akumulya mwana waki mng'enya pamonga na litumbu lelihuma pamwishu peimala ndu kuveleka, changali hati mngana waki mweamuganili kumanya amala mwana waki kumanya."

58 "Ngati mwangavya vasadikika kukita malovi goha ga mihilu iyi gegayandikwi muchitabu ichi na ngati mwangalitopesa na kulilumba lihina likulu na leliyogofwa la Bambu Chapanga, Chapanga winu, 59 hinu Bambu Chapanga yati akuvaletela nyenye pamonga na vana viveleku vinu mbunu wangalolekana, mang'aiso gakulu gangalamiswa kwa miyaka yamahele, na matamu gakulu kwa miyaka yamahele. 60 Yati akuvaletela kangi matamu gala gemwayogopayi kumulima wa Misili, na genago yati gimalika lepi magono goha. 61 Kangi Bambu Chapanga yati akuvaletela matamu ndalindali na mang'aiso gangi gala gangayandikwa muchitabu ichi cha malagizu mbaka mkomiwayi. 62 Pamonga kuvya nyenye ndi mwavamahele ngati ndondo za kumahundi, nambu yati mwivya mwavadebe ndu muni mwahiyidakili lepi Bambu Chapanga winu. 63 Ngati cheyamuganisi Bambu Chapanga kuvapela mota na kuvakita muyonjokesa kuvya mwavamahele, ndi cheyikumganisa kuvakitila mambu gahakahu na kuvakomakesa. Na nyenye yati muhumiswa mumulima wula wemwihamba kuutola uvya winu."

64 "Bambu Chapanga yati akuvapechengana mumilima yoha, tangiya upandi umonga wa mulima mbaka wungi na kwenuko yati mukuhifugamila michapanga hingi yeyitengenizwi kwa mikongo na maganga, mwangaifugamila nyenye na vadadi vinu mewa vayimanyili lepi. 65 Pagati ya vandu va milima yeniyo yati mwitama lepi yegwa amala kujova pandu apa ndi pitu tavete. Nambu kwenuko Bambu Chapanga yati akuvapela wogohi mumitima yinu, na mihu gangalola bwina na kulyungalyunga kwa mtima. 66 Yati mwitama cha kulyungalyunga magono goha kuvya makoko vinu yati vakuvakoma. Mwivya na wogohi muhi na kilu amala yati mwivya lepi na uchakaka wa wumi. 67 Mitima yinu yati yimema wogohi na yati mukuchiyogopa kila chemukuchiwona. Lukela yati mwijova mbanga ngayivye kimihi, na peyihika chimihi mwijova mbanga ngayivye lukela. 68 Bambu Chapanga yati akuvakweha muwatu na kuvawuyisa ku Misili, lugendu lweajovili kuvya yati mwihamba lepi kavili. Kwenuko yati mlinga kujigulisa mwavene kwa vamakoko vinu muvya vavanda, nambu kawaka mundu mweakuvagula nyenye."