1 Musa akayendelela kujova, "Nivapeli muhagula mota amala likoto. Mambu genaga goha pegakuvakolela kula kwemwitama kumulima wula Bambu Chapanga kweavapechanginisi yati mukumbuka kuhagula gala genivapelili. 2 ngati nyenye na viveleku vinu yati mumuwuyila Bambu Chapanga winu kwa mtima winu woha na kuyidakila mihilu yaki yenivapeli lelu, 3 ndi Bambu Chapanga winu, yati akuvawonela lipyana na kuvawuyisila mambu ginu gabwina na yati akuvavika pamonga kuhuma mumilima yeavapechangini na kuvakita mambu ginu gavahambila bwina kavili. 4 Hati ngati mpechangini pandu patali neju pamilima, Bambu Chapanga, Chapanga winu yati akuvika pamonga na kuvawuyisa, 5 mwene Bambu Chapanga yati akuwuyisila mulima wewavi wa vagogo vaku, veve yati ukuutola kuvya waku. Mwene yati akukita mambu gaku gakuhambila bwina neju na kuvakita muvya vamahele kuliku vagogo vinu. 6 Bambu Chapanga winu yati akuvakita nyenye pamonga na viveleku vinu muvya na mitima yeyikumuyidakila muni mumgana mwene kwa mitima yinu yoha na mipungu yinu yoha na muhotola kutama. 7 Bambu Chapanga winu, yati iwusa makoto genago kuhuma kwaku na kuvakolela makoko vinu vevavang'ahili. 8 Na nyenye mukumyidakila Bambu Chapanga na kukamula mihilu yaki yoha yenikuvapela lelu. 9 Bambu Chapanga, Chapanga winu yati akuvakita mambu ginu gavahambila bwina mukila chemwikita, yati mwivya na vana vamahele na ng'ombi zamahele na migunda yinu yati yipambika mabenu. Muni yati igana kangi mpata vindu vymahele ngati chaganayi kuvakita vagogo vinu vapata vindu vyamahele, 10 ngati ndu muyidakila na kuhenga malagizu gaki gegayandikwi muchitabu chenichi cha malagizu na kumuwuyila Bambu Chapanga winu kwa mitima yinu yoha na kwa mipungu yinu yoha."

11 "Muni mihilu yenikuvalagiza lelu yinonopa lepi kwinu amala yivi lepi kutali na nyenye. 12 Zivii lepi kunani kwa Chapanga mbaka mujove, ‘Yani mweikwela kunani kwa Chapanga kutiletela na kutikokosela muni tiyidakila?’ 13 Amala gavi lepi kumwambu ya nyanja, mbaka mujove yani, ‘Mweikupuka kuhamba kutitolela muni atikokosela na tiyidakilayi?’ 14 Lepi, nambu gavii papipi na nyenye neju, gavii mumilomo yinu na mumitima yinu muhotola kuziyidakila."

15 "Yuwanila, lelu nivapela muhagula pagati ya gabwina na gahakahu, pagati lifwa na wumi. 16 Nikuvalagiza lelu kuvya mumgana Bambu Chapanga winu, mukita geigana mulanda malagizu gaki na mihilu yaki, penepo ndi pemutama na kuyonjoseka. Bambu Chapanga winu, yati akuvamotisa mumulima wemuhamba kuutola uvya winu. 17 Nambu mukakongewayi na kubela kumuyuwanila, na mukahutwa kufugamila na kuyigundamila michapanga yingi, 18 nikuvajovela yati mukomiwa. Yati mutama lepi kwa lukumbi lutali kumulima wemwihamba kuutola uvya winu, kumwambu ya mfuleni Yoludani. 19 Lelu nikuzikemela kunani na pamulima vibwela kuvya msaidi kuvya nivapeli muhagula lifwa amala wumi, ndi pagati ya na mota amala likoto. Nambu muhagula wumi muni muhotola kutama, 20 na muhotola kumugana Bambu Chapanga winu, muyidakila linenu laki na mumulanda, muni kwakukita chenicho yati mwitama miyaka yamahele pa mulima ndi Bambu Chapanga winu avajovili vagogo vinu, yati akuvapela Abulahamu na Isaka na Yakobo kuvya yati akuvapela."