1 "Kangi tang'anamwiki takwelili kuhamba Bashani. Nkosi Ogu ahumili na vandu vaki voha kutovana na tete papipi na muji wa Edelei. 2 Nambu Chapanga anijovili, ‘Kotoka kumyogopa, muni yati nikukitili umkamula mwene pamonga na vandu vaki na mulima waki. Ukumkitila ngati chawamkitili Sihoni nkosi wa Vaamoli mwaatamayi ku Heshiboni.’ "

3 "Hinu Bambu Chapanga atikili timkamula nkosi Ogu wa Bashani pamonga na vandu vaki, tikavakomakesa voha ndi, asigalili lepi hati mmonga. 4 Tatolili kuvya yitu miji yaki yoha, kawaka hati muji umonga wetaulekili. Miji yoha yavanyagili yavi sitini, ndi kujova, pamulima woha wa Aligobu wewavi pahi ya utalalila na nkosi Ogu wa Bashani. 5 Miji yoha yeniyo yavili na luwumba lutali zezavili na mamilyangu na makomeo. Kwavili mewa kwavi na hijiji yamahele yangatindisiwa luwumba. 6 Ku miji wenuwo tayongomisi vindu vyoha, tahalabisi na kukoma vagosi na vadala na vana ngati chatakitili ku miji ya nkosi Sihoni wa Heshiboni. 7 Nambu mifuya yoha na vindu vingi vyoha tatolili na kuvya vitu."

8 "Lukumbi lwenulo tatolili kuvya witu mulima wa vala vankosi vavili va Vaamoli vevatamayi kumwambu ya mfuleni Yoludani pagati ya mfuleni Alinoni na chitumbi cha Helimoni. 9 Vasidoni vikemela chitumbi chenicho Silioni, nambu Vaamoli vikemela Senili. 10 Tatolili kuvya yitu miji yoha ya pandu paselede muvitumbi na pandu poha pa Gileadi na Bashani mbaka ku Saleki na ku Edelei, miji ya nkosi Ogu yeyivii ku Bashani. 11 Nkosi Ogu mwene ndu ndi mweasigalili pagati ya Valefai. Chitanda chaki chechatenganizwi kwa lyuma, chavili na utali wa mita mcheche na upana wa mita zivili kulandana na hipimu yeyiyovaliki, chitanda chenicho chakona chivi mumiji ya Vaamoli uko ku Laba."

12 "Patamali kuutola mulima wenuwo, tavapelili makabila ga Leubeni na Gadi pandu pepavili kaskazini mwa Aloeli papipi na Alinoni na yapinga ya pandu pa hitumbi ya Gileadi, pamonga na miji yaki. 13 Kangi navapelili yapinga ya likabila la Manase pandu pepasigalili pa Gileadi pamonga na Bashani yoha yeyatalaliwi na Ogu, yaani pandu poha pa Aligobu. Mulima woha wa Bashani ndi wamanyikini ngati mulima wa Valefai."

14 "Mundu mmonga wa likabila la Manase lihina laki Yaili, anyagili pandu poha pa mulima wa Aligobu, ndi Bashani mbaka mumibaka ya Geshuli na Maaka. Hijiji yoha ahipelili lihina laki, mbaka lelu yimanyikana ngati hijiji ya Hawoti Yaili."

15 "Vandu va lukolo lwa Makili va likabila la Manase navapelili mulima wa Gileadi, 16 na vandu va makabila ga Lubeni na Gadi navapelili mulima woha kuhuma Gileadi mbaka mfuleni Alinoni. Mubaka wavi upandi wa kusini wavi pagati ya mfuleni na upandi wa kasikazini wavili mfuleni Yaboki ndi weubakana na mulima wa Vaamoni. 17 Mubaka wavi kwa upandi welitipama lilanga wahikili mbaka mfuleni Yoludani kwa upandi wa kaikazini, wayendalili mbaka nyanja Galilaya kwa uapndi wa kusini, weyandalili mbaka nyanja ya mwinyu na upandi welihumila lilanga mubaka wakimwahikili mbaka mivitumbi vya Pisiga."

18 "Lukumbi lula navapelili malagizu aga, ‘Bambu Chapanga winu avapelili mulima uwu upandi welihumila lilanga wa mfuleni Yoludani uvya winu. Hinu nyenye manjolinjoli pagati ya valongo vinu, mtola vindu vya ngondo mkupuka mfuleni Yoludani kuvatangatila makabila gangi ga Isilaeli kutola milima yavi. 19 Nambu vadala vinu na vana vinu na mifuya yinu, nimanyili muvi na mifuya yamahele, venavo yati visigalila mumiji yenivapelili. 20 Muvatangatila valongo vinu Vaisilaeli mbaka peavitola mulima wula Bambu Chapanga akuvapela kwelitipama lilanga la mfuleni Yoludani, na mbaka pala Bambu Chapanga peakuvakita vatama kwenuko kwa uteke, ngati cheavakitili kwinu. Pagenago yati muhotola kuwuya pamulima winu uwu wenivapelili uvya winu.’ "

21 "Kangi namjovili Yoshua, ‘Veve ulolili kwa mihu gaku mambu goha gala Bambu Chapanga waku geavahengili vankosi vavili, Sihoni na Ogu, hinu, mwene yati akuvahengela mewa vankosi va milima yoha yemwinyaga. 22 Mkotoka kuvayogopa, muni Bambu Chapanga winu, ndi mweitovana na venavo ndava yinu.’ "

23 "Lukumbi lwenulo namyupili neju Bambu najovili, 24 ‘Ee Bambu Chapanga, nimanyili unilangisi nene namuhengaji waku ukulu waku na uhotola waku. Muni kuvii na chapanga yoki kunani amala pamulima mwaihotola kukita mambu gakulu na gakukangasa ngati geukugakita veve? 25 Chondi nikuyupa nikupuka mfuleni Yoludani, muni niulole mulima wenuo wabwina kwelitipama lilanga mwa Yoludani, wula mulima wabwina wa hitumbi pamonga na vitumbi ya Lebanoni.’ "

26 "Nambu Bambu Chapanga aniyomili ndava yinu, akabela kuniyuwanila. Pahala paki anijovili, ‘Yikolili! Kotoka kujova kangi linenu ili. 27 Kwela mbaka kunani ya chituvilu cha chitumbi cha Pisiga ulola bwina upandi kwelitipama lilanga na, kasikazini na kusini na kwelihumila lilanga, na kuulola mulima wenuwo, nambu veve yati ukupuka lepi mfuleni Yoludani. 28 Nambu mulagiza Yoshua, mkangamalisa na umsindimalisa mtima, muni mwene yati mweilongosa vandu ava vakupuka mfuleni mbaka kumwambu, kuutalila mulima weukuulola.’ "

29 "Ndi tasigalili balapala palikemba papipi na miji wa Beti Peoli."