1 "Ngati kukavya na vandu vavili vevikomana na vakahamba kulibanji la mihalu na mmonga akawonekana kuvya angabuda, na yungi abudili, 2 Ngati yula mweahamuliwi apewili mbunu wa kutovewa ndonga, ndi muhamula mihalu yati akumjovela agona pahi na kumtovewa ndonga kulandana na kubuda kwaki. 3 Mwihotola kumutova ndonga alubaini mweabudili nambu mkotoka kuyonjokesa, nambu mukamtovayi neju ya zenizo mwivya mumupeli soni mlongo winu."

4 "Mkotoka kuyikunga ng'ombi mulomo peyihengeswa lihengu la kuwulula mabenu."

5 "Ngati valongo vavili vitama pamonga na mmonga akafwayi changali kuvya na mwana mgosi, penapo lipwela akotoka kugegewa na mundu wa lukolo lungi. Mlongo waki mweafwili iganikiwa kumuhala lipwela mwenuyo. 6 Mwana wa kutumbula wavi wa chigosi ndi yati ivalangiwa kuvya mwana wa mweafwili yula, muni lihina laki likoto kuyaga pa Isilaeli. 7 Nambu ngati mlongo mwenuyo wa mweafwili amuganili lepi lipwela mwenuyo, ndi lipwela mwenuyo iganikiwa ahamba kwa vagogo va muji wenuwo na avajovela, ‘Mlongo wa mngana wangu mweafwili ibela kunigega muni niyendelesa lihina la mlongo waki pa Isilaeli, aganili lepi kunikita ngati cheanikitilayi mungana wangu mweafwili.’ 8 Penapo vagogo va muji wenuwo yati vakumukemela mgosi mwenuyo na kulongela naku, nambu ngati akona ibela kuvya aganili lepi kumugega lipwela uyu, 9 lipwela mwenuyo yati akumuhambila mlongo wa mngana waki mweafwili palongolo ya vagogo va muji, na kumuhula chilatu chimonga na kumuhunyila mata pamihu na kujova, ‘Chenichi ndi cheyiganikiwa kumuhengela mundu mwaibela kuyendelesa uveleku wa mlongo waki mweafwili.’ 10 Valongo va mundu mwenuyo yati vimanyikana pa mulima wa Isilaeli ngati, ‘Valongo va mweahuliwi chilatu.’ "

11 "Ngati vagosi vavili vitovana na mdala wa mgosi mmonga akabwela kumutangatila mngana waki kwa kumukamula kuwotelu mgosi mweitovana na mngana waki, 12 mdala mwenuyo mumdumulayi chiwoko chaki, mkoto kumuwonela lipyana."

13 "Mkoto kuvya na vipimilu vya kupimila vya namuna zivili: Vingi vyevitopa na vingi yeywa mkotoka kutumila vipimu vya udesi. 14 Mkoto kuvya na vipimilu vivili munyumba zinu, chingi chivaha na chingi chidebe. 15 Muhengela maganga na vipimilu vya chakaka, muni muhotola kutama miyaka yamahele pamulima wemupewa na Bambu Chapanga winu. 16 Bambu Chapanga winu, akuvayomela vandu vevikita mambu ngati aga."

17 "Mukumbukayi chevavakitili Vamaleki pemwavii munjila kuhuma ku Misili. 18 Mkumbuka chavavazangili kunjila pamwavili ngolongondi na kuvatova vala voha vevabwelili mumbele yinu kuni vatotokili. Vaamaleki vamuyogwipi lepi Chapanga. 19 Hinu, Bambu Chapanga winu, lukumbi peakuvapumulisa ndava ya kutovana na makoko vinu voha vevakuvatindila pamulima wamupewili na Bambu Chapanga winu, uvya winu, penapo yiganikiwa muvakoma Vaamaleki voha."