1 "Lukumbi Bambu Chapanga winu, peivya amali kuvakomakesa vandu va mulima wavi na kuvapela nyenye, na pemuvya mumali kuutola uvya winu na kutama munyumba zavi, 2 yati muhagula miji hidatu pagati ya mulima weavapelili Bambu Chapanga winu, muni muhitalalila. 3 Mutengeneza njila na kuulekenganisa mulima pandi zidatu wemupewili na Bambu Chapanga winu, muyitalalilayi, muni yeyoha mweakumukoma mundu changali kugana ahotola kutilalila mwenumo."

4 "Ngati mundu akamukomayi muyaki changagana, na avii lepi likoko vaki, ihotola kutilalila mu muji umonga pagati ya miji yeniyo hidatu ndava ya kuusangula wumi waki. 5 Luhumu, mundu mweihamba kudumula sagala na muyaki kudasi, peidumula sagala ndi livagu likaholomoka muchaka, na likamukoma muyaki, mundu mwenuyo ihotola kutilalila mumuji umonga wa miji yeniyo, ndava ya kusangula wumi waki. 6 Nambu ngati muji wa kutilalila ngauvya mmonga ndu kangi uvi kutali neju ndi yula mweilipisa kwa ligoga ihotola kumlanda amkamula na kumokama mundu mwenuyo mweamkomili muyaki pamonga iganikiwa lepi akomiwayi na venavo vavili vavi lepi makoko penapo kadeni. 7 Ndava yeniyi ndi nene nikuvalagisa muvagula miji hidatu ya kutilila."

8 "Ngati Bambu Chapanga winu, ngati yati akuyiyongesa mibaka ya mulima winu, ngati cheavalapakisi vagogo vinu, ni mwene akavapela mulima woha ngati chajovili akuvapela vagogo vinu, 9 na nyenye mukakitayi goha genikuvalagisa lelu, mukamugana Bambu Chapanga winu, na kukamula malagizu gaki magono goha, ndi yati muyonjokesa miji hingi hidatu pamonga na hidatu iyi ya hinu. 10 Mukitayi chenicho muni mundu yeyoha mwangabuda akotoka kukomiwa pamulima weakuvapela Bambu Chapanga uvya winu, na chenicho kuvakita muvya na mhalu wa kukoma."

11 "Nambu mundu akamvenga mlongo waki, akambajamila na akamzangila na kumkoma, na mwene akatilalila muji umonga wa miji yeniyo, 12 penapo vagogo va muji wenuo yati vilagiza vandu vakamukamulayi kuhuma kwenuko kweatilalili na kumugotola kwa mweilipisa kukomiwa lifwa la mundu yungi, na mwene akomiwayi. 13 Mkotoka kumuhengela lipyana. mundu mweamkomili muyaki. Ngati mwigana kutama kwa uteke, yiganikiwa muvakomayi vevikoma vayavi changali kubuda pa Isilaeli."

14 "Mkotoka kuwusa alama ya mibaka yeyavikiwi kadeni ya vandu vevavii papipi yinu, pamulima wemupewa na Bambu Chapanga winu, muutalalila."

15 "Linenu la msaidi mmonga lihotola lepi kujova uchakaka kuuvala uhakahu wowoha wa kukoma amala chochoha cheakitili. Giganikiwa malovi ga vasaidi vavili amala vadatu ndi yati yiyidakiliwa. 16 Akahumalila msaidi mweigana kumlemasa mundu yungi kwa kumkupakisa ga udesi mundu yungi ndava ya kubuda, 17 ndi voha vavili vevikomana vahamba pandu pa kumuyupila palongolo pa Bambu Chapanga, muni vahamuliwa na vamteta va Chapanga na vaamula vevavii mulihengu ligono lenilo. 18 Vahamula yati vikotakesa mhalu wenuwo bwina, ndi vakamanyayi kuvya msaidi ajovili gaudesi na amtakili gaudesi mlongo waki, 19 mukumukitila chilachila ngati yula mweatakiliwi cheaganikiwi kukitiwa. Chenicho ndi chemwisa mambu gahakahu pagati yinu. 20 Kangi vandu vangi veviyuwana yati viyogopa, na uhakahu ngati wenuwu yati uhengeka lepi kangi kwinu. 21 Namuna yeniyo mkotoka kuvahengela lipyana vandu ngati venavo, wumi yati ulipipwa kwa wumi na lihu kwa lihu na linu kwa linu na chiwoko kwa chiwoko na chigendelu kwa chigendelu."