1 "Mihilu yoha yenikuvapela lelu, mganikiwa kukamula na kuzilanda, muni mpata kuvya mumi na kuyongaseka, mpata kuyingila na kutola mumlima wula Bambu Chapanga winu wealagizi kwa chilapu kwa vagogo vinukuvya akuvapela nenye. 2 Mukumbuka chila Bambu Chapanga winu, chavalongwisi mulugendu lutali kupitila kulugangatu mulukumbi lwa miyaka alubaini, muni avakita muvya vangolongondi na kuvalinga muni amanya gemuholalela mumitima yinu, na ngati mukamula mihilu yaki amala lepi. 3 Avangolongwisi, akavaleka na njala nambu mwanakandahi akavapela mana mulya, chakulya mwangachimanya mewa vagogo vinu vachimanyili lepi. Akitili chenicho muni avawula kuvya mundu ivya lepi mumi ndava ya libumunda ndu nambu kwa kila linenu leijova Bambu. 4 Mulukumbi ulo lwa miyaka alubaini nyula zinu zalalili lepi amala magendelu ginu kuhimba. 5 Mmanya kuvya Bambu Chapanga winu akuvabuna ngati dadi chakumbuna mwana waki. 6 Hinu, mkamula mihilu yaki Bambu Chapanga winu, muni muhotola kukita gala geigana mukita na kumtopesa mwene. 7 Ndava muni Bambu Chapanga winu akuvaleta mumlima wabwina, mulima weuna vikapela na vinyepa na manji gegihuma kunyasi na muvitumbi, 8 mulima weuna nganu na shayili na zabibu na mitini na mikomamanga na mahuta ga mizeituni na wuchi. 9 Kwenuko yati mwipata chakulya chamahele na yati mwipungukiwa lepi na chindu. Matalahu gaki gavi na madini ga lyuma na muhitumbi yaki muhotola kugima shaba. 10 Yati mwilya na kuyukuta, yati mkumsengusa Bambu Chapanga winu ndava ya mulima wabwina wevapelili."

11 "Mkangamala mkotoka kumkosewa Bambu Chapanga winu, kwa kubela kukamula mashaliti gaki na mihilu yaki na malagizu gaki genivalagizi lelu. 12 Mkamala kulya na kuyukuta na kujijengela nyumba yabwina na kutama mwenumo, 13 na lukumbi ng'ombi na mambelele ginu na zahabu na madini ga feza zinu, na kila chindu chemuvili nachu pechiyonjokeseka, 14 hinu mkotoka kumeka na kumkosiwa Bambu Chapanga winu, mwavawusili kuhuma mulima wa Misili pandu pemwavili vavanda. 15 Mwene ndi mwaavalongwisi mulugangatu lula luvaha na lwakuyogopesa, lweluna mayoka gana chimatila chikali na vipilili, mumlima wangali manji, avahumisili manji kuhuma mulitalahu lelinonopa. 16 Kangi ndi mweavalisili mana kulugangatu, chakulya chila hati vagogo vinu vachimanyili lepi. Akitili chenicho muni avangolongosa na kuvalinga muni pamwishu apata kuvakitila mambu gabwina. 17 Hinu, mujiyangalila mkotoka kujijovela: Tipatili vindu vyamahele ndava ya uhotola na makakala gitu tavete. 18 Nambu mkumbuka kuvya Bambu Chapanga winu, ndi mweakuvapela uhotola wa kupata vindu vyamahele. Ikita chenicho ndava ya kukangamalisa lilaganu leakitili na vagogo vinu mbaka lelu. 19 Ngati mkamkosiwa Bambu Chapanga winu, na kulanda michapanga yingi ndava ya kuyihengela na kuyigundamila, lelu iyi nikuvahakali kwa ukali chakaka yati mkomakeswa. 20 Ngati mukuluyidakila lepi lwami lwa Bambu Chapanga winu, mwene yati akuvakomakesa ngati vandu va milima chevakomakiswi palongolo yinu."