1 "Mselebuka mumwehi wa Abibu yani mwehi wa kutumbula wa mwaka, kuselebukila Pasaka kwa utopesa wa Bambu Chapanga winu. Muni mwehi wenuo Bambu avawusili kumulima wa Misili lukumbi lwa kilu. 2 Yati muwusa luteta lwa Pasaka kuhuma mumifuya yinu ya mambelele amala ng'ombi kwa utopesa wa Bambu Chapanga pandu peapahagwili mwene ndi mumfugamila. 3 Mkotoka kulya nyama yeniyo pamonga na mabumunda gegasopiwi ngemeku. Mulukumbi lwa magono saba yati mwilya mabumunda gangasopewa ngemeku ndi mabumunda genago gikemelewa mabumunda ga mang'aiso muni mwawukili ku Misili kanyata, hinu mulukumbi lwoha lwemwitama yati mkumbuka ligono lila pemwawukili ku Misili. 4 Mulukumbi lwa magono saba mundu yoyoha pamulima winu akotoka kuvika ngemeku munyumba yaki, na nyama ya chinyama mweawusiwi luteta kimihi ya ligono la kutumbula yikotoka kusigalila mbaka lukela."

5 "Katu mkotoka kuwusa luteta lwa Pasaka pamuji wowoha weakuvapela Bambu Chapanga winu, 6 nambu yati muwusa pandu palapala ndi Bambu Chapanga winu peihagula pandu pa kumfugamila, penapo ndi pemuwusa luteta lwa Pasaka kimihi, lilanga palitipama, lukumbi ngati lulalula lwemwawukili ku Misili. 7 Nyama yeniyo yati mukuyiteleka na kuyilya pandu palapala peahagwili Bambu Chapanga winu, lukela yaki yati muwuyayi mumandanda ginu. 8 Mumagono sita yati mwilya mabumunda gangali ngemeku, na muligono la saba yati kwivya na mngonganu uvaha wa kumfugamila Bambu Chapanga winu na mkotoka kukita lihengu loloha ligono lenilo."

9 "Yati mvalanga majuma saba, yati mtumbula kuvalanga kuhumila ligono la kutumbula kubena mabenu. 10 Kangi yati Mselebuka Majuma ndava ya kumtopesa Bambu Chapanga winu, kwa kuwusa luteta lwa kugana kwinu, lwemuwusa kulandana na Bambu cheavamotisi. 11 Yati muhekelela palongolo ya Bambu Chapanga winu, nyenye pamonga na vana vinu vachigosi na vasikana vinu na vatumisi vinu na Valawi vevavi pamiji yinu na vayehe na vakiva na valipwela vevitama pamonga na nyenye. Mkita chenichi pandu pepahaguliwi na Bambu, ndava ya kumfugamila. 12 Mkumbuka kuvya mwavili vavanda kula ku Misili, mlanda malagizu kwa uchakaka."

13 "Mkamala kukusanya mabenu ginu goha na kuminya zabibu zinu, mselebuka Mselebuko wa Vindanda mulukumbi lwa magono saba. 14 Yati mkita mselebuko wenuwo, nyenye pamonga na vana vinu vachigosi na vachidala na vatumisi vinu na Valawi na vayehe na vakiva na valipwela vemutama nawu mumiji yinu. 15 Kwa magono saba yati mukumkitila mselebuko ndava ya kumtopesa Bambu Chapanga winu pandu pala peahagwili Bambu. Ndava muni Bambu Chapanga winu yati akuvamotisa nyenye mumabenu ginu goha na mahengu ginu ga mawoko ginu ndi pemwiheka njwee."

16 "Kila mgosi wa mulima winu yati ibwela palongolo ya Bambu mala zidatu kila mwaka pandu peahagwili: Lukumbi lwa mselebuko wa mabumunda gangali ngemeku na mselebuko wa Majuma lukumbi lwa Mselebuko wa Vindanda. Mundu yeyoha akotoka kuhamba palongolo ya Bambu changali chindu. 17 Kila mmonga yati iwusa kulandana na mota yevapewili na Bambu Chapanga winu."

18 "Yati muhagula vahamula pamonga na vatangatila kuhuma mukila likabila linu mukila muji yinu ndi Bambu Chapanga winu, avapelili na vene yati viahamula vandu changali kuvaganisila. 19 Mkotoka kuyagisa uchakaka, mewa mkotoka kuvya na uganisilu. Mkotoka kuyidakila kutola swinda, muni swinda yikoyosa mihu na kuhamula changaganikiwa kwa mundu angabuda. 20 Muhamula kwa kulanda gala geigana Chapanga ndu, muni mpata kutola mulima uvya winu wula wemupewili na Bambu Chapanga winu."

21 "Mkotoka kuyimika nguzo ya mbawu ya chapanga wa chidala Ashela pamuhana ya pandu pa kuwusila teta pemukumjengela Bambu Chapanga winu. 22 Amala mkotoka kuyimika nguzo ya maganga za kuzigundamila michapanga ndava Bambu akuzivenga."