1 Musa avakemili Vaisilaeli pamonga, akavajovela, "Nyenye Vaisilaeli, muyuwanila mihilu na malagizu genikuvapela palongolo yinu lelu. Mujiwula genago na kugahenga kwa uchakaka. 2 Bambu Chapanga, Chapanga witu akitili lilaganu na tete pachitumbi cha Sinai. 3 Akitili lepi lilaganu lenilo na vagogo vitu ndu, nambu akitili na tete tavoha mwetivili mumi lelu iyi. 4 Bambu alongili na nyenye mwayuwini hotohoto kuchitumbi pagati ya motu. 5 Lukumbi lwenulo nene nayimili pagati yinu na Bambu, navakokosili gala geajovili ndava muni nyenye mwayogwipi motu wula na mwakwelili lepi kuchitumbi. Bambu ajovili naha."

6 " ‘Nene ndi Bambu Chapanga waku, mwanakuwusili kumulima wa Misili, kwewavili muuvanda.’ "

7 " ‘Kotoka kufugamila michapanga yingi nambu nifugamila nene ndu.’ "

8 " ‘Kotoka kujikitila michapanga ya vimong'omong'o vya kuhongola amala luhumu lwa chindu chochoha chechivili kunani, amala chechivili pamulima amala chechivili mumanji pahi ya mulima. 9 Kotoka kuvigundamila na kufugamila, muni nene ndi Bambu Chapanga waku, nina wihu. Nikuvabuna vana uhakau wa dadi zavi, hati chiveleku cha datu na cha mcheche cha vala vevakunivenga. 10 Nambu nikuvalangisa uganu kwa maelufu ya viveleku vevakunigana na kuyidakila mihilu yangu.’ "

11 " ‘Kotoka kuliluwula lihina la Bambu Chapanga waku kwa uhakaua, nene Bambu Chapanga yati nileka lepi kumbuna yoyoha mweihengela lihina langu kwa mambu gahakau.’ "

12 "Mkamula Ligono la Kupumulila na kuyikita ndava ya Bambu, ngati nene Bambu Chapanga waku, chanikulagizi. 13 Mumagono sita kita mahengu gaku goha, 14 nambu ligono la saba ndi Ligono la Kupumulima lelivikiwi ndava yangu. Ligono lenilo veve kotoka kukita lihengu loloha, amala mwana waku amala msikana waku amala mvanda waku mgosi amala mdala ng'ombi zaku amala punda waku amala chinyama chochoha amala myehe mwaavili mgati mwaku, muni mvanda waku mgosi amala mdala apumulila mewawa ngati veve. 15 Kotoka kukosiwa kuvya wavili mvanda kumulima wa Misili, na nene Bambu Chapanga waku, nakuwusili kwenuko kwa makakala na uhotola wangu uvaha, ndi mana nikulagizi kamula Ligono la Kupumulila."

16 " ‘Vatopesa dadi na nyina waku, ngati nene Bambu Chapanga waku, chanikulagizi, kita chenicho muni utama magono gamahele na mambu gaku gakuhambila bwina ku mulima wenikupela.’ "

17 " ‘Kotoka kukoma.’ "

18 " ‘Kotoka kukita ukemi.’ "

19 " ‘Kotoka kuyiva.’ "

20 " ‘Kotoka kujova udesi kwa muyaku.’ "

21 " ‘Kotoka kumnogela mdala wa muyaku, amala nyumba yaki amala mgunda waki amala mvanda waki mgosi amala mdala amala ng'ombi zaki amala punda zaki amala chindu chochoha cheavili nachu myaku.’ "

22 "Genaga ndi malovi gala Bambu Chapanga, avajovili mngonganu winu woha kwa lwami luvaha kuchitumbi kuhuma mumotu na lihundi livaha lila na chitita. Ndi ayongizi lepi chindu pagenago. Kangi agayandiki panani ya vibawu vivili vya maganga akanipela."

23 "Lukumbi pamwayuwini lwami kuhuma pagati ya chitita chila, kunani ya chitumbi chila chechayaka motu, vachilongosi voha va makabila ginu na vagogo vinu vanibwelili, 24 vakajova, ‘Yuwanila! Bambu Chapanga witu, atigukubukuli ukulu na uvaha waki, tiyuwini lwami lwaki kuhuma pagati ya motu wula. Lelu iyi timuwene Chapanga ilongela na mundu, namundu akona mumi. 25 Ndava kyani kujivika muhatali ya lifwa? Motu uvaha wula yati ukutikomakesa? Tivi na uchakaka yati tifwa ngati tiyuwini lwami lwa Bambu Chapanga witu, akalongela kavili. 26 Wu, mundu yoki mwawahi kumyuwana Chapanga mwavili mumi ilongela kuhuma pagati ya motu ngati chatamuyuwini tete na akasigalila mumi? 27 Mbanga veve Musa uhamba papipi, ukayuwanila goha gegijova Bambu Chapanga witu, kangi ubwela utijovela mambu ago goha geakujovela. Tete yati tikugayuwanila na kugalanda.’ "

28 "Bambu Chapanga, ayuwini malovi ginu ago, akanijovela, ‘Nigayuwini malovi gevakujovili vandu ava, goha gevagajovili ndi gabwina. 29 Ngavivya na maholo ngati aga na kunitopesa na kulanda mihilu yangu yoha pamahele! Mambu gavi goha ngagahambi bwina, vene na viveleku vyavi magono goha gangali mwishu. 30 Hamba kavajovela vawuya mumandanda gavi. 31 Nambu veve Musa sigalila bahapa na nene, muni nihotola kukujovela mambu goha na malagizu goha na mihilu zeuganikiwa kuvawula vagalanda ku mulima wula wenikuvapela uvya wavi.’ "

32 "Nyenye muvya na uchakaka mukakita ngati Bambu Chapanga winu cheavalagizi, mkita kila chindu kwa ubwina neju. 33 Yati mwilanda gala goha gemwalagizwi na Bambu Chapanga winu, muni mambu ginu gavahambila bwina na mpata kutama magono gamahele pa mulima wemutola kuvya winu."