1 "Yuwanila malovi gangu veve kunani kwa Chapanga,

na veve mulima yuwanila, malovi genijova.

2 Mawuliwu gangu yati gihelela ngati madonyo ga fula,

malovi gangu yati gihelela ngati mbetu.

Ngati muwela mumabenu gangakangala

ngati fula yeyitonya mbolimboli mumahamba gavisi.

3 Muni yati nikulilumba na kulikokosa lihina la Bambu Chapanga.

Yati nikuvajovela vandu, ndava ya ukulu wa Chapanga."

4 "Mwene ni muhotola mweakuvayunga, mahengu gaki gatimiliki,

njila zaki zoha ndi za chakaka,

mwene ni Chapanga msadikika mweangabuda,

mwene ikita mambu bwina, changali kumganisila mmonga.

5 Nambu nyenye mwavasadikika lepi kwaki, nyenye mwiganikiwa lepi kuvya vana vaki, ndava ya uhakahu winu,

nyenye ndi mwachiveleku chihakahu na chechiyagili.

6 Wu, yeniyi ndi njila ya kumulipa Bambu Chapanga,

nyenye mwavandu vayimu na mwangali luhala?

Wu, mwene lepi Dadi winu mweavawumbili,

mwavakitili na kuvawumba?

7 Mukumbukayi lukumbi lwelupitili,

muhololela viveleku vya kadeni vyevipitili, muvakota vadadi vinu yati vakuvajovela,

muvakota vagogo vinu yati vakuvajovela gegapitili.

8 Mweavi kunani peavapelili vandu va milima yingi pandu pakutama pavya pavi,

peavagavanisi vandu,

avikili mibaka ya vandu kulandana na mvalangu wa vandu va Isilaeli.

9 Muni Chapanga ajivikili vana va Yakobo vavya vaki, venavo ajihagulili kuvya vaki."

10 "Avakolili kumulima wa lugangatu,

lugangatu lwangali chindu lwelubuma mpungu,

akavayunga na kavavika bwina.

Ngati mundu cheiyunga lihu laki."

11 Ngati linditi chelikuvawula mawela gaki kumbululuka, akuvakamula bwina kuni adandisi magwaba gaki.

Bambu Chapanga, avayungili bwina Vaisilaeli muni vakotoka kugwa.

12 Bambu Chapanga mwene ndu ndi mweavalongwisi vandu vaki,

na pavii lepi Chapanga yungi wa kumtangatila.

13 Avapitisi pandu pepayinwiki pa pamulima,

vakalya mabenu ga kumigunda.

Vakalya wuchi wa mulitalau,

na mahuta ga zeituni kuhuma mundima yeyivi na maganga.

14 Ng'ombi zavi na mene zavi vahumisi mavele gamahele neju,

vavi na mambelele gabwina na mene na ng'ombi za Bashani na mene,

akavapela nganu yabwina neju na divayi yamupya vakanywa.

15 "Vandu va Isilaeli vawene na kung'anamukila Chapanga, vakakulupalila,

na kumema maleme na kunekenala,

kangi vakamuleka Chapanga mweavawumbili

vakamvevesa litalau la usangula wavi.

16 Vakamukita Chapanga avya na wihu na ligoga ndava vene vifugamila michapanga yavi miyehe.

Vakamuyomesa neju ndava ya vimong'omong'o vyavi vya kuyomesa.

17 Vayiwusili teta za kutinyiswa kwa mizuka yila yeyangavya chapanga,

vayihambalili michapanga yavangayimanya katu,

michapanga yamupya yeyahumalili magono ga papipi, michapanga yeniyo hati vagogo vavi katu vayifugamili lepi.

18 Mukamuleka Litalau mweavapelili wumi,

mukamukosiwa Chapanga mweavaveliki."

19 "Bambu Chapanga akalilola lijambu lenilo akayoma na akavaleka,

akavabela vana vaki vagosi na vadala.

20 Akajova, ‘Yati nikuvatangatila lepi,’

Nilola mwishu wavi uvya wuli,

muni vene ndi chiveleku chechiyagili, vana vangali sadika.

21 Vanikohakisi niwona wihu kwa chindu changavya Chapanga,

na kuniyomesa ndava ya vimong'omong'o vyavi.

Hinu yati nikuvakita vavawonela wihu vandu vangavamanya,

yati nikuvayomesa kwa kuhengela vandu vayimu.

22 Ligoga langu iyaka ngati motu

yati uyocha vindu vyoha mbaka ku mlima wa vevafwili.

Yati niyocha njwee mulima na vyevivili,

yati yitinyisa mikingisa ya vitumbi."

23 " ‘Yati nivika matovelu gamahele,

na yati nikuvatova mbaka migoha yangu yimalika.

24 Yati vifwa kwa njala,

yati vikomiwa kwa utamu uhakahu.

Yati nipeleka hinyama yeyivi na minu gakali gavazangila,

na mayoka gegana chimatila neju gavalumayi.

25 Yati mkomiwa kwa ngondo munjila,

na munyumba zinu yati zivya na wogohi.

Vasongolo na vakasikana vinu yati vikomiwa,

hati vana vevinyong'a pamonga na vagogolo vevana hulia.

26 Najovili nganivakomakisi njwee,

na kukita vandu voha vavakosiwa.

27 Nambu ndu navalekili lepi makoko vavi vameka,

kuvya ndi vevahotwili vandu vangu lukumbi nene namwene ndi mwenikitili mambu aga.’ "

28 "Vandu va mulia wa Isilaeli vangali luhala,

vandu avo vangali ubwina mugati yavi."

29 Ngavavi na luhala ngavamanyili ndava kyani vahotwili lepi,

ngavahotwili kumanya mwishu wavi yati uvya wuli.

30 Linjolinjoli mmonga wa likoko ihotola wuli kuvavinga manjolinjoli elufu yimonga wa Isilaeli,

amala manjolinjoli vavili va makoko vihotola wuli kuvavinga manjolinjoli elufu kumi va Isilaeli?

Nambu ngati Litalau wavi avatagili,

Bambu Chapanga wavi avalekili.

31 Hati vamakoko vitu vijova hotohoto,

chapanga wavi avi lepi na makakala ngati Chapanga witu wa Isilaeli.

32 Muni makoko wavi vahalabiki kwa mahakau ngati Sodoma na Gomola,

vavi ngati mizabibu yeyipambika mtunda gakali na gegana chimatila,

33 divayi yavi ndi ngati yitenganezwi kuhuma muchimatila chikali cha mayoka.

34 "Bambu Chapanga ikumbuka gala gevakitili vamakoko vaki,

ndi ilindila lukumbi chakaka muni avabuna.

35 Nene ndi mwenilipisa yati nikuvabuna,

lukumbi lwavi lwa kubuda,

kukomiwa kwavi kuhikili,

mwishu wavi ukuvabwelela kanyata. 36 Bambu Chapanga yati akuvakengelela vandu vaki

na kuvawonela lipyana vahengaji vaki.

Lukumbi peiwona makakala gavi gamaliki,

amala kawaka mweisigalili mkungiwa amala mwealekekiswi.

37 Ndi Bambu Chapanga yati akuvakota vandu vaki,

Yivii kwoki yila michapanga hinu,

Litalau lemwayijumbalili muni muvya wumi? 38 Yivi kwoki michapanga yemwayipelili teta zinu za kutinyisa,

na kunywa divai yinu yeyavi teta ya mnyeso?

Hinu yiyima kuvatangatila,

mleka yibwela kuvayunga."

39 " ‘Mulolayi kuvya nene ndi Chapanga,

na kawaka yungi.

Nene nikoma na kuvika mumi, nilemasa na nilamisa,

kawaka mweihotola kumusangula mundu yeyoha kuhuma mumawoko gangu.

40 Niyinula chiwoko changu kunani,

na kulapa kwa liina langu la magono goha gangali mwishu,

41 lukumbi penikulinola upanga wangu weung'asima,

na kugolosa chiwoko changu kuvahamula.

Yati nikuvalipisa vamakoko vangu

yati nikuvabuna vala vevakunivenga.

42 Migoha yangu yati yivya yidung'u neju kwa ngasi yavi,

na upanga wangu yati ukoma vandu vevakunibela,

Yati nikumleka lepi yeyoha mweitovana na nene, hati vevalemili na vakungiwa yati vifwa.’ "

43 "Nyenye milima muvalulutila vandu vaki,

muni mwene yati ilipisila ngasi ya vatumisi vaki,

yati akuvalipisa vamakoko vaki,

na kulekekesa mabudilu ga vandu vaki."

44 Vakabwela Musa pamonga na Yoshua mwana wa Nuni, vakajova malovi gala muni Vaisilaeli voha vakayuwana.

45 Musa peamalili kuvajovela vandu va Isilaeli malovi gala goha, 46 akavajovela, "Mugavikayi mumitima yinu malovi aga goha genivaluwulili lelu. Muvawula na vana vinu muni vagahengela kwa uchakaka malovi goha ga mihilu iyi ya Chapanga. 47 Muni mihilu iyi malovi gawaka lepi nambu mukayidakila mihilu iyi yati mwitama wumi wa magono gamaele pamulima wula wemwihamba kuutola uvya winu, kumwambu ya mfuleni Yoludani."

48 Ligono lilolo Bambu Chapanga, akamujovela Musa, 49 "Kwela kuchitumbi ichi cha Abalimu mbaka chitumbi cha Nebo cha mulima wa Moabu weulolesana na Yeliko, kangi ulola ku Kanaani, mulima wenikuvapela Vaisilaeli uvya wavi. 50 Kangi yati ufwilila kukoko kuchitumbi ngati muhaja waku Aloni cheafwili kuchitumbi chechikemiwa Holi, 51 Ndava muni nyenye mwavoha mwavavili mwanilangisi lepi usadikika nene palongolo ya Vaisilaeli ku manji ga Meliba, papipi na Kadeshi, kulugangatu lwa Sini, muni mwautopisi lepi nene palongolo ya Vaisilaeli. 52 Yati ukuulola mulima wenuwo palongolo yaku cha kutali, nambu yati uyingila lepi mumulima wenuwo wenikuvapela Vaisilaeli."