1 "Vamteta va Chapanga vala Valawi, ndi likabila loha la Lawi, yati vivya lepi ugavilu amala uhali wa ndima pamonga Isilaeli. Yati vitama kwa teta zeviwusa vandu ndava ya Bambu za kutinyiswa kwa motu, ndava muni wenuo ndi uhali wavi. 2 Yati vivya lepi na ndima yavi vene, pagati ya Vaisilaeli, Bambu ndi mweavi ndava yavi ngati chavahadili."

3 "Kila vandu peviwusa teta yikavya ngombi amala mambelele. Yati yivya lilundu la vamteta va Chapanga, ndi yati vakumpela mteta wa Chapanga liwondo la kulongolo, njege na mahangau. 4 Yati mukuvapela mabenu ga kutumbula na divayi na mahuta na mangoma ga mambelele gegiketiwa kwa kutumbula. 5 Bambu Chapanga ahagwili likabila la Lawi na viveleku vyavi vatumika ngati vamteta va Chapanga, pagati ya makabila magono goha gangali mwishu."

6 "Ngati Mlawi yoyoha ngati akagana mwene ihotola kuwuka muji wowoha wa Isilaeli na kuhamba pala Bambu peapahagwili ndava vandu vamfugamila, 7 na penapo ihotola kukita lihengu la Bambu Chapanga waki, ngati Valawi vangi vevakumuhengela Bambu Chapanga kwenuko. 8 Yati vipata malundu gavi gegiwanana ga chakulya, pamonga vavii mapati ga maguliso ga vindu vya vandu vavi."

9 "Pemwihika pa mulima wula Bambu Chapanga winu akuvapela, mkotoka kulanda mivelu yeyiyomesa vandu va milima yeniyo. 10 Pakotoka kuvya na mundu yoyoha pagati yinu mwakumuwusa mwana waki mgosi amala mdala pamotu palusaja lwa kuwusila luteta muni avya luteta, amala mundu mweilondola amala mundu mwaiwusa mtela amala muhavi, 11 amala muhavi amala mweikwesa mizuka amala mweiyupa mahoka amala vevafwili. 12 Muni mundu yoyoha mweikita mambu ngati genaga ndi yomeso kwa Bambu, ndava ya matendu aga ga kuyomesa, Bambu Chapanga winu, yati akuvavinga vandu venavo palongolo ginu. 13 Muvya vasadikika njwee palongolo ya Bambu Chapanga winu."

14 Musa akayendelela kujova, "Milima yemukuvavinga na kutalila milima yavi vakuvayuwanila vala vevikita ulondola na kuyupa mahoka. Nambu, Bambu Chapanga winu avabesili kukita chenicho. 15 Bambu Chapanga winu yati akuvahagulila mlota wa Chapanga ngati nene kuhuma kwa Vaisilaeli vayinu, mumuyuwanila mwenuyo."

16 "Muni chenicho ndi chamwamuyupili Bambu Chapanga winu kuchitumbi Sinai kula, ligono lila pemwabwelili mwavoha pamonga na kujova, ‘Tikotoka kuyuwana kangi lwami lwa Bambu Chapanga witu, amala tikotoka kuuwona kangi motu uvaha uwu, muni tikotoka kufwa!’ 17 Ndi Bambu akanijovela, ‘Vajovili uchakaka. 18 Yati nikuvahagulila mlota wa Chapanga pagati ya Vaisilaeli vayavi avya ngati veve, yati nikumjovela cha kukita, na mwene yati akuvajovela goha genikumlagiza. 19 Mundu yoyoha mwangayuwanila malovi geijova mlota wa Chapanga mwenuyo gala genamujovili avajovelayi, nene namwene yati nikumbuna. 20 Nambu mlota wa Chapanga yoyoha mweijova kwa lihina la vachapanga vangi, amala akalinga kujova linenu changali nene kumjovela ajova, mlota wa Chapanga mwenuyo iganikiwa akomewa.’ "

21 "Nambu nyenye muhotola kujova, ‘Yati tihotola wuli kumanya linenu langajovewa na Bambu Chapanga?’ 22 Ngati mlota wa Chapanga akajova chindu cheangajova Bambu Chapanga, na chindu chenicho chikitika lepi amala chivya lepi chakaka, lijambu lenilo ajovili lepi Bambu Chapanga, mlota wa Chapanga ajovili kwa kuchenjela kwaki na nyenye mkotoka kuyogopa lijambu lenilo."