1 "Mgosi yoyoha mweateniwi amala mwadumuliwi lihona laki iganikiwa lepi avya pamonga na msambi wa vandu va Bambu Chapanga."

2 "Mundu yoyoha mweavelekiwi kuvala ya ndowa mwenuyo pamonga na viveleku vyaki mbaka chiveleku cha kumi viganikiwa lepi kuwungana na msambi wa vandu va Bambu."

3 "Muamoni amala Mumoabu yoyoha viveleku vyavi vyoha mbaka chiveleku cha kumi viganikiwa lepi kuyingila mumsambi wa vandu va Bambu, 4 muni vabelili kuvapela chakulya na manji pemwavii munjila pemwahuma ku Misili, na muni vampelili swinda Balaamu mwana wa Beoli kuhuma Petoli kwenuko ku Mesopotamia, abwela kuvapela likoto. 5 Nambu Bambu Chapanga winu, amuyuwanili lepi Balaamu, pahala paki likoto leawusili lang'anamwiki kuvya mota kwinu, muni Bambu Chapanga winu, avaganili. 6 Hinu katu mkotoka kuvatangatila venavo vapata uteke na wumi wa mota."

7 "Mkotoka kuvavenga Vaedomu, muni venavo valongo vinu. Mewa mkotoka kuvavenga Vamisili muni mwatamili ku mulima wavi ngati vayehe. 8 Vana vavi kutumbula chiveleku cha datu vihotola kuyingila mumsambi wa vandu va Bambu Chapanga."

9 "Pemuhamba kungondo, na kujenga mandanda pandu nunuyu ndava ya kutama kwa lukumbi ndu, kila mundu ajiyangalilayi na chindu chochoha chihakau. 10 Pagati yinu ngati mundu alotili ndoto na kujitundila mbeyu, iganikiwa ahuma kuvala ya lindanda na akatama patali na lindanda. 11 Nambu yikahika kimihi asamba, na lilanga likatipamayi ndi ayingilayi mulindanda."

12 "Pavala ya lindanda mtendekeha pandu pa kuhamba kutunda. 13 Muvindu vinu vya ngondo muvyayi na ligela, lenilo yati muhengela kugima ligodi na ukamalayi uhilalilayi mahi ginu. 14 Pandu pemjengili mandanda linu liganikiwa livya lamsopi muni Bambu Chapanga winu, igenda penapo ndava ya kuvayunga na kuvakita muvya na uhotola wa kuvatalalila vamakoko vinu. Mukangamala akoto kulola chindu chochoha chihakahu pagati yinu, muni akalola ihoto kuvaleka."

15 "Mvanda akatilalilayi kwaku kotoka kumuwuyisa kwa mkulu waki. 16 Mleka atama pagati yinu mumuji wowoha weigana, na mkotoka kumkita vindu vihakau."

17 Muisilaeli yoyoha mgosi amala mdala, iganikiwa lepi kukita ukemi pandu pa kumuyupila michapanga. 18 Mashonga geapati mgosi amala mdala kwa kukita ukemi wenuwo, katu gakotoka kuletwa munyumba ya Bambu Chapanga winu, ndava ya kutimilisa nadhili yoyoha, muni Bambu, akuvayomela vandu ngati venavo.

19 "Kotoka kumkopesa Muisilaeli muyaku chindu chochoha kwa chiyonjokesu, yivya mashonga amala chakulya amala chindu chingi chochoha cheuhotola kupata chiyonjokesu kwa chindu chenicho. 20 Wihotola kutola chiyonjokesu kwa muyehe nambu kotoka kutola chiyonjokesu kwa Muisilaeli muyaku, muni Bambu Chapanga waku yati akumotisa mumahengu gaku goha kumulima wemuhamba kuutola na kuvya winu."

21 "Peuvika nadhili na Bambu Chapanga waku, kotoka kukavila kutimilisa, muni Bambu Chapanga waku yati akuyigana mumawoko gaku, na veve yati uvya na mhalu wa kumbudila Chapanga. 22 Nambu ukaleka kuvika nadhili kwa Bambu, ukumbudila lepi Bambu Chapanga. 23 Nambu uvya msadikika kutimilisa nadhili chewajovili kwa mlomo waku, muni wamuvikili Bambu Chapanga waku kwa kugana kwaku."

24 "Ngati ukapitayi mumugunda wa mizabibu wa mundu wa mizabibu wa Muisilaeli muyaku uhotola kulya matunda ga zabibu mbaka kuyukuta, nambu kotoka kuyava na kugega muchidengu chaku. 25 Ngati ukapitayi mumugunda wa Muisilaeli muyaku lelina mabenu uhotola kuhulula mumawoko gaku na kulya, nambu kotoka kugeha kwa chikwakwa."