1 "Aga ndi malagizu na mihilu na mambu gala Bambu Chapanga winu, anilagizi nivawula muni mukagahenga ku mulima wemuhamba kuutola na kuutalila pemwikupuka mfuleni Yoludani. 2 Lukumbi lwoha lwemwivya mumi, mganikiwa kumfugamila Bambu Chapanga winu, na kuyidakila mihilu yoha na malagizu zenikuvapela nyenye na viveleku vinu vyoha muni mupata kutama wumi wa magono gamahele. 3 Muyuwana nyenye Vaisilaeli, muvya mihu kuzihengela mihilu na malagizu muni mumotisiwa na kuyonjokesa neju pamulima uwo weuna ludaka lwabwina kwa ulimaji na kudimila mifuya."

4 "Hinu muyuwana nyenye Vaisilaeli, Bambu Chapanga winu ndi Bambu mmonga ndu. 5 Mumgana Bambu Chapanga winu, kwa mtima winu woha na kwa mpungu winu woha na kwa makakala ginu goha. 6 Mkotoka kukosiwa mihilu iyi yenikuvapela lelu, 7 na muvawula kwa kukangamala vana vinu. Muvadandaulila pemwivya panyumba amala pemwivya mulugendu amala pemwipumulila amala pemwihenga lihengu. 8 Mugayandika malovi ago na kugakunga mumawoko na pachiwungi chinu muni zivya ukumbuso. 9 Mugayandika mufelemu za milyangu yinu na mamilyangu ya miji yinu."

10 "Lukumbi Bambu Chapanga waku, peakuleta pamulima weavalapalili vadadi vaku, Abulahamu na Isaka na Yakobo, kukupela veve mulima uvaha na weuna miji yeyinyabili wewangaujenga veve. 11 Nyumba zezimemi vindu vyabwina vyangavikiwa na nyenye, viliva vyangagimwa na nyenye na migunda ya mizabibu na mizeituni yangapandwa na nyenye. Bambu Chapanga, yati akuvapeleka ku mulima wenuwo weuvi na chakulya choha chemwigana, 12 mjiyangalila kuvya yati mumkosiwa lepi Bambu Chapanga mwavawusili ku Misili kwemwavili vavanda. 13 Yati mumtopesa Bambu Chapanga winu na kumhengela mwene ndu na kulapa kwa lihina laki ndu. 14 Mkotoka kugundamila michapanga yingi, michapanga ya vandu vevavi papipi na nyenye, 15 Bambu Chapanga akotoka kuvya na ligoga ndava yinu, na kuvakomakesa njwee pa mulima, muni Bambu Chapanga winu mweavi pagati yinu, ndi Chapanga mwana wihu."

16 "Mkotoka kumlinga Bambu Chapanga winu ngati chamwamlingili ku Masa kula. 17 Mukamula kwa kukangamala uamula na mihilu yaki yoha na malagizu goha geavapelili. 18 Mkita gala gegakumganisa Bambu, muni mambu ginu gavahambila bwina. Yati muhotola kuutola uvya wavi mulima wabwina wula Bambu Chapanga alagagizi kuvapela vagogo vinu, 19 na kuvya Bambu Chapanga yati akuvavinga makoko vinu ngati chavahaidili."

20 "Magono gegibwela, vana vinu pevakuvakota ‘Kyani mana ya uamula na mihilu na malagizu, Bambu Chapanga witu, avalagizi kukita?’ 21 Nyenye yati mukuvayangula naha, ‘Tete tavili vavanda va Falao, nkosi wa Misili, nambu Bambu atisangwili kwa uhotola waki ukulu. 22 Tete tamuweni kwa mihu gitu, Bambu ikita ulangisu na chinamtiti na mambu ga kuyogopesa neju kwa Vamisili na Falao pamonga na vandu vaki voha. 23 Atiwusili ku Misili, akatileta penapa na kutipela mulima uwu, ngati chalapili kwa vagogo vitu. 24 Hinu Bambu atilagizi kuyidakila mihilu iyi yoha na kumtopesa Bambu Chapanga witu, muni mambu gitu gahamba bwina, na ayendelela kutiyunga magono goha ngati cheyivili lelu. 25 Ngati tavasidikika kuyidakila kila chindu cheatilagizi Chapanga witu ndi Chapanga yati iganiswa na tete.’ "