1 Hinu, Musa peavii pamonga na vagogo va Isilaeli akavalagiza vandu, "Mukamulayi mihilu yoha yenikuvalagiza lelu. 2 Ligono lila lemukupuka mfuleni Yoludani na kuyingila mumlima weavapeli Bambu Chapanga winu, yati muyimamisa maganga na kugakilima. 3 Kangi panani yaki muyandika malovi goha ga mihilu iyi, pemumali kukupuka na kuyingila mumlima wabwina weuganikiwa kwa kulima na kudimila weavalagazili Bambu Chapanga, Chapanga wa vagogo vinu kuvya yati akuvapela. 4 Pemumala kukupuka mfuleni Yoludani, yati muyimamisa maganga ago kunani ya chitumbi Ebali, ngati chenikuvalagiza lelu, na kugakilima. 5 Kwenuko yati mukumujengela Bambu Chapanga winu, pandu pa kuwusila teta kwa maganga. 6 Mujengayi pandu pakumuwusila teta Bambu Chapanga winu kwa kuhengela maganga gangahongolewa. Panani ya pandu penapo yati mukumuwusila Bambu Chapanga winu teta ya kutinyiswa. 7 Yati mumuwusila teta za uteke na mulyayi bahapo na muhekelelayi palongolo ya Bambu Chapanga winu. 8 Yati muyandika hotohoto panani ya maganga ago malovi goha ga malagizu aga."

9 Penapo Musa pamonga na vamteta va Chapanga va Valawi vakavajovela Vaisilaeli voha, "Muguna muniyuwanila nyenye Mwavaizilaeli. Lelu nyenye ndi mwavandu vaki Bambu Chapanga winu. 10 Hinu yati mukuliyidakila lwami lwa Bambu Chapanga winu, kulanda malagizu gaki na mihilu yaki yenikuvalagiza lelu."

11 Ligono lenilo Musa akavalagiza Vaisilaeli na kujova, 12 "Mukamala kukupuka mfuleni Yoludani makabila ga Simeoni na Lawi na Yuda na Isakali na Yosefu na Benyamini yati giyima panani ya chitumbi Gelizimu kuyuwanila Chapanga cheakuvamotisa vandu. 13 Na makabila ga Leubeni na Gadi na Asheli na Zabuloni na Dani na Nafutali genaga yati giyima panani ya chitumbi Ebali na kuyuwanila chila Chapanga cheakuvapela vandu likoto. 14 Na vene Valawi yati vakuvakokosela vandu voha va Isilaeli kwa lwami luvaha."

15 " ‘Apewa likoto mundu yoyoha mweitengeneza chimong'omong'o kwa kuhongola amala kwa kukita lufumbu na kufugamila chimfiyu, chindu chechihengiwi na mawoko ga fundi na chechivengiwi na Bambu Chapanga winu.’

Na vandu voha vayangula, ‘Ena!’ "

16 " ‘Apewa likoto mundu yoyoha mweakumvevesa dadi waki amala nyina waki.’

Na vandu voha vayangula, ‘Ena!’ "

17 " ‘Apewa likoto mundu yoyoha mweiwusa alama mumbaka wa muyaki.’

Na vandu voha vayangula, ‘Ena!’ "

18 " ‘Apewa likoto mundu yoyoha mweakumyagisa ngalola munjila.’

Na vandu voha vayangula, ‘Ena!’ "

19 " ‘Apewa likoto mundu yoyoha mweiyaagisa uchakaka wa muyehe amala mkiva amala lipwela.’

Na vandu voha vayangula, ‘Ena!’ "

20 " ‘Apewa likoto mgosi mweigonekana na mdala wa dadi waki, muni amupeli soni dadi waki.’

Na vandu voha vayangula, ‘Ena!’ "

21 " ‘Apewa likoto mundu yoyoha mweigona na chinyama chochoa.’

Na vandu voha vayangula, ‘Ena!’ "

22 " ‘Apewa likoto mundu yoyoha mweigonekana na mlumbu waki akavya msikana wa dadi waki amala msikana wa nyina waki.’

Na vandu voha vayangula, ‘Ena!’ "

23 " ‘Apewa likoto mundu yoyoha mweigonekana na mkohanu waki wa chidala.’

Na vandu voha vayangula, ‘Ena!’ "

24 " ‘Apewa likoto mundu yoyoha mweikoma muyaki chimfiyu.’

Na vandu voha vayangula, ‘Ena!’ "

25 " ‘Apewa likoto mundu yoyoha mweitola swinda muni akoma mundu mweangahoka.’

Na vandu voha vayangula, ‘Ena!’ "

26 " ‘Apewa likoto mundu yoyoha mweangayidakila malovi aga ga malagizu na kugalanda.’

Na vandu voha vayangula, ‘Ena!’ "