1 Musa akavajovela Vaisilaeli, "Mumgana Bambu Chapanga winu, na magono goha myidakila mashaliti na mihilu na malagizu gaki goha. 2 Nyenye lelu mumanya kuvya, ndava muni nijova lepi hinu na vana vinu, vala vangamanya amala kulola mbunu wa Bambu Chapanga winu, chila cheavili mukulu na mweavi na makakala na uhotola, 3 na milangisu yaki na makangaso gaki geakitili ku Misili kula kwa nkosi Falao na mulima waki woha. 4 Walolili geavahengili manjolinjoli ga Misili, falasi zavi na mutuka za ngondo, cheavagubiki voha kwa manji ga nyanja ya Shamu, mewa mwalolili Chapanga cheavakomakisi njwee msambi wa manjolinjoli venavo mbaka lelu. 5 Mkumbuka Bambu, chaavakitili kulugangatu kwakona ya kuhika penapa, 6 na mambu geavakitili Datani na Abilamu, vana va Eliabu, mwana wa Lubeni, palongolo ya vandu voha va Vaisilaeli ndima wewagubwiki na kuvamila pamonga na vandu vavi, mandanda gavi hinyama na vatumisi vavi voha. 7 Kwa mihu ginu galolili matendu goha aga gavaha geahengili Bambu."

8 "Ndava yeniyo muyidakila mihilu yoha yenivapelili lelu muni muvya na makakala ga kuuyingila mulima wemukupuka mfuleni Yoludani kuhamba kuutola, 9 muni mutama magono gamahele weuna ludaka lwabwina kwa kudima na kulima, ndi Chapanga avalapili vagogo vinu kuvya yati akuvapelana vene na viveleku vyavi. 10 Muni mulima wemuyingila kuyitola yivi lepi ngati mulima wa Misili kwemuhumili, kwe mwamijili mbeyu, mwayitalili manji kwa magendelu ngati mgunda udebe wa makolo, 11 nambu mulima wemuhamba kuuutola pemwimala kupuka mfuleni Yoludani, ndi mulima wa vitumbi na makemba, mulima weupata manji ga fula kuhuma kunani. 12 Bambu Chapanga winu, akuuyunga mulima wenuwo, akuulola magono goha ga kutumbula kwa mwaka mbaka mwishu wa mwaka."

13 "Hinu mkayidakila kwa usadikika mihilu yangu yenivapelili lelu, mgana Bambu Chapanga winu, mumuhengela kwa mtima winu woha na kwa mpungu winu woha. 14 Ngati mkakita chenicho, hinu mwene yati itonyesa fula pa mulima winu lusenje lwaki, fula za chihuku na fula vuli, na nyenye yati mbena mabenu ginu na divayi yamupya na mahuta ginu. 15 Yati imelesa mahamba mumigunda ndava ya ng'ombi zinu, na nyenye yati mwilya na kuyukuta. 16 Mujiyangalila, mitima yinu mkotoka kukongewa na mundu, na kung'amuka na kuyifugamila michapanga yingi na kuyigundamila. 17 Ngati mkakitayi chenicho, Bambu yati akuvayomela neju, yati idinda kunani na fula yati yivya lepi, na mulima yati uwusa lepi mabenu gaki, yati mwifwa kanyata kuhuma pamulima wabwina yemupewili na Bambu."

18 "Mugavika malovi gangu aga mumitima yinu na mumpungu winu. Mugakunga mumawoko ginu ngati ukumbuso. 19 Muvawula vana vinu malovi aga na kuvadandaulila pemwitama munyumba zinu, pemwigenda na pemwipumulila na pamuyimuka. 20 Muyandika mumihana ya fulemu za nyumba zinu na mumilyangu yinu, 21 muni nyenye na vana vinu mutama magono gamahele pa mulima wula Bambu Chapanga winu alapili kuvapela vagogo vinu, ngati chegavili magono ga kunani chegavili panani ya mulima."

22 "Mkakamula bwina mihilu yeniyi yoha yenivapelili: Kumgana Bambu Chapanga winu, kukita goha geigana na kuvya nayu pamonga munjila zaki zoha, 23 ndi Bambu Chapanga, yati akuyivinga milima yoha iyo palongolo yinu, na nyenye yati mutola mulima uvya winu, weuvi na vindu vyamahele vya milima yivaha na yeyivi na makakala kuliku nyenye. 24 Kila pandu pemulivatila kwa magendelu ginu yati pivya pinu, mulima winu yati uyenela kuhuma kulugagatu, upandi wa kusini, mbaka vitumbi vya Lebanoni upandi wa kasikazini, na kuhuma mfuleni Efulati upandi welihumila lilanga mbaka nyanja ya Meditelania yeyivii upandi walitipama lilanga. 25 Kawaka mundu yoyoha mweihotola kuvadivalila. Popoha pemwihamba pamulima wenuwo, Bambu Chapanga winu, yati akuvasopa wogohi na yati vakuvayogopa ngati chavahadili."

26 "Muyuwanila, lelu iyi nikuvapela mambu gavili muhagula, kumotisiwa amala kupewa likoto. 27 Yati umotisiwa ngati myidakila mihilu ya Bambu Chapanga winu zenikuvapela lelu iyi, 28 na yati mupewa likoto, ngati muyidakila lepi mihilu ya Bambu Chapanga winu na kuyileka njila yenavalagizi, mukayifugamila michapanga yingi yamwangayimanya. 29 Bambu peakuvahikisa pa mulima wemuhamba kutama, yati mkokosa mota kuhuma panani ya chitumbi Gelizimu na likoto kuhuma chitumbi Ebali. 30 Vitumbi vyeniyi yivili yivi kumwambu ya, upandi kwelitipama lilanga wa mfuleni Yoludani ku mulima wa Vakanani vevitama kulikemba la mfuleni Youdani papipi na muji wa ku Giligali kutali lepi na mialoni. 31 Yikuvagana kukupuka mfuleni Yoludani muyingila na kuutoala mulima uvya winu wula Bambu Chapanga winu, akuvapela. Lukumbi pemukuyitola kuvya yinu na kutama mwenumo, 32 mujiyangali kuvya mukuyidakila mihilu na malagizu yoha yenikuvapela lelu."