1 "Ngati akahumila mlota wa Chapana wa amala mlondola wa ndoto pagati yinu, akavakokosela milangisu na makangaso, 2 na ngati ulangisu amala makangaso genago gakahumila, Na mlota wa Chapanga yula akajova, tiyilanda michapanga yingi na kuyihengela, michapanga mwangayimanya, 3 mkotoka kumyuwanila malovi ga mlota wa Chapanga mwenuyo amala mlondola wa ndoto, muni Bambu Chapanga winu, akuvatumila venavo kuvalinga, muni amanya ngati mukumgana mwene Bambu kwa mtima waku woha na mpungu waku woha. 4 Mumlanda Bambu na kumtopesa, mlanda mihilu yaki na kuyidakila lwami lwaki mumuhengela na kuvya pamonga nayu. 5 Nambu mlota wa Chapanga mwenuyo amala mlondola wa ndoto yati ikomewa muni avawulili nyenye mumbela Bambu, mwavawusili mulima wa Misili na kuvagombola kuhuma muuvanda, muni muleka njila yila Bambu Chapanga winu, yeavalagizi muyilanda. Chenicho ndi chemuleka uhakau pagati yinu."

6 "Yikavya mlongo waku amala mwana waku mgosi amala mdala amala mkozi wa papipi neju amala mdala waku mweukumgana akakukohakesa chimfiyu kwa kujova, ‘Tihamba tikafugamila michapanga yingi,’ Yila wangayimanya veve amala vagogo vaku, 7 amala mmonga wa vachapanga ya vandu vevitama papipi na nyenye amala michapanga ya vandu vevitama kutali kuhuma upandi umonga wa mulima mbaka upandi wungi wa mulima, 8 kotoka kumyidakila akukohakesa amala kumuyuwanila amala kumhengela lipyana, amala kotoka kumlekekesa amala kumuhiha, 9 nambu umkoma. Veve yati wivya wa kutumbula mukumkoma na vangi voha vagelekela. 10 Mumtova na maganga mbaka afwayi, ndava alingili kukuvika patali na Bambu Chapanga waku, mwakuwusili kuuvanda ku misili. 11 Hinu Vaisilaeli voha yati viyuwana na kuyogopa, na katu yati vikita lepi uhakau ngati wenuo."

12 "Pemwiyuwana mumiji yemupewili na Bambu Chapanga winu, muni mutama, 13 kuvya vandu nunuyu pagati yinu vahakau, vakuvayagisa vandu va muji vakuvajovela, Tihamba tikafugamila michapanga yingi, mwangayimanya. 14 Hinu mkakita umang'omesi bwina, na ngati chakaka lijambu la kuyomesa likitiki pagati yinu, 15 mganikiwa kuvakoma vandu va muji wenuo kwa upanga, yati mukuuyongomesa muji wenuo na kila chindu chechivili pamonga na mifuya yoha kwa upanga. 16 Mtola vindu vyemnyangili vyoha paluvanja lya muji wenuo na kuyocha motu ngati teta ya kutinyisa kwa Bambu Chapanga winu, muji wenuo yati usigalila kuvya mang'ova magono goha, yati ujengewa lepi kavili. 17 Mkotoka kutola chindu chochoha chechiwusiwi ndava ya kutinyiswa, muni Bambu aleka ligoga laki livaha, avalangisa lipyana na kuvakita muvya vamahele neju ngati chavahadili vagogo vinu, 18 ngati ndu mkayidakila malovi gaki na kulanda mihilu yaki yoha yenikuvapela lelu, na kukita gegiganisa palongolo yaki Bambu Chapanga winu."