1 Kangi, Musa akawuka pamtambu wa Moabu akahamba kuchitumbi cha Nebo, akakwela pachituvilu cha Pisiga chechilolesana na Yeliko, penapo Bambu Chapanga, akamulangisa mulima woho: Kuhuma ku Giliadi mbaka Dani, 2 pandu poha pa mulima wa Nafutali na Efulahimu na Manase na Yuda mbaka nyanja ya Meditelenia, 3 lugangatu lwa kusini na pandu pa lugangatu lwa likemba la Yeliko, muji wa mitende mbaka ku Soali. 4 Kangi Bambu Chapanga akamujovela Musa, "Wu ndi mulima wula wenavahaidili Abulahamu na Isaka na Yakobo kuvya yati nikuvapela viveleku vyavi. Nikulangisi uwulola kwa mihu gaku nambu yati uyingila lepi mwenumo."

5 Hinu Musa mtumisi wa Bambu Chapanga, akafwili kwenuko ku mulima Moabu, ngati cheajovili Bambu Chapanga. 6 Bambu Chapanga, akamzika mulikemba la Moabu kulolesana na muji wa Beti Peoli, nambu mbaka lelu kawaka mundu mweapamanyili pandu chakaka peazikiwi. 7 Musa peafwili avii na miyaka miya yimonga na isilini, avii na luhala bwina, akona na makakala, mihu gaki gakoywiki lepi. 8 Vaisilaeli vatamili kumvembela Musa mulukumbi lwa magono selasini palikemba la mulima wa Moabu, mbaka lukumbi lwa malilu na kumvembela pelwamaliki.

9 Yoshua mwana wa Nuni amemili mpungu wa luhala ndava Musa amuhagwili kuvya mlanda waki. Ndi Vaisilaeli vakamuyidakila Yoshua vakalanda na malagizu gala Bambu Chapanga, geamupelili Musa.

10 Kuhumila lukumbi lwenulo mbaka lelu pa Isilaeli ahumalili lepi mlota wa Chapanga ngati Musa mwealongili na Bambu Chapanga mihu kwa mihu. 11 Kawaka mlota wa Chapanga yungi mweahengili gachinamtiti na gakukangasa ngati Bambu Chapanga geamupelili Musa ahenga kwa nkosi wa Kumisili pamonga na vatangatila vaki na mulima waki woha. 12 Kawaka mlota wa Chapanga yungi mweahengili mambu gakulu na gakuyogofya ngati cheakitili Musa palongolo ya Vaisilaeli voha.