1 "Mkoto kumhinja ng'ombi amala limbelele mweavi na chilema amala ngati teta kwa Bambu Chapanga winu, ndava muni lenilo likumyomesa mwene."

2 "Ngati mukayuwanayi kuvya umonga wa muji winu avii mgosi amala mdala mwaikita uhakau palongolo ya Bambu Chapanga na kudenya Lilaganu laki, 3 na ahambi kuhengela michapanga yingi na kuyifugamila, amala kufugamila hati lilanga amala mwehi na vindu vingi vya kunani vila vyanangalagiza kufugamila, 4 yikavya mundu avajovili lijambu lenilo ndi mkita umang'omesi chichakaka ngati ndi chakaka lijambu lelilo lihengiki pa Isilaeli, 5 hinu mumtola mundu mwenuyo kuvala ya muji na kumtova na maganga mbaka afwayi. 6 Hati naha yati ikomewa ngati kuvii na vandu vavili amala vadatu vevilola, akotoka kukomewa ngati kuvii na mundu mmonga ndu mweilola. 7 Vala vevamlolili ndi vevitumbula kumtova maganga ndi vagelekela vangi, ndi chamuleka uhakau pagati yinu."

8 "Ngati mihalu yiletwa kwinu mumabanji ginu ga mihalu gala geginonopa neju kwinu kugahamula, ngati ukomaji amala madayi amala kulemesana, mugapeleka pandu pepahaguliwi na Bambu Chapanga winu, 9 na kwenuko yati mukumuhambila mteta wa Chapanga yula Mlawi na muhamula mihalu mweavi mulihengu lukumbi lwenulo, na nyenye yati mujova matakilu palongolo yavi, na vene yati vihamula. 10 Kangi yati mwikita ngati chevakuvajovela pandu pala Bambu Chapanga cheapahagwili, yati mwivya vasadikika kukita goha ngati chemulagaziwi. 11 Yikuvagana kukita kulandana na malagizu gemwipewa na uhamula weviwusa kwinu. Mkoto kuleka kukita kwa mtima woha uhamula wamukokoselewa mkoto kulinga kung'anamusa uhamula wenou kwa njila yeyoha. 12 Mundu yoyoha mwangamyidakila mteta wa Chapanga amala chilongosi mweavikwi penapo kumuhengela Bambu Chapanga winu, amala mweanauhotola, ndi mundu mwenuyo iganikiwa akomewa. Ndi chamwikita muni kulekelesa uhakau pagati yinu. 13 Vandu voha yati viyuwana na kuyogopa na kawaka hati mmonga mweilinga kukita mambu ngati ago."

14 Musa akayendelela kuvajovela vandu va Isilaeli, "Pemuyingila mumulima wemupewa na Bambu Chapanga winu, mukayitola kuvya winu na kutama mwenumo, na nyenye mkajova, yati tihagula nkosi atilongosa ngati milima yingi yeyikutitindila, 15 Muhotola kumhagula nkosi, mundu mweihaguliwa na Bambu Chapanga winu. Yati mukumuhagula mmonga wa valongo vinu kuvya nkosi winu, mkotoka kumhagula myehe mweangavya Muisilaeli kuvya nkosi winu. 16 Hati chenicho, nkosi akotoka kuvya na falasi zamahele ndava yaki mwene, amala akotoka kuvawuyisa vandu ku Misili ndava ya kupata falasi zamahele, ndava muni Bambu Chapanga avabesili, ‘Katu mkotoka kuwuya kwenuko kangi.’ 17 Katu akotoka kugega vadala vamahele neju, mtima waki yati ubuda na kumleka Bambu, mewa akotoka kuvya na madini ga feza na zahabu zamahele neju. 18 Paitamila pachigoda cha unkosi iganikiwa ayandika chitabu chingi ndava yaki mwene chehihumalila muchitabu cha malagizu palongolo ya vamteta va Chapanga Valawi. 19 Chitabu chenicho yati ivya nayu magono goha na kuyisoma muwumi waki woha muni apata kujiwula kumfugamila Bambu Chapanga, kwa kulanda na kukamula malovi goha ga mihilu iyi na malagizu. 20 Malagizu ago yati gakumtangatila akotoka kujikwiha palongolo ya valongo vaki, na kuyagisa malagizu ago kwa namuna yoyoha yila. Ndi mwene pamonga na chiveleku chaki yati viyendelela kulongosa magono gamahele."