1 "Kila mwishu wa mwaka wa saba yati mukuvalekekesa vemukuvadayi voha. 2 Chenichi ndi chemwikita: Kila mmonga mwamkopisi mlongo waki, ndi aleka kumdayi muni Bambu mwene ahamwili kuvya lideni lilekekeswa. 3 Muhotola kumdayi myehe nambu uganikiwa kumlekekesa Muisilaeli muyaku mweukumdayi."

4 "Bambu Chapanga winu, yati akuvamotisa neju, pamulima weavapelili uvya winu. Kawaka hati mmonga mwaivya mngangu pagati yinu, 5 ngati mukumyidakila Bambu Chapanga winu, kwa kulanda mihilu kwa usadikika zenikuvapela lelu iyi. 6 Bambu Chapanga winu, avamotisa ngati chavahadili. Na nyenye yati mukuyikopesa milima yamahele, nambu nyenye yati mwikopa lepi. Mewawa yati mtalalila milima yamahele nambu milima yeniyo yati yikuvatalila lepi nyenye."

7 "Kukavyayi na mngangu pagati ya valongo vinu mumiji ya milima yemupewa na Bambu Chapanga mkotoka kuvya vanotani na mtima weunonopa kwaki. 8 Nambu muvya na mtima wabwina wa kuwusa na kumkopesa kwa kugana, chindu chochoa vangayvya nachu chechikuvakola kwa maganu gaki. 9 Mujiyangalila, maholo gahakau gakoto kuvayingila mumitima yinu, na kujova: ‘Mwaka wa saba ndi mwaka wa kuvalekekesa vandu vemukuvadayi uvi papipi’ na kumuhengela gahakau kwa mlongo winu mngangu na kubela kumpela chochoha, mwene ihotola kumvembela Bambu ndava yinu na yivya kuhoka kububa kwinu. 10 Mumpela kwa uganu mlongo winu mngangu changali kuvembeneka, Bambu Chapanga yati akumotisa mukila jambu lemuhenga kwa mawoko ginu. 11 Ndava muni vangangu vivya ku mulima magono goha yati, ndava yeniyo hinu nikuvalagiza muvapela kwa mtima wabwina valongo vinu vangangu, maganu pamulima winu."

12 "Ngati mlongo waku Muebulania, mgosi amala mdala, akaguliswa kwaku, yati akakuhengela kwa miyaka sita nambu mumwaka wa saba yati ukumleka awuka. 13 Na veve paukumelekekesa kotoka kumleka ahamba changali chindu mumawoko. 14 Mpela kwa mtima wabwina chila cheumotisiwi na Bambu Chapanga waku, ngati mambelele na mabenu na divayi. 15 Mkumbuka kuvya nyenye mwavili vavanda kumulima wa Misili na Bambu Chapanga winu, avagombwili ndi mana lelu iyi nikuvalagiza mambu aga."

16 Nambu akakujovela, "Yati niwuka lepi kwaku," Muni akuganili veve na valongo vaku na iyidakila kutama na veve, 17 mtola mbaka pamlyangu, kangi tola lusungulu na kubowola likutu laki luyingila mbaka paubawu wa mlyangu, na mwene yati ivya mvanda waku magono goha gangali mwishu. Mkitila chenicho mewa na mvanda waku wa chidala. 18 Kotoka kuwona kunonopa kuleka mvanda ahamba, muni akuhengili mumiyaka sita kwa yapinga ya luhuna lwa mtumisi wa kumlipa. Kita chenicho na Bambu Chapanga waku yati akumotisa mukila leukita.

19 "Muwusila Bambu Chapanga waku, vavelekwa voha va kutumbula va chigosi mumsambi wa ng'ombi na mambelele. Kotoka kuzihengesa mahengu ng'ombi zenizo na mambelele na kotoka kudumula mangoma ga mambelele ago. 20 Kila mwaka veve na valongo vaku yati mwilya hinyama yeniyo palongolo ya Bambu Chapanga winu, pandu peakupahagula. 21 Nambu chinyama chenicho chikavya na chilema amala ngalola amala chochoha chihakau, kotoka kuchipeleka kuhinjwa ndava teta kwa Bambu Chapanga waku. 22 Yati yikuvagana kulya mwavene pamiji yinu, mewa vandu voha veviyidakiliwa na Chapanga na vangayidakiwa na Chapanga, vihotola kulya ngati chevilya huluku na mbalapi. 23 Nambu katu mkotoka kulya ngasi yaki, yeniyo yati mukuyiyita pahi ngati manji."