1 Musa akayendelela kujova, "Muyidakila na kulanda mihilu na malagizu goha genavawulili, muni mpata kutama na kuunyaga mulima wula Bambu Chapanga wa vagogo vinu akuvapela. 2 Mkotoka kuyonjokesa chochoha mu mihilu yenivapelili, mkotoka kupunguza chindu, mulanda mihilu yoha ya Bambu Chapanga winu yeavapelili. 3 Nyenye mwalolili kwa mihu ginu mambu geakitili Bambu ku Baali Peoli. Bambu winu avakomakise vandu voha pagati yinu vevamfugamili chapanga uyo Baali Peoli. 4 Nambu nyenye mwemwavii vachakaka kwa Bambu Chapanga winu muvi mumi mbaka lelu."

5 "Hinu nivawulili goha mihilu na malagizu ngati Bambu Chapanga wangu, chanilagizi nikita, muni mugalanda ku mulima wemuhamba kuutalalila. 6 Myidakila na kuzihengela lihengu mihilu na malagizu goha, muni mukakita chenicho vandu va milima yingi pevipata kumanya mambu ago, yati vimanya kuvya nyenye muna luahala na yati vijova, ‘Chakaka vandu va mulima uwu vana luhala na utopesa!’ "

7 "Kawaka mulima wowoha hati ngati uvii uvaha namuna yoki, ndi michapanga yaki yivi papipi nawu, ngati chaavili papipi na tete Bambu Chapanga witu, petikumuyupa utangatila. 8 Kangi kawaka mulima wungi wowoha hati ngati uvi uvaha namuna yoki, weuna mihilu na malagizu gegakumganisa Chapanga, ngati izi zenivawulili lelu. 9 Nambu mujiyangalila na kujiyunga neju muni mkotoka kukosewa mambu gala gemwagaweni kwa mihu ginu mwavene. Gakotoka kuyaga mumitima yinu pemwitama. Muvawula vana vinu na vajukulu vinu, 10 kuvala ligono lila lemwayimili palongolo ya Bambu Chapanga winu, kuchitumbi Sinai kula peanijovili, ‘Vakusanya vandu avo palongolo yangu nivajovela malovi gangu muni vagayuwana muni vajiwula kuniyidakila nene pevitama pamulima muni vahotola na kuvawula vana vavi kukita chenicho.’ "

11 "Hinu, mwahegalili na kuyima papipi na chitumbi Sinai ndi lukumbi lwenulo wayaka motu, wewahikili mbaka kunani kuni kudandasiki lihundi na chitita ng'ong'olo 12 Kangi Bambu Chapanga pealongili na nyenye kuhuma mumotu wenuo, mwayuwini malovi geajovili nambu mwamuwene lepi, mwayuwini lwami lwaki ndu. 13 Mwene avakokosili lilaganu laki akavalagiza muyidakila mihilu kumi yeayandiki panani ya vibawu vivili vya maganga. 14 Lukumbi lwenulo Bambu Chapanga anilagizi nivawula mihilu na malagizu goha gemganikiwa kukita nyenye ku mulima wemwikupuka mfuleno Yoludani kuhamba kuutalalila."

15 "Hinu mujiyangalila, mkotoka kukosewa, kuvya Bambu Chapanga pealongili na nyenye na kuchitumbi cha Sinai pagati ya motu mwamuwene lepi higa. Ndava yeniyo mujiyangalila neju, 16 mkotoka kumbudila Chapanga kwa kuhongola chimong'omong'o chochoha, kwa luhumu loloha lwa chigosi amala chidala, 17 wa chinyama chochoha cha pamulima amala videge, 18 amala luhumu lwa chiumbi chochoha chechikwava pandima amala somba za mumanji. 19 Mujiyangalila muni lukumbi pemulola lilanga na mwehi na ndondo na vindu vyoha vyemukuvilola kunani, mkotoka kunogela kuvifugamila na kuvihengela, muni vindu vyenivyo Bambu Chapanga winu aviwumbili ndava ya vandu voha pamulima. 20 Nambu nyenye ndi mwavandu veavagombwili kuhuma mulima wa Misili pemwavi kumang'aiso gangasindimalika ngati mulitanuli la kunyungulusila lyuma. Avawusili kwenuko muni muvya vandu vaki ngati chamvili lelu. 21 Ndava yinu Bambu Chapanga winu aniyomili, na kulapa yati nikupuka lepi mfuleni Yoludani kuyingila mumulima wula wabwina weakuvapela uvya winu. 22 Nene yati nifwa pa mulima uwu yati nikupuka lepi mfuleni Yoludani, nambu nyenye muvi papipi kukupuka na kuhamba kuutalila mulima wabwina wula. 23 Mujiyangalila neju mkotoka kukosewa lilaganu lemwakitili na Bambu Chapanga winu, mkotoka kuhongola chomong'omong'o chochoha kwa kutumila higa wa chindu chochoha chechibesiwi na Bambu na kumuwanangisa, 24 muni Bambu Chapanga winu, mwene ndi motu weutinyisa, mwene ndi Chapanga mwana wihu."

25 "Pamutama pa mulima wenuwo kwa miyaka yamahele, mkapata vana na vajukulu na kuvya vagogolo, ngati mkatumbula kubuda na kuhongola vimong'omong'o muluhumu lwa chindu chochoha, mukakita uhakau palongolo ya Bambu Chapanga winu na kumyomesa, 26 hinu nene lelu nikuzikemela kunani na mulima zilola gala gegikitika pagati yinu, ngati mukuniyidaila lepi yati mwikomakeswa kanyata pamulima wemuhamba kuutola kumwambu ya mfuleni Yoludani. Yati mtama lepi kwenuko lukumbi lutali, nambu yati muyongomeswa njwe. 27 Bambu Chapanga yati akuvapechenganisa mumilima ndalindali, na vandu vadebe ndu pagati yinu ndi vevisigalila kwenuko kwemwipechenganiwa na Bambu Chapanga. 28 Kwenuko yati mukuyifugamila michapanga ya mikongo na maganga yeyitengenizwi kwa mawoko ga vandu, na yangahotola kulola, yiyuwana lepi amala kulya na yinuha lepi. 29 Kangi kuhuma mumlima wenuwo ngati mumlonda Bambu Chapanga winu, ni nyenye yati mkumpata ngati mukamlonda kwa mtima winu woha na mpungu winu woha. 30 Mang'aiso aga goha pegakuvapata kwenuko mwanakandahi, yati mukumuwuyila Bambu Chapanga na kumyidakila. 31 Bambu Chapanga winu, ndi Chapanga mweana lipyana, yati akuvaleka lepi amala kuvayongomesa, amala kukosewa lilaganu leakitili na vagogo vinu kwa chilapu."

32 "Muholalela kuvala mambu ga kadeni, mambu gegahumalili kwakona nyenye mwangavelekewa, kuhumila ligono lila Chapanga pamuwumbili mundu pamulima. Mkotakesa pamulima woha, kuhumila pembe yimonga mbaka yingi. Wu, lijambu la kukangasa la namuna yeniyi lihumalili amala kuyuwanika? 33 Wu, vandu vamali kuyuwana lwami lwa Chapanga lulongela kuhuma pagati ya motu, ngati nyenye chemwayuwini na vasigalili mumi? 34 Wu, avili Chapanga yoyoha yungi mwalingili kuhamba kutola vandu vaki kuhuma mulima wungi, ngati Bambu Chapanga winu, cheakitili kwa kulinga na ulangisu na makangaso kwa ngondo na kwa makakala gaki gakulu, akakita mambu gakuyogopesa yani gala gemwagawene kwa mihu ginu ku Misili kula. 35 Nyenye mwahotwiswi kugalola mambu ago, muni mupata kumanya kuvya Bambu Chapanga mwene ndu ndi Chapanga kawaka yungi. 36 Avakitili muyuwana lwami lwaki kuhuma kunani kwa Chapanga muni kuvakita muvya mwavandu mwemuyidakila na pamulima akavakita mulola motu waki ukulu na kuyuwana malovi gaki kuhuma pagati ya motu wenuwo. 37 Ndava muni avaganili vagogo vinu, vakavahagula nyenye mwemuvi chiveleku chaki na kwa uhotola waki mkulu akavawusa kumulima wa Misili. 38 Akavavinga palongolo vandu va milima yingi vala vevavi vakulu na vevana makakala kuliku nyenye, muni avayingisa na kuvapela milima yavi yivya uhali winu ngati chayivili mbaka lelu. 39 Hinu mukumbuka lelu na kuvika mumitima yinu, kuvya Bambu ndi Chapanga kunani na pamulima kawaka yungi. 40 Hinu mukamula muhilu na malagizu gaki zenikuvapela lelu muni mfanikiwa, nyenye pamonga na viveleku vinu, na kutama magono gamahele pa mulima wemupewa na Bambu Chapanga winu uvya winu magono goha gangali mwishu."

41 "Ndi Musa akahagula miji yidatu yeyivi upandi kwelihumila lilanga mwa mfuleni Yoludani, 42 mwenumo mundu ihotola kutilalila na kutama, ngati akomili mundu angavya likoko waki changagana. Mundu ngati mwenuyo ihotola kutilalila mumuji umonga pagati ya miji yeniyo na kuusangula wumi waki. 43 Ahagwili muji wa Beseli paselede ya lugangatu ndava ya likabila la Leubeni, na muji wa Lamoti kumulima wa Gileadi ndava ya likabila la Gadi na muji wa Golani kumulima wa Bashani ndava ya likabila la Manase."

44 "Lenili ndi lilagizu lila Musa avapelili Vaisilaeli. 45 Genago ndi maamula, mihilu na malagizu gala Musa avajovili Vaisilaeli pevahumili ku Misili, 46 pavavili kumwambu ya mfuleni Yoludani, mulikemba lelavili palongolo ya Beti Peoli, pamulima wewavili wa nkosi Sihoni wa Vaamoli, mwatalalila kuhuma muji wa Heshiboni mwenumo Musa na Vaisilaeli vamuhotwili pavahumili ku Misili. 47 Vanyagili mulima waki na mulima wa nkosi Ogu wa Bashani. Venava ndi vankosi vavili va Vaamoli vevatalalila kwelihumila lilanga mwa mfuleni Yoludani. 48 Mulima wenuo wayenili kuhuma Aloeli pamuhana ya mfuleni Alinoni, mbaka chitumbi cha Silioni yani ndi Helimoni, 49 pamonga na pandu poha pa upandi kwelihumila lilanga mwa mfuleni Yoludani mbaka nyanja ya Mwinyu mwishu wa luhelelu lwa chitumbi cha Pisiga."