1 "Ngati mumukolili mundu akomiwi kudasi mumulima wemupewi na Bambu Chapanga winu, uvya winu, na nyenye mumumanyili lepi mweamukomili, 2 Vagogo vinu na vahamula vinu vahuma kuvala ya muji na kupima, utali kuhuma peagoniswi mweafwili mbaka muji wa papipi yaki. 3 Penapo vagogo va pamuji weuvii papipi na mundu mweafwili yula ndi yati vileta mpapakasi wa ng'ombi yangahenga kuhenga lihengu loloha. 4 Na vene yati vakuupeleka mpapakasi udala mwenuyo kunyasi kwekuvi na kapela kangayuma manji. kwenuko ndima yaki yangalimwa amala kupandwa. Kwenuko vagogo yaki vakuudenya hingu mpapakasi. 5 Na venavo vamteta va Chapanga va lukolo lwa Lawi viganikiwa vavyai penapo, muni venavo ndi vevahaguliwi na Bambu Chapanga waku, vamuhengelayi na kuvamotisa vandu kwa liina la Bambu, na kuvya vahamula va mihalu na mambu goha kukomana na ukomaji. 6 Vakamala kudenya hingu ya udala wenuwo ndi vagogo voha vamuji wenuwo weuvii papipi na peagoniswi mundu mweakomiwi uyo, yati visanja mawoko gavi kwa manji panani ya mtuhi wa mpapakasi udala wenuo, 7 na kujova, ‘Tete timkomili lepi mundu uyu, na timumanyili lepi mweamukomili. 8 Bambu Chapanga, uvalekekesa vandu vaku Vaisilaeli vewavagombwili, kuhuma ku Misili. Utilekekesa na ukotoka kutivalangila vandu vaku Vaisilaeli ukomaji wa mundu mwangabuda.’ 9 Ndava yeniyo kwa kukita chenicho cheigana Bambu Chapanga yati mwivalangiwa lepi kubuda ndava ya ukomaji wenuo."

10 "Mukahamba kutovana ngondo na vamakoko vinu, na mwene Bambu Chapanga winu, akavakita muvahotola, na kuvakamula kwa makakala vandu vamahele. 11 Ngati mmonga winu akawonayi mdala wabwina pagati ya vadala venavo vemuvakamwili akamnogela na kugana kumgega ndi amgega avya mdala waki, 12 ndi uhamba nayu kunyumba yaku, kwenuko aketa mayunju na kudumula yugu zaki, 13 ahula nyula zeawalili lukumbi peakamuliwayi. Yati akuvavembela dadi na nyina vaki mulukumbi lwa mwehi woha, kangi uhotola kumhambila na kuvya mgosi waki namwene avya mdala waku. 14 Nambu ngati uganiswa nayu lepi kangi, umulekayi ahamba cha uteke. Yihotoleka lepi kangi veve kumugulisa amala kumukita kangi ngati mvanda, ndava wamali kugona nayu."

15 "Ngati avii mgosi mweavi na vadala vavili na akumugana mmonga kuliku yungi na voha vavili vamvelekili vana vagosi na mvelekanu wa kutumbula ndi wa yula mweangamgana, 16 na lukahika lukumbi lwa kuwusa uhali, dadi mwenuyo iganikiwa lepi katu kumkitila mwana wa yula mdala mweamganili ngati kuvya mvelekwanu wa kutumbula, pahala pa yula mdala angaganwa yula ndi mbelekanu wa kutumbula. 17 Yiganikiwa ampela uhali yula mwana mvelekanu wa kutumbula wa mdala yula mweangamgana, ndi ampela gala geiganikiwa. Pandu pa vindu vyaki mala zivili ngati malagizu chegegigana."

18 "Ngati mundu ana mwana wa chigosi mweana ndindani na mweana mang'ang'ala, mweangavayuwanila dadi na nyina vaki pevakumlakalila, 19 hinu dadi waki na nyina waki vamukamulayi mwana mwenuyo na vampelekayi kwa vagogo palimulyangu la muji. 20 Dadi na nyina waki vavajovelayi vagogo va muji kuvya: ‘Mwana witu ana ndindani na akutiyuwanila lepi chetijova na kangi muhutulu na chigaligali.’ 21 Penapo vagosi voha va muji wenuwo yati vakumutova maganga msongolo mwenuyo mbaka afwayi, chenicho ndi chemukita ndava ya kuwusa uhakahu woha pagati yinu. Vaisilaeli voha yati viyuwana genago na kuyogopa."

22 "Ngati mundu ahokili libudili lelikumgana kukomiwa mwene akakomiwa, higa yaki yining'iniswa pamkongo, 23 mkotoka kuyileka higa yaki yigona pamkongo kilu yoha. Nambu higa yeniyo mzika ligono lilolo. Muni mundu mweafwili kwa kuning'iniswa pamkongo apewili likoto na Chapanga, na nyenye kwa kukita chenicho ndi mwene yati akuubela mulima wemupewili na Bambu Chapanga winu uvyayi uhali winu."