1 Yeniyi ndi mota yeajovili Musa, mundu wa Chapanga kwa vandu va Isilaeli kwakona kufwa kwaki.

2 Akajova, Bambu Chapanga abwelili, kuhumila kuchitumbi Sinai,

atihumalili kuhuma kuchitumbi Seili

avalangazili vandu kuhuma chitumbi cha Palani.

Abwelili pamonga na mitumi va kunani kwa Chapanga elufu kumi,

na motu wewiyaka muchiwoko chaki cha kulyelela.

3 Bambu Chapanga, avaganili vandu vaki

na akuvayunga vala vevi vaki.

Voha vifugama pamagendelu paki

na kupokela malagizu gaki.

4 Musa atilagisi tiyidakila Malagizu,

ndi chindu chivaha pamulima witu.

5 Bambu Chapanga, akavya nkosi wa Vasilaeli

lukumbi vilongosi vavi pevakonganiki na makabila goha pegakonganiki.

6 Musa akajova ndava ya likabila la Leubeni:

"Leubeni atama na akotoka kufwa,

na vandu vaki vakoto kuvya vadebe."

7 Ndava ya likabila la Yuda akajovili:

"Veve Bambu Chapanga, yuwanila chivembu cha likabila la Yuda,

umuwuyisa kangi kwa vandu vangi.

Umkengelela kwa mawoko gaku Bambu Chapanga,

na uvatangatila likabila la Yuda pavitovana na makoko vavi."

8 Ndava ya likabila la Lawi akajova:

"Vee Bambu Chapanga, uvapela vandu va likabila la Lawi uhamula waku wa Ulimu,

uhamula waku wa Tumimu kwa vala vevavi vasadikika,

vewavalingili ku Masa.

9 Valangisi usadikika wavi ukulu kwaku, kuliku kwa vadadi na vanyina vavi na valongo vavi na vana vavi,

Vayidaki malagizu gaku kwa usadikika mu lilaganu laku. 10 Yati vavawula viveleku vya Yakobo malagizu yaku,

vavawula Vaisilaeli malagizu gaku.

Valawi vahukisa ubani palongolo yaku,

luteta lwoha lwa kutinyisa pandu pa kuwusila luteta paku. 11 Veve Bambu Chapanga umotisa makakala;

Uyidakila mahengu ga mawoko gavi

Vatova vamakoko vavi voha,

vatova vamakoko vaki hati kuyinuka kavili."

12 Ndava ya likabila la Benjamini akajova:

"Lenili ndi likabila lealiganili Bambu Chapanga, na lenilo livya na uteke papipi na mwene.

Akuvayunga magono gavi goha,

mwene akuvayunga muhi woha na kuvavika chauteke mwene itama pagati yavi."

13 Ndava ya likabila la Yosefu akajova:

"Bambu Chapanga na aumotisa mulima waki, kwa mota ya fula na manji kuhuma pandima,

14 umotiswa kwa matunda gabwina gegivya lukumbi lwa chilangasi,

na kwa matunda ga kila mwehi.

15 Kwa mabenu gabwina ga hitumbi yeyavili kuhumila kadeni,

16 Mulima waki umema goha gegavii gabwina,

Chapanga avamotisa kwa vindu vyabwina,

mwene mwajovili kuhuma padasi yayaka motu.

Mota zenizi zivahelelayi vandu va likabila la Yosefu,

mweavi mkulu pagati ya valongo vaki.

17 Ulumba waki ndi ngati ng'ombi yigosi yeyitumbwili kuvelekwa,

na mang'elu gaki ndi ngati liyati ligosi.

Genago yati ihengela kuvakang'a vandu va milima yingi.

Efulaimu yati ivya na mang'elu genago elufu kumi.

Mewa Manase yati ivya na mang'elu maelufu."

18 Kuvala makabila ga Zebuloni na Isakali akajova:

"Zebuloni hekelelayi mulugendu lwaku,

na veve Isakali, hekelelayi mumandanda gaku.

19 Yati vakuvagongolela vayehe muhitumbi yavi

na kwenuko vandu yati viwusa teta zeziganikiwa.

Ndava muni vene yati vipata vindu vyamahele kuhuma munyanja,

na mewa kuhuma mumusavati wa mumbwani."

20 Kuvala likabila la Gadi akajova:

"Alumbiwa Chapanga mweampeli Gadi pandu pavaha.

Gadi inyemelela ngati lihimba

ipanyula chiwoko na ludodoso lwa mutu.

21 Ajihagulili mulima wabwina kuliku milima yingi;

Pandu pepahaguliwi ndava ya chilongosi.

Avalongwisi vandu kumyidakila Bambu Chapanga,

atimilisi mpangu wa Bambu Chapanga kwa Vaisilaeli."

22 Kuvala likabila la Dani ajovili naha:

"Dani ndi ngati mwana wa lihimba,

lelihumba kuhuma ku Bashani."

23 Kuvala likabila la Nafutali akajova:

"Veve Nafutali umemili uganisilu wamahele wa Bambu,

Mweumemili mota za Bambu Chapanga, mulima waku ndi kusini ku nyanja ya Galilaya."

24 Kuvala likabila la Asheli akajova:

"Amotisiwa Asheli kuliku makabila gangi.

Na aganwa na valongo vaki voha,

na ndima yaki yimema mikongo ya mizeituni.

25 Vidindilu vya mamilyangu yaku vivya vya lyuma na shaba,

yati utama kwa uteke magono gaku goha."

26 Musa akamalakisa kwa kujova,

veve Isilaeli avi lepi Chapanga ngati Chapanga waku,

mweibwela kukutangatila kuhuma kunani,

ipita mumahundi muukulu waki,

27 Chapanga wa magono goha ndi mweukumujumbalila,

makakala gaki giwonekana pamulima.

Avavingili vamakoko palongolo yinu,

akavalagiza: Muvakomekesa.

28 Ndava yeniyo, vandu va Isilaeli vakatama chauteke,

vana va Yokobo vene,

mumulima weumemili vyakulya na divayi,

mulima weutonyesa fula kwa luumbi lwaki.

29 Mumotisiwi nyenye Vaisilaeli!

Yani mweavi ngati nyenye,

vandu mwemsanguliwi na Bambu Chapanga,

mweavii chingwamba cha utangatila winu,

na upanga weukuvakita muvahotola vamakoko vinu.

Vamakoko vinu yati vivagaya palongolo yinu

na nyenye yati mukuvalivatila pahi.