1 "Nyenye ndi vana va Bambu Chapanga winu, mkotoka kujilemba nembu amala kuketa lupanja ndava ya mundu mweafwili. 2 Nyenye ndi vandu vaki Bambu Chapanga winu, avahagwili muvya waki pagati ya vandu voha vevitama pamulima."

3 "Mkotoka kulya chindu chiyidakiliwa lepi munjila ya kumfugamila Chapanga. 4 Muhotola kulya hinyama iyi: ng'ombi na mambelele na mene, 5 swala na huluku na kongoni na mene za mdasi na swala wamsopi na pofu na chipalama, 6 na kila chimanya chechina kwatu zezilekengine pandi zivili na chechilukula, chenicho muhotola kulya. 7 Nambu mkotoka kulya chinyama chochoha chechina kwatu zezilekengine lepi pandi zivili na chechilukula, mkotoka kulya ngamiya na chipecha na pelele, pamonga chilukula nambu kwatu zaki zilekengine lepi pandi zivili, vinyama vyenivyo vidakiliwa lepi munjila ya kumfugamila Chapanga 8 Mewa mkotoka kulya liguluvi, pamonga kwatu zilekengine pandi zivili nambu lilukula lepi, lenilo liyidakiliwa lepi munjila ya kumfugamila Chapanga, mkotoka kulya nyama zavi amala kupamisa mituhi yaki."

9 "Muhotola kulya kila aina ya somba zezina mapezi na magamba. 10 Nambu chiumbi chochoha chechitama mumanji changali mapezi na magamba mkotoka kulya, vyenivyo yidakiliwa lepi munjila ya kumfugamila Chapanga."

11 "Muhotola kulya videge vyoha vyeviyidakiliwi na Chapanga. 12 Nambu mkotoka kulya videge ivi: Tai na kapungu na tumbusi, 13 kengewa mdung'u na kengewa mtitu na mambanga ga namuna yoyoha, 14 na aina zoha za makungulu, 15 na mbuni na chihumba njila na lilova somba na mambanga kwa namuna zaki, 16 na matuhi na mumbi na lituhi livaha, 17 na mpeta na ngong'ondo na livata manji, 18 na kolongo na ndiwu na hudihudi na chinimanima."

19 "Mewa mkotoka kulya vingokoko vyoha vyevina vevikwava vyevina magwaba viyidakiliwa lepi munjila ya kumfugamila Chapanga. 20 Muhotola kulya viumbi vyoha vyevina magwaba vyeviyidakiliwa kuliwa."

21 "Mkotoka kulya nyama ya chinyama chechifwili. Muhotola kumpela muyehe mweitama mumiji yinu alyai amala muhotola kumgulisila mundu wa mulima wungi, muni nyenye mwavamsopi na Bambu ndi Chapanga winu, na mkotoka kumvilisa mwana mene mumavele ga nyina waki."

22 "Muwusa lilundu limonga pagati ya kumi ya mabenu ginu goha ga kumgunda kila mwaka. 23 Kangi muhamba pandu pala Bambu Chapanga winu pahangwili mkamgundamila na pamwivya palongolo yaki yati mwilya lilundu limonga pagati ya kumi za mabenu na divayi yinu na mahuta na chiveleku va kutumbula va ng'ombi na mambelele ginu, mkita naha ndava ya kumtopesa Bambu Chapanga winu, magono goha. 24 Nambu ngati pandu pala ndi patali neju na nyenye muhotola lepi kugega lilundu limonga pagati kumi ga mabenu ginu gemumotisiwi na Bambu Chapanga winu, ndi mkita chenichi, 25 Mugulisa mabenu ginu na mtola mshonga ginu mbaka pandu peapahagwili na kumfugamila Bambu Chapanga winu, 26 mtumila mashonga genago kwa kugula chochoha chemwigana, nyama ya ng'ombi na ya limbelele na divayi amala mnyweso weugalisa, yati mwilya na kuhekelela palongolo ya Bambu Chapanga winu, pamonga na valongo vinu."

27 "Mkotoka kuvakosiwa Valawi vevitama pagati yinu, vene vavi lepi na lilundu amala ndima yavi vene. 28 Na kila mwishu wa mwaka wa datu muwusa lilundu limonga pagati ya kumi ya mabenu ginu goha na kuvika muchibana mumiji yinu. 29 Vyenivyo yati vivya ndava ya Valawi ndava muni vavilepi na ndima yavi vene yevihala pagati yinu, na vayehe na vakiva na valipwela vevitama mumuji winu yati vibwela kulya na kuyukuta. Mkita naha na Bambu Chapanga winu, yati avamotisa mumahengu ginu goha gemkita kwa mawoko ginu."